Inkumi z’ikimero, aberekanamideri bakomeye bari mu baryoheje ibirori bya Video Vixen Awards 2023 – AMAFOTO

Mu ijoro ryo kuri uyu wa Gatandatu, kuri Onomo Hotel habereye ibirori byatangiwemo ibihembo bya Video Vixen Awards 2023 byatanzwe ku nshuro ya mbere mu Rwanda.

Ibi bihembo bihemba abari bagaragara mu mashusho y’indirimbo zitandukanye byahurije hamwe inkumi zambaye imyambaro itangaje, aberekanamideri babarizwa muri kompanyi zimurika imideri zitandukanye, n’ibindi byamamare mu ngeri zose.

Kuva ku isaha ya saa Moya z’ijoro [07:00 PM] inkumi zikunzwe ku mbuga nkoranyambaga, kompanyi zikomeye mu Rwanda mu kumurika imideri, n’ibindi byamamare bari bamaze gufata ibyicaro, baryoherwa n’umuziki wa The Burner Band igizwe n’abanyeshuri biga umuziki ku Ishuri ry’Umuziki rya Nyundo.

Ku ikubitiro aberekanamideri babarizwa muri kompanyi za Rifi Fashion Agency, Fatako Fashion Agency na Imena Fashion nibo bafunguye ibi birori, bamurika imideri igezweho yakozwe n’abanyamideri batandukanye, batambukaga ku itapi itukura bagenda basimburana kugeza basoje.

Bamwe muri bo baganiriye na InyaRwanda bavuze ko uyu mwuga bakora, ukunzwe kwikomwa na bamwe ari nk’indi myuga, ko ushobora kugutunga ukagera ku nzozi zawe. Bavuga ko kandi ibivugwa ko abawukora bataye umuco kubera imyambarire bakwiye guhindukira bakamenya ko imyuga yose itakorwa kimwe kandi ko bo icyo bakora ari kwerekana imideri y’ubwoko bwose.

Ibi bihembo byatanzwe mu byiciro icyenda harimo “Best Dressed Video Vixen " cyatwawe na Ange Dababy wagaragaye mu ndirimbo nka “Nyoola " ya Bruce Melodie, “No " na “Iyallah " za Okkama n’izindi.

Hari icya “Best Dancer Video Vixen " cyatwawe na Divine Uwa. Uyu yagaragaye mu mashusho y’indirimbo ‘Agafoto’ ya Phil Peter, Marina, P Fla, Aime Bluestone na Fireman, ‘Umuana’ ya Kevin Kade, ‘Imashini’ ya Mico, ‘Briana’ ya Niyo Bosco n’izindi.

Hari icya “Best Popular Video Vixen " cyatwawe na Tatiana. Uyu mukobwa wakundanye na Papa Cyangwe bakaza gushwana yagaragaye mu ndirimbo ziganjemo iz’uyu muhanzi nka “Sana " n’izindi.

Igihembo cya “Best New Video Vixen " cyahawe Kundwa Shaddy. Uyu mukobwa w’imyaka 23 we agaragara mu ndirimbo nka “Ku Bicu " ya Active , “Iwawe " ya Eesam, “Agasenda " ya Social Mula na Alto , “Igorofa " ya Possible na Kivumbi King, “Nyoola " ya Bruce Melodie na Eddy Kenzo, “Haso " ya Kenny Sol n’izindi.

Umukundwa wamamaye ku mbuga nkoranyambaga nka Cadette we yabaye “Best Photogenic Video Vixen ". Uyu mukobwa yagaragaye mu ndirimbo zirimo iya Platini yise “Jojo ", iya K8 Kavuyo yise “Njonogo " n’izindi.

“Best Inspirational Video Vixen " yahawe Tonny Boo, mu gihe igihembo cya “Best Decade Video Vixen " cyatwawe na Cycy Beauty wagaragaye mu ndirimbo zirimo ‘Kk 509 St’ ya Andy Bumuntu na ‘We Don’t Care’ ya Meddy.

“Best Creative Video vixen " yabaye Alice Amike wagaragaye muri “My Love " ya Kenny Sol, “My Bae " na “Like You " za Kevin Kade, “Breath " ya Christopher n’izindi; naho igihembo cya “Best Video Vixen " ari nacyo gihembo nyamukuru cyahawe Shema Sugar wagaragaye mu ndirimbo zirimo “Truth or Dare " ya Davis D.

Hari kandi igihembo cya “Best Decade Video Vixen " cyahawe na Cycy Beauty uzwi mu ndirimbo zitandukanye zirimo ‘Atansiyo " ya Platini P, ‘KK 905St’ ya Andy Bumuntu n’zindi zikomeye yagiye agaragaramo. Uyu mukobwa ntabwo yigeze agera ahabereye ibi birori.

Shema Sugar wari wambaye ipantaro yahinduwemo imyambaro yo ku gice cyo hejuru, niwe wegukanye igihembo nyamukuru cya  ‘Best Video Vixen’ ashyikirizwa iki gihembo na Samsung 250, iduka rizobereye mu kugurisha telephone zigezweho ku biciro binonegeye buri umwe.

Shema Sugar yegukanye igihembo nyamukuru cya “ Best Video Vixen " mu bihembo bya Video Vixen Awards 2023

Cadette Umukundwa uzwi mu ndirimbo za Platini P, yegukanye igihembo cya Best Photogenic Video Vixen mu bihembo bya Video Vixen Awards 2023

Alice Amike uzwi mu ndirimbo ‘Amadeni’ ya Mr Kagame, yegukanye igihembo cya Best Creative Video Vixen

Umukobwa uzwi nka Tonny Boo ku mbuga nkoranyambaga niwe wegukanye igihembo cya Best Inspirational Video Vixen

Kundwa Shaddy w’imyaka 23 niwe wegukanye igihembo cya Best New Video Vixen

Aberekanamideri barimo Freedom w'imyaka 12 n'abandi batandukanye bamuritse imideri yakozwe n’abanyamideri batandukanye



Ibi birori byitabiriwe n’inkumi zizwi ku mbuga nkoranyambaga, zari zambaye imyambaro itangaje

AMAFOTO: Dieudonne Murenzi / INYARWANDA