Israel Mbonyi na Himbaza Club bagiye guhurira mu giterane cy’urubyiruko i Kigali

Iki giterane gitegurwa na TFC Rwanda, kikazabera muri Kigali Conference and Exhibition Village ku Cyumweru tariki 17 Gicurasi 2026, ndetse kizitabirwa n'umuvugabutumwa mpuzamahanga, Dr. Chad  Grayson.

Mu bihe bitandukanye, Israel Mbonyi yagiye aririmba muri iki giterane. Biteganyijwe ko iki giterane kizahuza ibihumbi by’urubyiruko ruturutse hirya no hino mu Rwanda, rugahurira hamwe mu bikorwa byo kuramya Imana, kwakira inyigisho zitandukanye ndetse no gusabana.

Mbanzabugabo Muteteri Aminadab yabwiye InyaRwanda ko iki giterane cyateguwe hagamijwe gufasha urubyiruko “kumenya Kristo byimbitse, kubona icyerekezo cy’ubuzima, gukura mu buzima bw’umwuka no kubaka urubyiruko rufite indangagaciro nziza rukunda igihugu kandi rwimakaza iterambere ryacyo uhereye mu miryango yabo.”

Yavuze ko insanganyamatsiko y’uyu mwaka igira iti “The Power of Redemption”, ishingiye mu ijambo riboneka mu gitabo cya Bibiliya cy’Abefeso 1:7, rigaruka ku mbaraga zo gucungurwa binyuze muri Kristo.

Abategura iki giterane bavuga ko Youth Convention 2026 ije mu gihe urubyiruko rwinshi ruhanganye n’ibibazo birimo ibiyobyabwenge, depression, ubusambanyi ndetse no kubura icyerekezo cy’ubuzima.

Bavuga ko intego ari ugufasha urubyiruko kwakira ubutumwa bwiza bwa Yesu Kristo, kubona ibyiringiro bishya no kubaho ubuzima bufite intego.

Iki giterane kandi kizibanda ku kubaka abayobozi b’ejo hazaza bafite indangagaciro nziza, aho TFC Rwanda ivuga ko yemera ko urubyiruko ari rwo buyobozi bw’ahazaza h’igihugu.

Iradukunda Elyse, umwe mu babarizwa muri TFC Rwanda (Teens For Christ Rwanda), yavuze ko bahisemo gutumira Israel Mbonyi kuko ari umwe mu baramyi bamaze igihe bakorana kandi ukunzwe cyane mu rubyiruko.

Ati “Ni umuramyi dukoranye mu bihe bitandukanye kandi wagiye agaragaza ubushake bwo gukomeza gufatanya natwe.”

Yavuze kandi ko abazitabira bazungukira mu nyigisho z’ijambo ry’Imana, ibitaramo byo kuramya no guhimbaza Imana, ubuhamya bw’ubuzima bwahinduwe, amasengesho yo kwakira agakiza, ibiganiro byubaka urubyiruko ndetse n’umwanya wo gusabana no guhana ibitekerezo.

Muri iki giterane kandi hazitabira abavugabutumwa, abayobozi b’urubyiruko, abarimu b’ijambo ry’Imana bo mu Rwanda no hanze yarwo, hamwe n’abaririmbyi b’abanyempano barimo Israel Mbonyi, Himbaza Club na Bet Ammi.

View this post on Instagram

A post shared by Teens for Christ Rwanda 🇷🇼 (@teensforchristrwanda)

Israel Mbonyi agiye kongera gutaramira urubyiruko mu giterane kizwi nka ‘Youth Convention’ cyateguwe na TFC

Himbaza Club izwi cyane mu kubyina no kuvuza ingoma za kirundi itegerejwe muri iki gitaramo kizabera muri Camp Kigali tariki 17 Gicurasi 2026

Umunyamakuru Isaa Noel Karinijabo wagize uruhare mu gutegura iki giterane asobanura ko bagamije kwegera urubyiruko cyane cyane muri iyi isi y’ikoranabuhanga

Mu Ukwakira 2024, Israel Mbonyi yataramiye ibihumbi by’urubyiruko mu giterane nk’iki cy'urubyiruko kinahuza abavugabutumwa