Ibitero bya Iran byaje nyuma y’uko Amerika igabye ibitero bishya ku bikorwa remezo bya gisirikare bya Iran, mu gihe amakimbirane hagati y’ibihugu byombi akomeje gukaza umurego.
Leta ya Iran yavuze ko ibitero bya Amerika byahitanye abasivile mu gace ka Sirik, mu majyepfo y’igihugu, aho igisasu cyaguye ku rugo rwaberagamo ibirori by’ubukwe.
Umuryango wa Iranian Red Crescent, ishami ry’Umuryango Mpuzamahanga utabara imbabare, wavuze ko abantu batanu, barimo umwana, bapfuye nyuma y’uko ibisigazwa by’ibyuma bivuye mu gisasu cy’Amerika biguye kuri urwo rugo. Wavuze kandi ko abantu barenga 50 bakomeretse.
Icyakora, Amerika yavuze ko izi ayo makuru ariko ishimangira ko itari igamije kurasa ku basivile.
Nyuma y’ibitero bya Amerika, umutwe w’ingabo udasanzwe wa Iran, Islamic Revolutionary Guard Corps (IRGC), watangaje ko Amerika izagerwaho n’ingaruka z’ibikorwa byayo.
Iran yahise irasa misile na drones ku bikorwa bya gisirikare bifitanye isano na Amerika mu bihugu bitandukanye byo mu Burasirazuba bwo Hagati. Mu Jordan, Iran yarashe misile za ballistic yerekeza ku kigo cya gisirikare cy’Abanyamerika kiri hafi ya Aqaba.
Ingabo za Jordan zatangaje ko zasamye misile 13, muri zo 10 zirasenywa, mu gihe izindi eshatu zaguye mu bice bituwe gake. Nta bantu bapfuye cyangwa bakomerekejwe n’icyo gitero, nk’uko abayobozi ba Jordan babitangaje.
Muri Kuwait, ubuyobozi bwatangaje ko ubwirinzi bw’ikirere bw’igihugu bwari mu bikorwa byo gusubiza ibitero bya Iran. Amakuru yatangajwe n’impande zitandukanye avuga ko ibitero byari bigamije ahari ibikorwa bifitanye isano n’ingabo za Amerika.
Muri Bahrain, aho Amerika ifite ibikorwa bikomeye bya gisirikare, cyane cyane ibiro bikuru by’ingabo zirwanira mu mazi za Amerika mu karere, na ho humvikanye ibiturika nyuma y’ibitero bya Iran.
Ibitero kandi byageze muri Iraq, aho Iran yibasiye ibigo bifitanye isano n’ingabo za Amerika.
Nk’uko tubikesha ikinyamakuru BBC News, Amerika yavuze ko ibitero bishya yagabye kuri Iran byari bigamije ibikorwa by’Ingabo zidasanzwe za Iran, IRGC.
Ubuyobozi bwa Amerika bwavuze ko mu byibasiwe harimo ibirindiro by’ubwirinzi bw’ikirere, radar, ibikorwa remezo byo mu nyanja, ibikoresho bifitanye isano no gushyira za mine mu mazi ndetse n’ibigo by’itumanaho.
CENTCOM yavuze ko ibitero byaje nyuma y’ibikorwa Iran yari iherutse kugerageza gukora ku mato y’ubucuruzi anyura mu Muhora wa Hormuz, inzira y’ingenzi cyane mu gutwara peteroli ku isi.
Umuhora wa Hormuz ni ingenzi ku isoko ry’ingufu ku isi kuko igice kinini cya peteroli itwarwa n’amato kinyura muri uwo muhora. Ibibazo by’umutekano muri ako gace rero bishobora kugira ingaruka ku itangwa rya peteroli n’ibiciro byayo ku isi.
Urupfu rw’abari mu bukwe rwakajije umurego
Igitero cyabereye i Sirik ni cyo cyabaye intandaro nshya yo gukaza umurego w’ibitero hagati ya Washington na Tehran.
Iran yavuze ko igisasu cy’Amerika cyaguye ku rugo rwaberagamo ibirori by’ubukwe, kigahitana abantu batanu, harimo umwana, ndetse kigakomeretsa abandi barenga 50.
Amerika yo yavuze ko itigeze iggambirira kurasa abasivile, kandi ko izi amakuru yatangajwe na Iran. Ibi byatumye impande zombi zikomeza guterana amagambo, mu gihe ibitero bya gisirikare byakomeje gukwira mu bice bitandukanye by’akarere.
Trump yihanangirije Iran
Perezida wa Amerika, Donald Trump, yari yaburiye Iran ko izahura n’ibitero bikomeye kurushaho mu gihe yaba igabye ibitero byo kwihorera.
Nyuma y’ibitero bishya bya Iran, impungenge z’uko amakimbirane ashobora gukomeza gukwira mu bihugu byinshi byo mu Burasirazuba bwo Hagati zarushijeho kwiyongera.
Ibihugu nka Jordan, Kuwait na Bahrain biri mu bihugu bifite ibikorwa bya gisirikare bya Amerika, bityo ibitero bigamije ibyo bikorwa bishobora gutuma ibi bihugu na byo byisanga mu bibazo by’intambara hagati ya Washington na Tehran.
Umuhora wa Hormuz na wo uri mu byibandwaho
Ikindi kibazo gikomeye kiri hagati y’impande zombi ni umutekano wo mu Muhora wa Hormuz.
Amerika ivuga ko ibikorwa bya Iran ku mato no ku nzira z’ubwikorezi bwo mu nyanja byateje ikibazo ku bwikorezi mpuzamahanga.
Iran na yo yakomeje gukoresha uyu muhora nk’igice cy’igitutu ishyira kuri Amerika, mu gihe Washington ishaka ko inzira z’ubwikorezi bwa peteroli zikomeza gufunguka.
Iki kibazo cyagize n’ingaruka ku masoko ya peteroli, aho abacuruzi batinya ko imirwano ikomeza ishobora guhungabanya ubwikorezi bwa peteroli buturuka mu bihugu byo mu Kigobe.
Intambara ikomeje gukaza umurego
Ibitero bishya by’Amerika na Iran byerekanye ko agahenge kari kamaze igihe gasa n’akari kurangira.
Ku wa Kabiri, Amerika yatangaje ko yarangije urundi rugendo rw’ibitero ku birindiro bya Iran, naho Iran igatangaza ko yatangiye icyo yise igisubizo cyo kwihorera.
Kugeza kuri uyu wa Gatatu, impande zombi zikomeje gukozanyaho mu bitero, mu gihe ibihugu byo mu karere bikomeje gushyira ubwirinzi bwabyo ku rwego rwo hejuru.
Nubwo Amerika ivuga ko ibitero byayo bigamije guhungabanya ibikorwa bya gisirikare bya Iran, amakuru aturuka muri Iran avuga ko bamwe mu basivile bamaze kugirwaho ingaruka.
Uko ibintu bikomeza, hari impungenge ko intambara ishobora kurenga imipaka ya Iran na Amerika, ikagira ingaruka ku bihugu byinshi byo mu Burasirazuba bwo Hagati ndetse no ku bukungu bw’isi.
Kugeza ubu, ikibazo gikomeye gikomeje kuba niba impande zombi zizabona inzira yo guhagarika ibitero no gusubira mu biganiro, cyangwa niba iyi ntambara izakomeza kwaguka mu karere.