Iri
serukiramuco rizaba ku wa 28 no ku wa 29 Kanama 2026, ritegurwa na Green Ferry
Music, ku bufatanye na Institut français y’i Paris, mu gihe ibikorwa byose
bizabera mu Institut Français du Rwanda i Kigali, ifatanyije mu gutunganya no
kwakira iri serukiramuco.
Uyu
mwaka iri serukiramuco rizahuriza hamwe abahanzi barenga 30 baturuka mu Rwanda,
Uganda n'u Burundi, bakora mu nzego zitandukanye zigize umuco wa Hip Hop zirimo
kuririmba Rap, Breakdance, Graffiti ndetse no gushushanya no gukora imyambaro
ya Streetwear.
Mu
cyumweru cyose kibanziriza ibitaramo, aba bahanzi bazitabira ibikorwa
bitandukanye birimo amahugurwa, gusangira ubumenyi, gukorera hamwe indirimbo
muri studio ndetse n'ibiganiro bigamije kongerera ubushobozi urubyiruko n'abahanzi
bakizamuka.
Ibi
bikorwa bizasozwa n'ibirori by'iminsi ibiri bizabera muri Institut Français du
Rwanda, aho abazabyitabira bazasusurutswa n'ibitaramo bya Live, amarushanwa
n'imbyino za Breakdance, ibikorwa bya Graffiti, kuvangavanga imiziki (DJ Sets),
imurikagurisha ry'imideli ya Streetwear ndetse n'ahazagurishirizwa ibihangano
bitandukanye (Pop-up Shops), byose bigaragaza ubukire bw'umuco wa Hip Hop.
Mu
itangazo rigenewe abanyamakuru, abategura iri serukiramuco bavuga ko uyu mwaka
batibanze gusa ku myidagaduro, ahubwo banifuza gukemura zimwe mu mbogamizi
zikigaragara mu ruganda rw'ubuhanzi mu karere, zirimo kubura amahirwe yo
gukorana hagati y'abahanzi bo mu bihugu bitandukanye, amahugurwa, ubujyanama
ndetse n'uburyo burambye bwo guteza imbere impano.
Mu
musaruro witezwe muri iri serukiramuco harimo gusohora Album ihuriweho
n'abahanzi bo mu karere, gutegura icyegeranyo cy'imyambaro ya Streetwear ndetse
no gukora filime mbarankuru (Documentary) izerekana urugendo n'uruhare rwa Hip
Hop mu guteza imbere ubuhanzi bwo muri Afurika y'Iburasirazuba.
'I
Am Hip Hop' yatangiye mu 2017 ari igitaramo gito cyahuzaga abakunzi ba Hip Hop,
ariko kuva mu 2024 ihinduka iserukiramuco ryagutse rihuza ibikorwa bitandukanye
by'umuco n'ubuhanzi.
Kuva
icyo gihe, rikomeje kugira uruhare mu kubaka umuryango mugari w'abahanzi ba Hip
Hop i Kigali, ndetse uyu mwaka rikaba ryaguwe ku rwego rw'akarere kugira ngo
rirusheho guhuza no guteza imbere impano zo mu Rwanda, Uganda n'u Burundi.
Abategura iri serukiramuco bagize bati "Mu 2026, I Am Hip Hop Festival igarukanye icyerekezo cyagutse cyo guhuza akarere. Dukomeje intego yo gukoresha Hip Hop nk'igikoresho cyo guteza imbere ubusabane bw'umuco, kongerera ubushobozi abahanzi no kubaka ubufatanye burambye hagati yabo.
Nubwo urubyiruko rufite
impano nyinshi, haracyari imbogamizi zirimo kubura amahirwe yo gukorana, kubura
ibikorwaremezo, ubujyanama n'amahirwe arambye yo kwiteza imbere."
Bakomeza
bavuga ko intego nyamukuru ari ugukomeza gushyira Kigali ku ikarita y'imijyi
ifatwa nk'ibigo by'iterambere ry'ubuhanzi muri Afurika, no kubaka umuyoboro
uhuza abahanzi ba Hip Hop bo mu karere.
Amarembo
y'iserukiramuco azaba afunguye guhera saa cyenda z'amanywa (3:00 PM) kugeza saa
tanu z'ijoro (11:00 PM) ku wa 28 no ku wa 29 Kanama 2026.
Amatike yamaze gushyirwa ku isoko, mu gihe abategura batangaje ko urutonde rw'abahanzi bazaririmba muri iri serukiramuco ruzatangazwa mu minsi iri imbere.
Iri serukiramico rizaba mu gihe cy'iminsi ibiri, ku wa 28 Kanama na 29 Kanama 2026
Umuraperi Romeo Rap Star ari ku rubyiniro muri iki gitaramo cyubakiye ku guteza imbere injyana ya Hip Hop
Umuraperi Icenova ari mu baririmbye muri iri serukiramuco rya Hip Hop mu bihe bitandukanye
