Intambara nshya hagati ya Etihad Airways na Premier League nyuma yo guhamya Man City amakosa

Ku wa Kabiri, Premier League yatangaje ko akanama kigenga kari kamaze igihe kagenzura ibirego Manchester City yashinjwaga, kayihamije amakosa yose yashinjwaga.

Mu mwanzuro w’akanama, Manchester City yahamwe n’icyaha cyo kuba yaragaragaje amafaranga arenga miliyoni 900 z’amapawundi mu buryo butari bwo, binyuze mu masezerano y’ubucuruzi yasinywe hagati ya 2009 na 2018.

Muri iyo myaka, Manchester City yatwaye ibikombe umunani, birimo bitatu bya Premier League.

Akanama kasanze iyi kipe yarongereye amafaranga yinjizaga ku mpapuro akoresheje amasezerano y’ubucuruzi yiswe ay’ibihimbano, aho amafaranga yo muri ayo masezerano yavugwaga ko yatangwaga n’abaterankunga, ariko mu by’ukuri akaba yaraturukaga kuri ba nyiri Manchester City.

Nubwo Etihad Airways itavuzwe mu izina mu mwanzuro washyizwe ahagaragara, iki kigo cy’indege cyo muri Abu Dhabi kimaze imyaka myinshi ari umuterankunga wa Manchester City. Ubufatanye bwacyo n’iyi kipe bwatangiye mu 2009, bukubiyemo izina rya sitade, imyambaro y’ikipe ndetse n’ikigo cy’imyitozo.

Manchester City bivugwa ko iteganya kujuririra uyu mwanzuro, nyuma yo guhabwa kugeza ku wa Gatanu kugira ngo igaragaze icyo iwuvugaho.

Etihad Airways yanenze Premier League

Nyuma y’uko Premier League itangaje umwanzuro w’akanama kigenga, Etihad Airways yasohoye itangazo rikomeye ivuga ko itigeze igira uruhare mu masezerano ayo ari yo yose atubahirije amategeko.

Etihad yavuze ko Premier League itigeze igirana na yo ibiganiro muri iki gikorwa, ndetse ko itigeze ihabwa amahirwe yo kwisobanura cyangwa gutanga amakuru yari gufasha mu gusobanura neza ibirebana n’ayo masezerano.

Umuvugizi wa Etihad yagize ati: “Etihad irahakana ku buryo budasubirwaho umwanzuro, igitekerezo cyangwa ikindi kintu cyose cyatuma umuntu atekereza ko iyi sosiyete yaba yarigeze igira uruhare mu masezerano y’ubucuruzi adakurikije amategeko.”

Etihad kandi yavuze ko uburyo Premier League yagejeje ku baturage amakuru ajyanye n’uyu mwanzuro bwagize ingaruka mbi ku izina ryayo, nubwo itavuzwe mu mwanzuro washyizwe ahagaragara.

Iyi sosiyete yavuze ko itigeze ihabwa umwanya wo gutanga amakuru cyangwa kugira uruhare mu gusuzuma ibimenyetso byashingiweho mu gufata umwanzuro ushobora kuyigiraho ingaruka.

Umuvugizi wayo yakomeje agira ati: “Etihad ihangayikishijwe cyane n’uburyo iki kibazo cyashyizwe ahagaragara. Kubura ibisobanuro bihagije no gushyiraho umucyo, ndetse no gutangaza amakuru amwe n’amwe gusa, byagize ingaruka mbi kuri Etihad nubwo iyi sosiyete itavuzwe mu mwanzuro washyizwe ahagaragara.”

Etihad yavuze ko Premier League igomba kubazwa inshingano ku ngaruka zatewe n’uburyo aya makuru yatangajwe.

Etihad ishobora kujyana Premier League mu nkiko

Etihad Airways yatangaje ko igiye kugisha inama abunganira mu mategeko kugira ngo irebe inzira yakoresha mu kurengera inyungu zayo, harimo no kuba yakwitabaza inkiko.

Nubwo bimeze gutyo, iyi sosiyete yongeye kwemeza ko ikomeje gushyigikira Manchester City mu gihe iyi kipe iri kujuririra umwanzuro w’akanama kigenga.

Yagize iti: “Dushyigikiye iyi kipe, abafana bayo ndetse n’umuryango mugari wa Etihad mu gihe Manchester City ikomeje kujuririra imyanzuro y’akanama binyuze mu nzira zemewe.”

Etihad yakomeje ivuga ko izashaka inama mu by’amategeko ku mahitamo n’ingamba yakoresha mu kurengera inyungu zayo.

Manchester City ishobora guhanishwa iki?

Kugeza ubu ntiharamenyekana ibihano Manchester City ishobora guhabwa nyuma yo guhamwa n’aya makosa y’imari.

Mu bihano bishobora gutekerezwa harimo gukurwaho amanota, kubuzwa kugura abakinnyi ndetse no kumanurwa mu cyiciro cya kabiri.

Kandi birashoboka ko Manchester City yakwamburwa bimwe mu bikombe yatwaye mu myaka ivugwa muri uru rubanza.

Muri icyo gihe, iyi kipe yatwaye ibikombe bitatu bya Premier League, bitatu bya League Cup, kimwe cya FA Cup n’icya Community Shield.

Manchester City kandi bivugwa ko izakomeza inzira yo kujuririra uyu mwanzuro, bityo ibijyanye n’ibihano izahabwa bikazamenyekana nyuma y’uko inzira y’ubujurire isojwe.