Ni icyizere yongeye kugirirwa mu matora
y’abayobozi b’inzego z’ibanze yabaye ku wa Gatandatu, tariki ya 24 Ukwakira
2026, aho abaturage bo mu gihugu hose batoye abayobozi bazabegera, bakabafasha
gukemura ibibazo byabo no gushyira mu bikorwa gahunda zigamije iterambere
ry’imibereho yabo.
Intore Tuyisenge usanzwe ari Umuyobozi wa
Rwanda Music Federation, Urugaga rw’Abahanzi ba Muzika mu Rwanda, abona ko
kugira izindi nshingano ku rwego rw’igihugu bitagomba kuba impamvu yo
kwibagirwa inshingano umuntu afite aho atuye. Ahubwo, asanga buri wese ashobora
gutanga umusanzu mu iterambere ry’aho aba, atitaye ku zindi nshingano afite.
Mu kiganiro yagiranye na InyaRwanda, Intore
Tuyisenge yavuze ko kuba afite inshingano mu rwego rw’umuziki nyarwanda
bitamubuza kugira uruhare mu miyoborere y’aho atuye no gufasha mu kubaka
igihugu.
Yagize ati “Kuba ufite izindi nshingano ku
rwego rw'Igihugu cyangwa urundi rwego runaka ntibyakubuza gutanga umusanzu wawe
aho utuye, cyane cyane mu miyoborere no guha icyerekezo kirambye aho utuye.”
Iyi ni imyumvire igaragaza ko iterambere
ry’igihugu ridashingira gusa ku bikorwa by’abayobozi bakuru cyangwa ku
nshingano abantu bafite ku rwego rw’igihugu, ahubwo rinashingira ku ruhare rwa
buri muturage mu kubaka umuryango we n’aho atuye.
Ku bwa Tuyisenge, Umudugudu ni imwe mu
nzego z’ingenzi mu miyoborere y’igihugu, kuko ari ho ibibazo by’abaturage
bimenyekanishirizwa hafi, hakamenyekana ibyo bakeneye ndetse hagafatirwa
ingamba zo kubikemura.
Yasobanuye ko iyo abayobozi b’Umudugudu
n’abagize komite zabo bakoze neza inshingano zabo, bifasha inzego zibakuriye
gushyira mu bikorwa gahunda za Leta zigamije imibereho myiza n’iterambere
ry’abaturage.
Ati “Abayobozi b'Umudugudu na Komite bafite
uruhare runini mu mitegekere y'Igihugu kuko ari bwo buyobozi bwegereye
abaturage, bityo iyo bukoze neza byorohera ubuyobozi bwisumbuye mu ishyirwa mu
bikorwa rya gahunda za Leta zigamije guteza imbere abaturage.”
Intore Tuyisenge ntabwo ari ubwa mbere
ahawe inshingano mu miyoborere y’inzego z’ibanze. Yatangiye urugendo
rw’ubuyobozi mu mwaka wa 2024, ubwo yatangiraga kuyobora Isibo, nyuma aza
kugirirwa icyizere cyo kuyobora Umudugudu wa Rwamaya.
Kuva icyo gihe, amaze kumara imyaka ibiri
mu nshingano z’ubuyobozi bw’inzego z’ibanze, aho yakomeje kugira uruhare mu
bikorwa by’aho atuye. Kuba yongeye gutorerwa kuyobora uyu Mudugudu bigaragaza
icyizere abaturage bamugiriye cyo gukomeza kubakorera.
Mu myaka itanu iri imbere, ateganya
gukomeza gukorana n’abaturage mu kubaka Umudugudu urangwa n’imiyoborere myiza,
ubufatanye n’iterambere. Yavuze ko yiteguye gukora ibishoboka byose kugira ngo
inshingano ahawe azikore neza, afatanyije n’abo ayobora.
Icyakora, kuri Tuyisenge, kuyobora
Umudugudu ntibikwiye kureberwa mu rwego rw’umwanya umuntu afite gusa, ahubwo
bikwiye gushingira ku bushobozi bwo kumenya ibibazo by’abaturage, kubumva no
gufatanya na bo kubishakira ibisubizo.
Kimwe mu byo Intore Tuyisenge yagarutseho
ni imyumvire ya bamwe mu bantu bagifata inshingano zo kuyobora Umudugudu
nk’izigenewe abantu badafite amashuri ahagije cyangwa badafite akazi.
Yagaragaje ko iyi myumvire ikwiye
guhinduka, ashimangira ko kuyobora abaturage ari inshingano ikomeye isaba
ubushobozi, ubwitange n’ubushake bwo gukorera abandi.
Ati “Abayobozi b'Umudugudu ntibakwiye kuba
abantu batize cyangwa abadafite akazi nk’uko benshi babyibwiraga kandi ariho
ibintu byose bikorerwa.”
Ku muntu ufite izindi nshingano nk’iza
Tuyisenge mu rwego rw’umuziki, kuyobora Umudugudu bisaba guhuza neza inshingano
zitandukanye, ariko bikaba n’amahirwe yo gushyira mu bikorwa indangagaciro zo
gukorera igihugu no gufasha abandi.
Amatora yabaye ku wa Gatandatu, tariki ya
24 Ukwakira 2026, yasize hatowe abayobozi b’Imidugudu 14.837 mu gihugu hose. Ni
abayobozi bafite inshingano zo kuba hafi y’abaturage, kubafasha gukemura
ibibazo byabo no guhuza ibikorwa by’iterambere n’ibikenewe mu midugudu
bayobora.
Kongera gutorerwa kuyobora Umudugudu wa
Rwamaya ni indi ntambwe mu rugendo rwa Intore Tuyisenge, uhuza ibikorwa bye mu
muziki n’inshingano zo gukorera abaturage.
Asoza agira ati “Nk’uko dutowe gahunda ari
Umuturage ku Isonga, abayobozi b'imidugudu bagenzi banjye turasabwa gukora
ibishoboka mu gukemura ibibazo by'abaturage no gufatanya nabo mu bikorwa
bibafasha kwiteza imbere mu mudugudu n'Igihugu muri rusange.”
