Iyi album yashyizwe ku isoko kuri uyu wa Kabiri, tariki ya 25
Kanama 2026, iza ikurikira igihe Tom Close yari amaze adashyira hanze indirimbo
nshya, nubwo avuga ko icyo gihe atari yarahagaritse gukora umuziki.
“Sunshine” ni album igaragaramo indirimbo 17, zirimo
izikoranye n’abandi bahanzi ndetse n’izindi Tom Close yakoze ku giti cye, byose
bikaba bigize igice gishya cy’urugendo rwe mu muziki.
Muri izi ndirimbo harimo ‘Agaca’ yakoranye na Khalfan na Jay
C, ‘Go Low’, ‘Jailer’, ‘Rotate (Rotete)’, ‘Sunshine’, ‘Ari Muzima (Cana
Itara)’, ‘I Want It All’, ‘Look at Me’, ‘Diana’, ‘Kill a Man’, ‘Cana Itara’
yakoranye na Green P na P-Fla, ‘Tom Close – Apple of My Eye’, ‘Wine’, ‘Cinema’
yakoranye na Bull Dogg, ‘Niyo Ikamena’ na ‘For You (Ferrari).
Iyi album yakozweho n’abarimo Knox on the Beat, Kizz, Bob
Pro, Real Beat, Kenny Vibes, Izzo Pro na Ayo Rash, abatunganya amajwi bagize
uruhare mu gutuma ibitekerezo bya Tom Close bihabwa isura nshya.
Tom Close yari amaze igihe atagaragara cyane mu gusohora
indirimbo nshya, ibintu byashoboraga gutuma bamwe batekereza ko umuziki yari
awushyize ku ruhande.
We ariko avuga ko kuba atarasohoraga indirimbo bitavuze ko
yari yararetse gukora umuziki. Ahubwo ngo icyo gihe yakomeje gukora no gutegura
ibihangano, kugeza ubwo yumvise ko igihe kigeze cyo kubishyira hanze.
Mu kiganiro yagiranye na InyaRwanda, Tom Close yavuze ko
“Sunshine” ifite igisobanuro cyihariye kuri we kuko igaragaza aho ageze ndetse
n’intambwe akomeje gutera.
Ati: “Ni Album isobanuye intambwe nkomeje gutera mu muziki
wanjye. Nari maze iminsi ntarimo gusohora indirimbo ariko bitavuze ko ntarimo
kuzikora, akaba ari yo mpamvu rero nayishyize hanze kugira ngo abakunzi nari
maze igihe naricishije irungu bashobore kubona indirimbo zanjye kandi
bazibonere rimwe.”
Aya magambo ya Tom Close agaragaza ko igihe yamaze
atarasohora ibihangano atari igihe cyo kuruhuka umuziki, ahubwo yari mu gihe
cyo kubaka ibindi bikorwa byaje gusohokera rimwe.
Kuri we, gushyira hanze indirimbo 17 icyarimwe ni uburyo bwo
kongera kwegera abakunzi be yari amaze igihe adaha ibihangano bishya, ndetse no
kubereka ko umuziki we ugikomeje kugira aho ujya.
Indirimbo
17 mu gihe kitageze ku cyumweru
Tom Close avuga ko kuba yashyize hanze indirimbo nyinshi mu
gihe gito ari intangiriro y’ibindi bikorwa byinshi ateganya gukomeza gukora.
Ati: “Mu gihe kitageze ku Cyumweru nsohoye indirimbo 17. Izi
ni indirimbo numva ko abakunzi banjye bazakomeza bumva. Mu minsi iri imbere
nzagenda nsohora ‘Video’ ndetse nsohora n’izindi ndirimbo.”
Akomeza agira ati: “Ubu ni gahunda ikomeza, ntabwo ari
gahunda y’igihe gito.”
Ibi bishimangira ko “Sunshine” atari umushinga ugamije gusa
gusubiza Tom Close ku isoko ry’umuziki, ahubwo ari igice cya gahunda yagutse
afite yo gukomeza gukora no gusangiza abakunzi be ibihangano bishya.
Mu myaka amaze mu muziki, Tom Close yabaye umwe mu bahanzi
bagize uruhare mu iterambere ry’umuziki nyarwanda, akora indirimbo zitandukanye
ndetse anagira uruhare mu mishinga myinshi y’umuziki.
Kuri iyi nshuro, album “Sunshine” iza mu gihe umuhanzi ari
gukomeza urugendo rwe nk’umuhanzi wigenga. Ibi bituma iyi album iba umushinga
udasanzwe kuri we, kuko atari gusa ugusohora indirimbo nshya, ahubwo ari no
kwerekana ko ashaka gukomeza kugena icyerekezo cy’umuziki we.
Indirimbo ziri kuri iyi album zigaragaza uburyo Tom Close
yagerageje guhuza ibitekerezo n’injyana zitandukanye, anagirana imikoranire
n’abahanzi batandukanye barimo Khalfan, Jay C, Green P, P-Fla na Bull Dogg.
Uretse izamaze gushyirwa ku isoko, Tom Close yanateguje ko
hari izindi ndirimbo n’amashusho azagenda asohora mu minsi iri imbere, ibintu
bishobora gutuma “Sunshine” ikomeza kubaho mu gihe kirenze umunsi album
yasohokeyeho.
Ku bakunzi be bamaze igihe bategereje ibihangano bye bishya,
iyi album ni amahirwe yo kongera kumva ijwi n’ubutumwa bw’umuhanzi umaze imyaka
myinshi mu rugendo rwa muzika.
Kuri Tom Close, “Sunshine” si album ya cyenda gusa, ahubwo ni
igice cy’inkuru y’urugendo akomeje kwandika mu muziki, urugendo avuga ko rutararangira
kandi ko gahunda yo gukora no gusohora ibihangano bishya ikomeje.
Tom Close yashyize ku isoko Album ye nshya ya Cyenda yise ‘Sunshine’
Tom Close yavuze ko iyi Album ari indi ntambwe ateye mu rugendo rwe rw’ubuhanzi
KANDA HANO UBASHE KUREBA ALBUM NSHYA YA TOM CLOSE