Mu rukundo, abantu benshi bashaka kumenya amayeri yabafasha gukurura uwo bakunze. Hari abibanda ku magambo meza, abandi ku mpano, mu gihe bamwe batekereza ko kugira amafaranga cyangwa isura nziza bihagije.
Nyamara, umubano mwiza ntushingira kuri ibyo gusa. Icy’ingenzi ni ukwereka uwo mukundana ko umubona nk’umuntu wihariye, ukamwumva kandi ukamwubaha.
Dore intambwe esheshatu zishobora kugufasha kubaka umubano ukomeye n’umugore ukunda:
1. Banza umumenye mbere yo gushaka ko akumenya
Abagabo bamwe iyo bashaka gukurura umugore bahita batangira kuvuga ibyo bafite, ibyo bagezeho n’impamvu akwiriye kubakunda. Ariko rimwe na rimwe, icy’ingenzi ni ukubanza kumutega amatwi.
Mubaze ibibazo bifite icyo bisobanuye, umenye ibyo akunda, ibyo yifuza n’ibimushimisha. Ikirenze ibyo, ujye wibuka ibyo yakubwiye mu biganiro byanyu.
Iyo umugore abonye ko wibuka utuntu tumwe yakubwiye, yumva ko utamufata nk’umuntu uwo ari we wese, ahubwo ko umwitayeho by’ukuri.
2. Jya ugira gahunda kandi wubahirize ibyo wavuze
Kuvuga ko umukunda cyangwa ko umwitayeho biroroshye. Ikigora ni ukubigaragaza mu bikorwa. Niba mwemeranyije guhura, jya wubahiriza igihe. Niba wamusezeranyije ikintu ushoboye gukora, gerageza kugikora.
Umuntu wubahiriza ijambo rye agaragaza ko yizewe. Kandi icyizere ni kimwe mu bintu by'ingenzi mu ntangiriro no mu iterambere ry’umubano.
3. Iyo muri kumwe, muhe umwanya wawe wose
Telefoni ishobora kuba imwe mu mbogamizi zikomeye mu biganiro by’abantu babiri. Iyo muri kumwe, gerageza kuyishyira ku ruhande, umutege amatwi kandi urebe mu maso ye igihe muganira.
Kumuha umwanya wawe wose bishobora kumwereka ko ibyo avuga bifite agaciro kuri wowe. Rimwe na rimwe, kwitabira umuntu by’ukuri biruta amagambo menshi y’urukundo.
4. Banza wiyubake
Ntukishingikirize ku mugore ngo abe ari we uguha icyerekezo cy’ubuzima. Umugabo ufite intego, akazi cyangwa ibyo ahugiramo, kandi uhora ashaka gutera imbere, aba afite byinshi azana mu mubano.
Kwiyubaka ntibivuze gushaka kuba umukire cyangwa umuntu utunganye mbere yo gukunda. Bisobanura kumenya aho ushaka kugera no gukora uko ushoboye kugira ngo ubuzima bwawe bugire icyerekezo.
5. Mumenyeshe icyo ushaka nta gahato
Kutamenya icyo ushaka bishobora gutera urujijo mu mubano. Niba ushaka kumumenya byimbitse, mubwire. Niba ushaka umubano w’igihe kirekire, ubigaragaze mu buryo busobanutse.
Ariko kubivuga ntibigomba kuba ugushyira igitutu kuri we. Umubano mwiza wubakwa n’abantu babiri bemera kuwugiramo uruhare ku bushake. Kuba usobanutse kandi wubaha amahitamo ye ni ikimenyetso cy’ubukure mu rukundo.
6. Jya uba umwizerwa buri gihe
Igikorwa kimwe cyiza gishobora gutuma umugore agutekerezaho, ariko imyitwarire ya buri munsi ni yo yubaka icyizere. Ntukagerageze kumushimisha cyane umunsi umwe ngo ejo uhinduke undi muntu. Ahubwo jya uba wa muntu umwe, wizerwa kandi uhora amwereka ko ibyo uvuga bihura n’ibyo ukora.
Icyizere nticyubakwa mu munsi umwe. Gishobora gufata igihe, ariko iyo kimaze kubakwa, kiba imwe mu nkingi zikomeye z’umubano. Kwigarurira umutima w’umugore si ugukoresha amayeri yo kumutera kugukunda ku gahato. Ni ukumwereka uwo uri we, kumwubaha, kumutega amatwi no kuba umwizerwa.
Urukundo nyarwo ntirushingira ku muntu umwe uhatanira “gutsinda” undi. Rushingira ku bantu babiri bahitamo kubana, bakizerana, bakubahana kandi bakomeza kubaka umubano wabo buri munsi.