Iki gitaramo cya ‘Icyambu 5’ gitegerejwe ku wa 25 Ukuboza
2026, kikaba gihurirana n’umunsi Abakirisitu bo hirya no hino ku Isi bizihizaho
ivuka rya Yesu Kristo. Ni umunsi usanzwe urangwa n’ibyishimo, gusangira no
kwibuka igisobanuro cy’ivuka rya Yesu, bityo iki gitaramo kikaba umwanya
wihariye wo kuwizihiza binyuze mu ndirimbo zo kuramya no guhimbaza Imana.
Israel Mbonyi yamenyesheje abakunzi be ko imyiteguro y’iki
gitaramo yatangiye, anatangaza ko amatike yo kwinjira yamaze kujya ku isoko.
Yagize ati: “Icyambu 5. Amatike yamaze kujya hanze. Ni ku wa
25 Ukuboza mu 2026 muri BK Arena.”
‘Icyambu’ ni kimwe mu bitaramo bimaze kugira umwihariko mu
muziki wo kuramya no guhimbaza Imana mu Rwanda, by’umwihariko kubera igihe
kiba, aho gihurirana na Noheli.
Kuva cyatangira, cyagiye kiba umwanya w’abakunzi ba Israel
Mbonyi n’abandi bakunda indirimbo zihimbaza Imana wo guteranira hamwe, kuramya
no kwizihiza ivuka rya Yesu Kristo.
Amateka y’iki gitaramo asubira mu 2022, ubwo Israel Mbonyi
yateguraga igitaramo cyo kumurika Album ye yise ‘Icyambu’. Icyo gitaramo
cyagenze neza, izina ryacyo rikundwa n’abakunzi b’umuziki we, bituma rihinduka
izina ry’ibitaramo ngarukamwaka uyu muhanzi akora kuri Noheli.
Mu myaka yakurikiyeho, iki gitaramo cyakomeje kwitabirwa
n’abatari bake, gihinduka kimwe mu bikorwa by’ingenzi biranga ibirori bya
Noheli ku bakunzi b’indirimbo zo kuramya no guhimbaza Imana.
Kimwe mu byaranze izi nshuro zabanje ni uko amatike yakomeje
gushira ku isoko mbere y’uko umunsi w’igitaramo ugera, mu gihe BK Arena yakiraga
imbaga y’abaje kwifatanya n’uyu muhanzi. Ibi byagaragaje uburyo iki gitaramo
kimaze kugira izina n’umwanya mu mitima y’abakunzi b’umuziki wa Gospel.
Umwihariko wa ‘Icyambu’ ntugarukira gusa ku kuba ari
igitaramo cy’umuziki, ahubwo gifite n’ubutumwa bujyanye n’igihe kiba. Kuba
gitegurwa ku wa 25 Ukuboza bituma kiba umwanya wo kwibuka no kwizihiza ivuka
rya Yesu Kristo, binyuze mu ndirimbo, amasengesho n’ubutumwa bwo kwizera.
Muri ibi bitaramo, Israel Mbonyi akunze gusangiza
abitabiriye indirimbo ze zakunzwe, zirimo izamufashije kumenyekana mu muziki wo
kuramya no guhimbaza Imana, ndetse n’izindi zagiye zigaragara kuri Album ze
zitandukanye.
Ku bakunzi be, kiba n’umwanya wo kongera guhura n’indirimbo
zafashije benshi mu bihe bitandukanye by’ubuzima, bagafatanya kuzisingiza no
gushimira Imana.
Kuba iki gitaramo kigiye kuba ku nshuro ya gatanu ni
ikimenyetso cy’uko cyabaye umuco ngarukamwaka, aho Noheli y’Abakunzi ba Israel
Mbonyi n’abandi bakunda umuziki wa Gospel itangira no gutekerezwa binyuze mu
gitaramo cya ‘Icyambu’.
Mu gihe imyiteguro y’‘Icyambu 5’ ikomeje, amaso y’abakunzi
b’uyu muhanzi n’abandi bazitabira iki gitaramo ahanzwe kuri BK Arena, aho ku wa
25 Ukuboza 2026 bazahurira mu gitaramo kigamije guhuza umuziki, ukwizera
n’ibyishimo byo kwizihiza Noheli.
Israel Mbonyi yatangaje ko igitaramo cye ngarukamwaka
‘Icyambu’ kigiye kuba ku nshuro ya gatanu
‘Icyambu 5’ irabura amezi make ngo yongere guhuza abakunzi
b’indirimbo zo kuramya no guhimbaza Imana muri BK Arena. Israel Mbonyi
yatangaje ko iki gitaramo kizaba kuri Noheli, tariki ya 25 Ukuboza 2026, mu kwizihiza
ivuka rya Yesu Kristo