Israel Mbonyi yasusurukije abanya-Musanze nk’umusogongero w’ibitaramo bye byo mu Ntara -AMAFOTO

Iki gitaramo cyabaye ku mugoroba wo kuri uyu wa Gatandatu tariki 22 Werurwe 2026, cyari giteguwe n’iyi kaminuza mu rwego rwo kwakira abanyeshuri bashya, kikaba cyitabiriwe n’abanyeshuri benshi ndetse n’abaturage bo muri aka karere bakunda ibihangano bya Mbonyi.

Ni igitaramo cyabaye nk’umusogongero w’uruhererekane rw’ibitaramo bikomeye uyu muramyi ateganya gukorera mu Ntara zitandukanye z’u Rwanda, mu rwego rwo kurushaho kwegera abakunzi b’umuziki we batabona uko bagera i Kigali kenshi.

Mbere y’uko Mbonyi ajya ku rubyiniro, abanyeshuri biga muri INES Ruhengeri bagaragaje impano zitandukanye binyuze mu ndirimbo z’amakorari y’amadini n’amatorero atandukanye abarizwa muri iyi kaminuza. Ibi byatanze umwanya mwiza wo gutegura umwuka w’iyobokamana mbere y’igitaramo nyamukuru.

Ubwo Israel Mbonyi yageraga ku rubyiniro, yakiriwe n’imbaga y’abasaga ibihumbi bine bari buzuye aho igitaramo cyabereye, bamugaragariza ibyishimo byinshi. Yari kumwe n’abacuranzi ndetse n’abaririmbyi be basanzwe bamufasha mu bitaramo no mu bikorwa bye bya muzika.

Uyu muhanzi, umaze imyaka irenga 11 mu muziki wo kuramya no guhimbaza Imana, yaririmbye indirimbo ze zakunzwe zirimo n’iyatumye ahabwa akabyiniriro ka “Icyambu”, ikundwa cyane mu bakunzi b’iyi njyana.

Bamwe mu banyeshuri bitabiriye iki gitaramo bagaragaje ko bishimiye uburyo bakiriwe mu buzima bwa kaminuza binyuze mu myidagaduro ifite ubutumwa bwiza.

Erssie Teta wiga ibijyanye n’ikoranabuhanga muri INES Ruhengeri yagize ati “Twishimiye cyane Israel Mbonyi wadutaramiye uyu munsi. Guhabwa ikaze muri ubu buryo bituma umunyeshuri mushya atangira kaminuza yishimye, akiga afite umutuzo no kumva ko hari n’igihe cyo kuruhuka no gusenga.”

Undi munyeshuri na we yavuze ko iki gitaramo kitari imyidagaduro gusa, ahubwo cyabaye umwanya w’ihumure no kwegera Imana, aho buri wese yifatanyije n’abandi mu ndirimbo ziramya.

Iki gitaramo cyasize benshi bavuga ko cyari kirenze kuba igitaramo gisanzwe, kuko cyaranzwe n’akanyamuneza, ubumwe n’umwuka wo kuramya Imana wagaragaraga mu banyeshuri n’abandi bose bari bitabiriye.

Mu gihe Mbonyi akomeje gutegura ibitaramo bye byo mu Ntara, igitaramo cya INES Ruhengeri cyatanze ishusho y’uko ashaka kwegera abakunzi be aho bari hose, abaha umuziki ufite ubutumwa bwubaka no kubanezeza.

Ni igitaramo cyashimangiye ko umuziki wo kuramya no guhimbaza Imana ukomeje kugira uruhare rukomeye mu buzima bw’urubyiruko, by’umwihariko abiga muri kaminuza, aho uba isoko y’ihumure n’icyizere mu rugendo rwabo rwa buri munsi.

Israel Mbonyi yasusurukije abanyeshuri ba INES Ruhengeri mu gitaramo cyuzuyemo kuramya no guhimbaza Imana, asiga atanze ishusho y’ibitaramo ateganya mu Ntara

Abasaga ibihumbi bine bitabiriye igitaramo cya Israel Mbonyi i Musanze, bishimira indirimbo ze zakunzwe mu bihe birenga imyaka 10 amaze mu muziki

Ibyishimo byari byose ku banyeshuri bakiriwe na Israel Mbonyi mu gitaramo cyabaye nk’ikaze idasanzwe ku bashya

Mu ijoro ryuzuyemo kuramya Imana, Israel Mbonyi yagaragaje ko umuziki we ukomeje gukora ku mitima ya benshi mu Ntara

Israel Mbonyi yataramiye i Musanze mu gitaramo cyabaye umusogongero w’uruhererekane rw’ibyo ateganya mu Ntara zitandukanye

Ni ibintu birenze igitaramo– Abitabiriye igitaramo cya Israel Mbonyi i Musanze bavuga ku byishimo n’umwuka wihariye waharanze iryo joro