Ku wa Gatatu tariki ya 07 Gicurasi 2026 ni bwo hasojwe imikino y’umunsi wa 30, hasigara amakipe ya Rutsiro FC, AS Muhanga, Etincelles FC, Amagaju FC na AS Kigali akiri mu kaga ko kumanuka.
Muri ayo makipe, AS Muhanga na Rutsiro FC ni zo zabonye amanota ku munsi wa 30, mu gihe andi yose yatsinzwe bikomeza gushyira igitutu ku rugamba rwo kuguma mu cyiciro cya mbere.
Kuri ubu, AS Kigali iri ku mwanya wa 14 n’amanota 29, ikurikiwe n’Amagaju FC ya 15 n’amanota 28. Etincelles FC na AS Muhanga zombi zifite amanota 27, ariko Etincelles iri imbere gato ku mwanya wa 16, mu gihe AS Muhanga iri ku wa 17. Rutsiro FC ni yo iri ku mwanya wa nyuma n’amanota 26.
Mu mikino ine isigaye, AS Kigali ya Mbarushimana Shabani izahura na APR FC, Gicumbi FC, Rutsiro FC ndetse isoreze kuri Musanze FC i Kigali.
Amagaju FC yo izacakirana na Rutsiro FC, Al Merrikh SC, AS Muhanga ndetse na Mukura VS bahuje Stade ya Kamena.
Etincelles FC itozwa na Bizimungu Abdu “Bekeni” izahura na Gasogi United, Marine FC, Gorilla FC ndetse isoreze kuri Al Hilal Omdurman.
AS Muhanga y'umutoza Gatera Moussa yo ifite urugendo rukomeye ruzayihuza na Al Hilal SC, Kiyovu Sports, Amagaju FC na Marine FC.
Ku ruhande rwa Rutsiro FC iri ku mwanya wa nyuma, izahura n’Amagaju FC, APR FC, AS Kigali ndetse isoze shampiyona ikina na Bugesera FC kuri Stade ya Bugesera.
Umukino wa nyuma wa Shampiyona uzakinwa tariki ya 29.05.2026. Iyo tariki izasiga hari amakipe abiri yamanutse mu cyiciro cya kabiri. Mu mikino isigaye, buri kosa rizaba rifite uburemere bukomeye ku makipe ashaka kuguma muri BK Pro League, kuko amanota ari hafi cyane hagati y’aya makipe yose.