Inganzo Ngari batangiye gusigasira ibihangano bya cyera bahereye kuri ‘Urunyenyeri’ –VIDEO

Iyi ndirimbo nshya yasubiwemo na Inganzo Ngari yashyizwe hanze ku mugoroba wo kuri uyu wa Gatatu tariki ya 13 Gicurasi 2026, mu gihe iri torero rikomeje imyiteguro yo kwizihiza imyaka 20 rimaze rikora ibikorwa byo guteza imbere umuco nyarwanda.

Mu kiganiro na InyaRwanda, Umuyobozi wa Inganzo Ngari, Serge Nahimana yavuze ko bahisemo gusubiramo ‘Urunyenyeri’ kubera ubusobanuro ifite mu rugendo rw’iri torero ndetse n’umwanya iyi ndirimbo ifite mu mateka y’indirimbo gakondo.

Yagize ati: “Twasubiyemo iyi ndirimbo kuko iri mu ndirimbo twagiye dukoresha kuva kera mu mbyino, twumvanye ababyeyi na ba nyogokuru nk’indirimbo za kera tugomba gusigasira.”

Yakomeje asobanura ko bafite intego yo gutuma indirimbo za gakondo zongera kugera ku rubyiruko mu buryo bugezweho ariko zidatakaje umwimerere wazo.

Ati: “Ni byiza ko izi ndirimbo zigaruka mu buryo bucurangitse neza abantu bakazikunda, yemwe n’urubyiruko rubyiruka rukajya rubasha kuziyumvamo.”

Serge Nahimana yavuze kandi ko iki gikorwa kiri mu murongo mugari wo kwizihiza imyaka 20 Inganzo Ngari imaze ibungabunga umuco nyarwanda, aho bifuza ko ibihangano bya cyera bidakomeza kuzimira uko imyaka ishira.

Ati: “Muri iyi minsi twitegura kwizihiza imyaka 20, ni bimwe mu bikorwa nabyo bigomba gukomeza bijyanye no gusigasira ibihangano bya kera rimwe na rimwe tutamenya na ba nyirabyo, ariko biba bitagomba kuzimira kuko byahimbwe mu bihe bidafite uko byiyandikishwaho.”

Uyu muyobozi yashimangiye ko gusubiramo ibihangano by’abandi bidakwiye kujyana no kubyiyitirira, ahubwo ko bagamije kubiha ubuzima bushya banubahiriza ba nyirabyo.

Ati: “Ikindi tugasubiramo indirimbo tutahimbye tukanabivuga kuko kwiyitirira ibitari ibyawe byo ni amakosa. Ariko n’izo twahimbye tukazivuga kuko dufite abahanzi.”

Inganzo Ngari ni rimwe mu matorero amaze igihe agaragara nk’inkingi ikomeye mu gusigasira no guteza imbere umuco nyarwanda binyuze mu mbyino, indirimbo gakondo n’ibindi bikorwa by’umuco. Ryashinzwe mu 2006, rikaba rimaze imyaka 20 rikora ibikorwa bitandukanye byubakiye ku muco nyarwanda.

Mu rugendo rwaryo, iri torero ryagiye rikora ibitaramo bikomeye byasize amateka mu ruganda rw’umuco n’imyidagaduro mu Rwanda. Mu 2009 bakoze igitaramo ‘Inganzo Twaje’, mu 2010 bakora ‘Umuco kagozi ka Bugingo kabuza u Rwanda gucika’, mu 2011 bakora ‘Bwiza bwa Mashira budashira irora n’irongorwa’, naho mu 2013 bakora ‘Inzira ya Bene u Rwanda’.

Mu 2015 bakoze ‘Ruganzu I Bwimba’, mu 2018 bakora ‘Urwamazimpaka’, mbere y’uko ku wa 8 Kanama 2023 bakora igitaramo gikomeye bise ‘Ruganzu II Ndoli Abundura u Rwanda’, cyitabiriwe n’abakunzi benshi b’umuco nyarwanda.

Igitaramo giheruka cy’iri torero ni ‘Tubarusha Inganji’ cyabereye muri Kigali Conference and Exhibition Village hazwi nka Camp Kigali tariki 1 Kanama 2025, gihurirana n’Umunsi w’Umuganura.

Mu gihe Inganzo Ngari ikomeje urugendo rwo kwizihiza imyaka 20, gusubiramo ‘Urunyenyeri’ bishobora kuba intangiriro y’indi mishinga myinshi igamije kongera kuzamura no kwegera urubyiruko indirimbo za cyera zari zigiye kuzimira buhoro buhoro.

 Itorero Inganzo Ngari ryatangaje ko ryatangiye urugendo rwo gusubiramo indirimbo zo ha mbere mu rwego rwo kuzisigasira / Ifoto: Olivier Mugwiza

Inganzo Ngari bavuze ko bageze kure imyiteguro y’igitaramo cyo kwizihiza imyaka 20 ishize bari mu nganzo

KANDA HANO UBASHE KUREBA INDIRIMBO ‘URUNYENYERI’ YASUBIWEMO NA INGANZO NGARI