Iki gikorwa cyaranzwe no kwerekana ubudasa bw’umuco w'aba ofisiye bakuru biga muri iri shuri baturutse mu bihugu 20 byo muri Afurika no hanze yayo.
Abitabiriye ibi birori bagaragaje umuco w’ibihugu byabo binyuze mu biribwa gakondo, imbyino, imyambaro n’ubugeni n’ubuhanzi n'ubundi buryo butandukanye.
Abanyeshuri bagaragaje umuco wabo biga muri iri shuri baturuka mu bihugu bikurikira: Benin, Botswana, Burkina Faso, Repubulika ya Santarafurika, Etiyopiya, Ghana, Guinée, Jordan, Kenya, Malawi, Mali, Niger, Nigeria, Sénégal, Somalia, Sudani y’Epfo, Tanzania, Uganda, Zambia ndetse n’u Rwanda nk’igihugu cyakiriye iki gikorwa.
Mu ijambo yavuze mu izina ry’Umugaba Mukuru w’Ingabo z’u Rwanda, Umuyobozi wa RDFCSC, Brig Gen Andrew Nyamvumba, yagaragaje ko ibi birori bigaragaza umuco w’ubufatanye n’ubuvandimwe mu basirikare.
Yavuze ko uyu munsi wo kugaragaza umuco muri iri shuri ari igikorwa cy'ingenzi, kuko uha abanyeshuri amahirwe yo gusabana, guhanahana ibitekerezo no gusobanukirwa neza ubukungu bw’umuco utandukanye w' ibihugu bakomokamo.
Yagize ati: “Umunsi Mukuru w’Umuco muri iri shuri umaze kuba igikorwa cyiza gishimangira ubufatanye n’ubumwe. Nta gushidikanya ko iki gikorwa giteza imbere gushyigikirana, gukorera hamwe no gufatanya mu mirimo.”
Brig Gen Nyamvumba yongeyeho ko buri muco wagaragajwe ari umwihariko wa buri gihugu, ariko kandi ukanerekana indangagaciro rusange zihuriza hamwe abasirikare n’abaturage bo ku Isi hose.
Yashimangiye ko gusobanukirwa no kubaha umuco wa buri gihugu ari ingenzi kuko bitsura umubano mwiza.
Umunyeshuri uhagarariye abandi, Lt Col John Gakoza, yavuze ko Umunsi nk'uyu w’Umuco utanga amahirwe adasanzwe yo kurenga ku bijyanye n'icyubahiro cya gisirikare, ubwenegihugu n’inshingano, bagahura nk’abantu bahurijwe hamwe n’amateka, imigenzo n’indangagaciro za kimuntu.
Yagize ati: “Nimureke umuziki, imbyino, imyambaro, ibiribwa byerekanwe uyu munsi bitwibutse ko itandukaniro atari intege nke, ahubwo ari imbaraga z’ingenzi mu mikorere ya gisirikare.”
Uhagarariye abanyeshuri baturutse mu bihugu by'inshuti, Lt Col Patrick Nii Lante Anang wo mu Ngabo za Ghana, yavuze ko bishimiye cyane kugira uruhare muri ibi birori bibereye mu Rwanda, igihugu gifite amateka agaragaza imbaraga z’ubumwe, ubudaheranwa n'icyerekezo cy'iterambere.
Yagize ati: “Kuri benshi muri twe, amateka y’u Rwanda atanga amasomo y’ingenzi ku bumwe, ubwiyunge n’uruhare indangagaciro zihuriweho zigira mu kubaka ejo hazaza h’igihugu gitekanye.”
Ibi birori byitabiriwe n'abayobozi barimo Guverineri w'Intara y'Amajyaruguru Maurice Mugabowagahunde, abaturage bo mu Karere ka Musanze, imiryango y’abanyeshuri, ndetse n’abahagarariye ibihugu byabo mu Rwanda.
