Iki gitaramo cyabaye mu ijoro ryo ku wa Gatanu, tariki ya 6
Ugushyingo 2026, cyitabirwa n’abakunzi b’umuziki bari baje kwihera ijisho uyu
muhanzi uzwiho kuririmba indirimbo ziganjemo iz’urukundo.
Igitaramo cyiswe ‘Code 250’ cyabereye ahitwa Black Panther
Kampala, kikaba cyari gitegerejwe na benshi nyuma y'uko cyari cyarasubitswe mu
ntangiriro za Kamena 2026, kubera ingamba zari zafashwe mu rwego rwo gukumira
ikwirakwira ry'icyorezo cya Ebola muri Uganda.
Iki gitaramo byari byitezweho guha abakunzi ba Christopher
bo muri Uganda umwanya wo kongera guhura na we, bakishimira indirimbo ze zimaze
imyaka myinshi zibafasha kwidagadura no kuryoherwa n'umuziki
Christopher ni umwe mu bahanzi nyarwanda bamaze igihe bubaka
izina mu muziki, by'umwihariko mu njyana ya R&B na Pop. Yatangiye urugendo
rwo gukora umuziki mu 2009, agenda azamuka kugeza ubwo abaye umwe mu baririmbyi
bazwiho kuririmba indirimbo zigaruka ku rukundo.
Yamenyekanye cyane binyuze mu ndirimbo zitandukanye, ariko
iyitwa ‘Iri Joro’ yakoranye na Danny Nanone ni imwe mu zamufashije kugera ku
bakunzi benshi b'umuziki. Iyi ndirimbo yamubereye intangiriro yo kurushaho
kwigarurira imitima y'abakunzi b'umuziki nyarwanda.
Nyuma yaho, yakomeje gusohora izindi ndirimbo zirimo
‘Habona’, ‘Ijuru Rito’, ‘Simusiga’, ‘Isezerano’, ‘Ko Wakonje’ na ‘Nibido’,
zatumye akomeza kugira umubare munini w'abamukurikira.
Mu bihe bitandukanye, Christopher yagiye akora ibikorwa
by'umuziki birimo ibitaramo n'imishinga mishya, bikamufasha gukomeza kubaka
umubano n'abakunzi be haba mu Rwanda no hanze yarwo.
Igitaramo cya ‘Code 250’ ni undi mwanya yabonye wo
kumenyekanisha umuziki we ku bakunzi be bo muri Uganda, nyuma y'igihe bari
bamaze bategereje ko azataramira i Kampala.
Christopher Muneza yatangiye kugaragaza impano yo kuririmba
akiri mu mashuri abanza, aho yaririmbaga muri korali y'abana, nyuma aza no
kwifatanya na korali y'abakuru. Mu 2009 ni bwo yatangiye kwandika indirimbo ze,
ariko ntiyahise azishyira hanze.
Mu 2009 kandi ni bwo yinjiye mu muziki nk'umwuga, nyuma yo
gutsinda irushanwa ryari ryateguwe na Producer Ishimwe Clement, washinze inzu
ifasha abahanzi ya Kina Music. Ibyo byamuhesheje amahirwe yo gukorana n'iyi nzu
yamufashije kumenyekana no kubaka izina rye.
Mu ndirimbo zamufashije kumenyekana harimo ‘Iri Joro’
yakoranye na Danny Nanone, ‘Babyumva’, ‘Ndabyemeye’, ‘Agatima’, ‘Urubavu’ na
‘Abasitari’.
Mu 2013, Christopher yashyize hanze Album ye ya mbere yise
‘Habona’, ayimurikira mu gitaramo cyabereye muri Kigali Serena Hotel ku wa 15
Gashyantare 2014. Iyi Album yari igizwe n'indirimbo 10, ikaba yaragize uruhare
mu gukomeza kumenyekanisha izina rye mu muziki nyarwanda.
Yitabiriye irushanwa rya Primus Guma Guma Super Star (PGGSS)
inshuro zitandukanye. Mu 2013 yabaye umwe mu bahanzi 11 bahataniraga igihembo
cy'iryo rushanwa, naho mu 2016 aza ku mwanya wa kabiri muri PGGSS ya Gatandatu.
Iri rushanwa ryamuhaye urubuga rwo kurushaho kwegera abakunzi b'umuziki hirya
no hino mu Rwanda.
Mu 2016, Christopher yatandukanye na Kina Music, ahitamo
gukomeza urugendo rw'umuziki yigenga. Icyo gihe hari abibazaga niba azakomeza
kugumana izina yari amaze kubaka, ariko yakomeje gukora indirimbo ze no gushaka
andi mahirwe yo kwagura umuziki we.
Mu 2017, yashyize hanze Album ya kabiri yise ‘Ijuru Rito’,
ayimurikira mu gitaramo cyabereye muri Kigali Convention Centre, muri Radisson
Blu. Iyi Album yakurikiwe n'indirimbo zakunzwe zirimo ‘Simusiga’ n'izindi
zamufashije gukomeza kugumana umwanya mu muziki nyarwanda.
Nyuma y'igihe atagaragara cyane mu bikorwa byinshi
by'umuziki, mu 2020 yagarukanye indirimbo ‘Breathe’, yakurikiwe n'izindi zirimo
‘Trainer’ yakoranye na DJ Miller na ‘Ibanga’ yakoranye na Zizou El Paccino. Mu
2021, indirimbo ‘Mi Casa’ na ‘Nibido’ zamufashije kongera kugarukana imbaraga
mu muziki, asubirana n'abakunzi bari bamaze igihe bategereje ibihangano bye.
Mu ntangiriro za 2026, Christopher yashyize hanze Album ya
gatatu yise ‘H₂O’, igizwe n'indirimbo icyenda. Iyi Album, izina ryayo
risobanura Harnessing Two Opposites, yayikoze agamije kugerageza uburyo bushya
bw'umuziki butandukanye n'ubwo yari asanzwe amenyerewemo. Yayihurijeho
n'abahanzi barimo Kivumbi King, Angell Mutoni, Massamba Intore na Spin.
Uretse ibikorwa bye byo mu Rwanda, Christopher yanagiye
akora ibitaramo mu bihugu bitandukanye, birimo ibyo yakoreye mu Burayi no muri
Leta Zunze Ubumwe za Amerika, mu rwego rwo kwagura umuziki we no kugera ku bakunzi
be bo hanze y'u Rwanda.
Igitaramo cya ‘Code 250’ yakoreye i Kampala ni indi ntambwe
mu rugendo rwe rwo gukomeza kugeza umuziki we ku bakunzi bo mu karere ka
Afurika y'Iburasirazuba.
Christopher Muneza yataramiye abakunzi be mu Mujyi wa
Kampala muri Uganda, mu gitaramo ‘Code 250’ cyabaye ku wa 6 Ugushyingo 2026,
aho yongeye kubasangiza indirimbo ze zakunzwe
Inkumi n'abasore bari bitabiriye igitaramo ‘Code 250’
bishimiye ibihe byiza bagiranye na Christopher, waririmbye indirimbo
zitandukanye zamufashije kubaka izina mu muziki nyarwanda
Christopher yerekanye ubuhanga bwe mu kuririmba no gusabana n'abakunzi be ku rubyiniro i Kampala, mu gitaramo cyari kimaze igihe gitegerejwe nyuma yo gusubikwa kubera icyorezo cya Ebola
