Amateka ye yakomeje gukurura amatsiko y’abantu n’abashakashatsi, nubwo kugeza ubu nta gisobanuro gihamye cyemejwe n’ubuvuzi gisobanura neza uko byagenze.
Twifashishije amakuru dukesha PubMed, urubuga rw’Ikigo cy’Igihugu cya Leta Zunze Ubumwe za Amerika gishinzwe amakuru y’ubuvuzi (NLM), n’inyandiko y’ubushakashatsi ku mateka y’ubuvuzi yasohotse mu 1995.
Uko byatangiye
Karolina Olsson yavukiye ku kirwa cya Oknö, mu majyepfo ya Suède, ku wa 29 Ukwakira 1861. Yari afite imyaka 14 mu 1876, ubwo inkuru ye idasanzwe yatangiraga.
Nk’uko amakuru y’amateka abigaragaza, ku wa 18 Gashyantare 1876, Karolina yakomeretse mu mutwe nyuma yo kunyerera ku rubura. Nyuma y’iminsi mike, yatangiye kwinubira uburibwe bukabije bw’iryinyo.
Ku wa 22 Gashyantare 1876, nyina yamwohereje mu cyumba cye kuryama kugira ngo aruhuke. Icyatunguranye ni uko Karolina atongeye gukanguka nk’uko byari bisanzwe, bituma umuryango we utangira gushaka ubufasha bw’abaganga.
Umuryango we wamwitayeho imyaka myinshi
Mu gihe cyakurikiyeho, Karolina yakomeje kuba mu rugo rw’umuryango we, aho nyina yamwitagaho. Amakuru amwe y’amateka avuga ko yamuhaga amata n’amazi arimo isukari kugira ngo akomeze kubaho.
Abaganga batandukanye baje kumusuzuma, ariko ntibashoboye gutanga igisobanuro cyemeza neza ikibazo yari afite.
Mu 1892, Karolina yajyanywe mu bitaro byo mu mujyi wa Oskarshamn, aho yamaze hafi ukwezi abaganga bagerageza kumenya icyo arwaye, no kumuvura.
Inyandiko z’ubuvuzi z’icyo gihe zigaragaza ko abaganga bamukoreye isuzuma ryananiwe kugaragaza impamvu yari agisinziriye, ndetse ntiryasobanuye uko byitwa mu mvugo z’ubuvuzi.
Nubwo bagerageje kumuvura, yasubijwe mu rugo iwabo ataragarura ubwenge, nk’uko izo nyandiko zibivuga. Icyakora, hari ikibazo gikomeye cyakomeje kwibazwa: ese koko yari amaze imyaka yose asinziriye, cyangwa yari afite ikindi kibazo cy’ubuzima kitarabasha gusobanurwa neza?
Yongeye gukanguka afite imyaka 46
Ku wa 3 Mata 1908, Karolina bivugwa ko yongeye kugarura ubwenge, nyuma y’imyaka isaga 32 kuva inkuru ye itangira.
Icyo gihe yari afite imyaka 46. Amakuru yanditswe nyuma y’icyo gihe avuga ko yari afite intege nke, kandi ko mu minsi ya mbere byamugoraga kumenyera urumuri no kuvuga neza.
Bivugwa kandi ko atahise amenya bamwe mu bavandimwe be, kubera igihe kirekire yari amaze atagaragara mu buzima n’ibikorwa bisanzwe by’umuryango.
Iyi nkuru yatumye abanyamakuru n’abandi bantu baturutse hirya no hino bashishikazwa no kumenya uko byari byagenze.
Karolina yaje gukomeza kubaho, apfa ku wa 5 Mata 1950, afite imyaka 88, azize guturika kw’imitsi ijyana amaraso mu bwonko, nk’uko inyandiko y’ubushakashatsi yasohotse mu 1995 ibivuga.
Ese koko yamaze imyaka 32 asinziriye?
Iki ni cyo kibazo gikomeye gikikije inkuru ya Karolina Olsson.
Ubushakashatsi bwiswe Soverskan på Oknö, bwasohotse mu 1995 mu kinyamakuru cy’amateka y’ubuvuzi cyo mu majyepfo ya Suède, bwasesenguye inkuru ye n’inyandiko zo kwa muganga zari zibitswe mu bitaro bya Oskarshamn.
Abanditsi bagaragaje ko isuzuma ryari ryarakorewe Karolina mu 1892 ritari rihamye. Banasubiyemo uko inkuru ye yari yaratangajwe n’umuganga w’indwara zo mu mutwe witwa Harald Fröderström mu 1912.
Nubwo hari inkuru nyinshi zivuga ko Karolina yamaze imyaka 32 asinziriye, ntibihagije kwemeza ko yari mu bitotsi bisanzwe muri icyo gihe cyose.
Nta bisobanuro by’ubuvuzi byemejwe neza byagaragaje uko umubiri we washoboraga kumara igihe kingana uko asinziriye. Kugeza ubu, inkuru ya Karolina Olsson iracyari imwe mu nkuru z’amateka y’ubuvuzi zikurura amatsiko.