Irushanwa ry'Igikombe cy'Isi rya 2026 ryabaye intsinzi ikomeye kuri Adidas mu rugamba rw'ubucuruzi ihanganyemo na Nike, nyuma y'uko amakipe yambikwa na yo, ari yo Argentina na Espagne, yombi ageze ku mukino wa nyuma.
Ibi byabaye nyuma y'uko Argentina isezereye u Bwongereza bukorana nuru ruganda muri 1/2, bikakarangira Nike ibura amahirwe yo kugira ikipe ihatanira igikombe ku mukino wa nyuma.
Muri iri rushanwa, Adidas yari yambitse amakipe 14 y'ibihugu, mu gihe Nike yari ifite 12. Nubwo Nike yari ifite amakipe akomeye arimo u Bwongereza n'u Bufaransa, yose yananiwe kugera ku mukino wa nyuma.
Kuba Adidas ari yo yambitse amakipe yombi akina umukino wa nyuma ni amahirwe akomeye yo kwamamaza ibicuruzwa byayo ku rwego rw'Isi, cyane ko uyu mukino ukurikirwa n'abarenga miliyari ku Isi hose.
Ndetse Ibi bibaye mu gihe Nike ikomeje guhangana n'ibibazo by'ubucuruzi birimo kugabanuka k'umugabane wayo ku isoko ndetse n'igabanuka ry'igurisha cyane cyane ku isoko ry'u Bushinwa.
David Swartz, umusesenguzi wa Morningstar, yavuze ko nubwo Adidas yungutse kwamamazwa n'Igikombe cy'Isi, ikibazo nyamukuru Nike ifite kiri mu guhanga inkweto nshya zikurura abakiliya, kugenzura ububiko no kongera kuzamura ubucuruzi mu Bushinwa.
Gusa Nike yo ikavuga ko nubwo yifuza ko amakipe n'abakinnyi ifatanya na bo bagera kure hashoboka, intego yayo mu mupira w'amaguru itashingira gusa ku kugera ku mukino wa nyuma w'Igikombe cy'Isi.
Mbere y'uko irushanwa ritangira, Nike yari yashyize hanze inkweto nshya za Mercurial, inakorana n'abahanga mu myambarire ndetse inashyira ibicuruzwa bishya mu maduka arenga 5,000 ku Isi.
Yatangije kandi ubukangurambaga bwiswe "Rip the Script", bwitabiriwe n'ibyamamare birimo Kylian Mbappé na Kim Kardashian, bukaba bwararebwe inshuro zirenga miliyari 1.5 mu cyumweru cya mbere cy'Igikombe cy'Isi.
Yanatangaje ko imyambaro y'amakipe y'ibihugu yagurishijwe inshuro 2.5 kurusha uko byari bimeze muri Qatar mu 2022.
Nubwo bimeze bityo, abasesenguzi bavuga ko Adidas ari yo iri kuyobora isoko ry'inkweto n'imyambaro ya siporo muri iki gihe. Ubushakashatsi bwa M Science bwerekana ko muri Kamena 2026, umugabane wa Adidas ku isoko ry'inkweto wazamutse ugera kuri 19.2%, uvuye kuri 16% wariho umwaka ushize, mu gihe Nike yakomeje gutakaza abakiliya.
Mu mezi ya mbere ya 2026, Adidas kandi yatangaje ko ibicuruzwa bifitanye isano n'Igikombe cy'Isi byinjije amafaranga angana na miliyoni 250 z'Ama-Euro, kandi yiteze kongera kunguka andi angana na yo mu gihembwe gikurikira.