Icyakora, nyuma y’iminsi ine gusa, ubwo bwato bwagonganye n’ibuye ry’urubura mu Nyanja ya Atlantika y’Amajyaruguru burarohama, hapfa abantu barenga 1,500.
Mu bantu bari muri urwo rugendo rutarangiye uko byari byitezwe harimo Joseph Philippe Lemercier Laroche, Umunya-Haiti wari injeniyeri, uzwi nk’umwirabura wenyine wagaragajwe mu nyandiko z’amateka ko yari mu bagenzi ba Titanic mu rugendo rwayo rwa mbere.
Inkuru ye yaje kumenyekana cyane nyuma y’imyaka myinshi, ubwo Dr Carlette Norwood, umushakashatsi mu by’imibanire y’abantu wavukiye i Washington muri Leta Zunze Ubumwe za Amerika, yayivumburaga ubwo yasuraga inzu ndangamurage y’amateka y’ubwikorezi bwo mu mazi i Liverpool mu Bwongereza.
Joseph Laroche yari muntu ki?
Joseph Philippe Lemercier Laroche yavukiye i Cap-Haïtien muri Haiti ku wa 26 Gicurasi 1886. Yakomokaga mu muryango wari ufite amateka akomeye muri icyo gihugu, kuko yari umwuzukuruza wa Jean-Jacques Dessalines, umwe mu bayoboye urugamba rwo kubohora Haiti ku butegetsi bw’abakoloni b’Abafaransa, waje kuba umuyobozi wa mbere w’igihugu cyigenga cya Haiti.
Mu 1901, afite imyaka 15, Laroche yagiye mu Bufaransa gukomerezayo amashuri. Yize ibijyanye n’ubwubatsi n’ubuhanga mu by’imashini, aza kubona impamyabumenyi mu bijyanye n’ubwubatsi.
Nubwo yari yarize kandi afite ubumenyi bwari bwashoboraga kumufasha kwiteza imbere, ubuzima bwo mu Bufaransa ntibwamworoheye. Icyo gihe ivangura rishingiye ku ibara ry’uruhu ryari rikigaragara, kandi Laroche yagiye ahura n’imbogamizi mu gushaka akazi no kugakomeza kuhaba.
Nk’uko Dr Carlette Norwood yabitangarije ikinyamakuru BBC, Laroche yahuye n’ivangura rikomeye mu gihe yabaga mu Bufaransa. Yavuze ko hari imyumvire y’ivangura yakomeje kugaragara muri sosiyete y’Abafaransa, igatuma ubuzima bw’abirabura butoroha.
Urukundo rwa Joseph Laroche na Juliette Lafargue
Mu gihe yari mu Bufaransa, Laroche yahuye na Juliette Lafargue, umugore w’Umufaransakazi, barakundana nyuma baza kurushinga mu 1908.
Urukundo rwabo rwabaye mu bihe imibanire y’abantu bafite amabara y’uruhu atandukanye yashoboraga guhura n’imbogamizi zishingiye ku ivangura. Icyakora, umuryango wa Juliette ntiwamutereranye, ndetse hari ibimenyetso birimo ibaruwa yandikiye se bigaragaza ko yari azi umukwe we.
Dr Norwood yavuze ko se wa Juliette yitaye cyane ku burezi bwa Laroche kurusha uko yibandaga ku ibara ry’uruhu rwe.
Joseph na Juliette babyaranye abakobwa babiri. Uwa mbere yitwaga Simone Marie Anne Andrée Laroche, wavutse mu 1909, naho uwa kabiri akitwa Louise Laroche, wavutse mu 1910.
Nubwo yari yarize akabona impamyabumenyi, Laroche yagize ikibazo cyo kubona akazi gahoraho. Nk’uko amakuru yatangajwe na BBC abivuga, rimwe na rimwe yirukanwaga ku kazi cyangwa agahura n’ivangura mu kazi yabaga yabonye.
Ibi byatumye atangira gutekereza ku gusubira muri Haiti, igihugu yavukiyemo, kugira ngo ashobore kubaka ubuzima bushya ari kumwe n’umuryango we.
Bahisemo kuva mu Bufaransa
Mu 1912, Joseph na Juliette bafashe icyemezo cyo gusubira muri Haiti. Icyo gihe Juliette yari atwite umwana wabo wa gatatu.
Laroche yifuzaga ko uwo mwana yazavukira muri Haiti aho gukomeza kubaho mu Bufaransa, aho yari amaze igihe ahura n’imbogamizi zishingiye ku ivangura. Yari kandi akumbuye nyina n’igihugu cye.
Nubwo Juliette yari ahangayikishijwe no gusiga se wari yarapfakaye mu Bufaransa, icyemezo cyo kwimuka cyaje gufatwa nyuma y’uko umuryango umenye ko Joseph ashobora kubona akazi muri Haiti.
Cincinnatus Leconte, wari perezida wa Haiti icyo gihe kandi akaba yari afitanye isano n’umuryango wa Laroche, yari yamufashije kubona amahirwe yo gukora akazi ko kwigisha imibare.
Ku bw’iyo mpamvu, umuryango watangiye gutegura urugendo rwo gusubira iwabo.
Impamvu umuryango wa Laroche waje kugendera muri Titanic
Mu by’ukuri, Joseph Laroche n’umuryango we ntibari barateganyije kugendera muri Titanic. Nyina wa Joseph yari yarabashakiye amatike yo mu cyiciro cya mbere mu bundi bwato bwitwaga SS France, kugira ngo basubire muri Haiti mu buryo bwiza.
Icyakora, bamaze kumenya ko muri ubwo bwato abana batari bemerewe gusangira amafunguro n’ababyeyi babo, bahisemo guhindura gahunda. Basubije amatike bari bafite maze bafata amatike yo mu cyiciro cya kabiri muri Titanic.
Icyemezo cyabo cyatumye bajya mu bwato bwaje kurohama mu mpanuka ikomeye yahitanye abantu benshi.
Ku wa 10 Mata 1912, Joseph, Juliette n’abakobwa babo bombi binjiye muri Titanic nk’abagenzi bo mu cyiciro cya kabiri.
Ijoro Titanic yarohamye
Ku wa 14 Mata 1912, ahagana saa 23:40, Titanic yagonganye n’ibuye ry’urubura mu Nyanja ya Atlantika y’Amajyaruguru. Ubwo amazi yatangiraga kwinjira mu bwato, abagenzi batangiye gushakisha uko bakwihutira kugera ahari ubwato bwo kubakiza.
Joseph Laroche yakanguye umugore we, bakusanya ibintu bike by’agaciro bari bafite, maze bajyana abakobwa babo bari bagisinziriye ku gice cyo hejuru cy’ubwato.
Juliette, wari utwite, n’abakobwa babo babiri bashoboye kwinjira mu bwato bwo kubakiza, bararokoka. Bukeye bwaho, ku wa 15 Mata 1912, batabawe n’ubwato bwa RMS Carpathia bwaje gufasha abarokotse iyo mpanuka.
Joseph we ntiyagaragaye mu barokotse. Umurambo we ntiwigeze uboneka, kandi kugeza ubu ntiharamenyekana neza ibyamubayeho mu minota ya nyuma y’ubuzima bwe.
Amakuru yo mu nyandiko z’amateka ya Titanic agaragaza ko yari umwe mu bagenzi bo mu cyiciro cya kabiri bahitanywe n’iyo mpanuka.
Inkuru ye yongeye kumenyekana nyuma y’imyaka myinshi
Nubwo Joseph Laroche yapfuye mu 1912, inkuru ye yamaze igihe itazwi cyane ugereranyije n’iz’abandi bantu bazwi mu mateka ya Titanic.
Dr Carlette Norwood ni umwe mu bantu bagize uruhare mu kongera kuyimenyekanisha. Nyuma yo kumenya amateka ye ubwo yasuraga inzu ndangamurage y’amateka y’ubwikorezi bwo mu mazi i Liverpool, yaje kwandika no kuyobora ikinamico ishingiye ku buzima bwa Laroche.
Mu kiganiro yagiranye na BBC, Norwood yavuze ko inkuru nk’iya Laroche ifite akamaro kuko yerekana ko amateka y’abirabura atagomba kugarukira ku bucakara n’ivangura gusa.
Yagaragaje ko hari n’abirabura bize, bagira uruhare mu iterambere kandi bakagira inzozi zo kubaka ubuzima bwiza, nubwo hari ibihe bahuraga n’imbogamizi zikomeye.
Ku bwe, inkuru ya Laroche ni uburyo bwo guhuza abantu n’amateka y’abababanjirije, bakamenya ko mu mateka y’isi harimo n’ubuzima bw’abantu b’abirabura bwari bufite agaciro ariko ntibuhabwe umwanya uhagije.