Isacco yavuze kuri Album ye ya Kabiri yahurijeho Khalfan

Mu kiganiro na InyaRwanda, Isacco yavuze ko yahisemo gukorana na Khalfan kuko asanzwe ari inshuti ye, ndetse ko iyi ndirimbo yari imaze igihe kinini ayitegura.

Yagize ati: "Nahisemo gukorana na Khalfan kuko turaziranye, kandi ni inshuti yanjye. Indirimbo nari nayiteguye, nayimwumvishije arayikunda, ubundi tuganira ku buryo tuyikorana. Nubwo yari imaze iminsi ikozwe, ubu ni igihe kirageze ngo abafana bayumve."

Isacco yavuze ko iyi ndirimbo izaba imwe mu ndirimbo zigize Album ye ya Kabiri, kandi yizeye ko izamufasha gukomeza gushimangira ibikorwa bye mu muziki.

Yongeyeho ati: "Kuba iyi ndirimbo twembi yaduteza imbere ni byiza. Ngiye gukora amashusho yayo ku rwego rwo hejuru, kuko nari maze igihe nta kintu mpa abafana banjye."

Uyu muhanzi yakomeje avuga ko yagiye ahugira ku kazi gasanzwe, ariko ubu yamaze gusubira ku muziki ku buryo bwuzuye. Ati: "Nari maze igihe ndi kwita ku kazi, ariko ubu narahugutse, ndi kureba uko nshyira imbaraga mu muziki. Umuziki ni kimwe mu byo nishimira kandi nifuza kugikora neza."

Isacco yavuze ko Album ye izaba irimo indirimbo 14, kandi yihaye intego yo kuyisohora muri uyu mwaka. Ati "Muri iyi minsi ngiye gusohora indirimbo zikurikiranye, kugirango Album izajye hanze abantu bayumve yose."

Isacco yatangaje ko agiye gusohora Album ye ya kabiri, ikazaba iriho indirimbo 14, kandi yizeye ko izakomeza gushimangira urugendo rwe mu muziki

Khalfan yishimiye gukorana na Isacco ku ndirimbo ‘Nakupenda’, ashimangira ko gukorana n’inshuti ye byoroshye kandi byungura impano ye mu muziki

KANDA HANO UBASHE KUMVA INDIRIMBO ‘NAKUPENDA’ YA ISACCO NA KHALFAN