Ibi Pinto yabivuze nyuma
y’uko Manchester City ihamijwe kurenga ku mategeko agenga imari muri Premier
League mu gihe cy’imyaka icyenda. Iyi kipe iracyahakana amakosa yashinjwe,
ndetse ifite kugeza ku wa 2 Ukwakira 2026 kugira ngo itange ubujurire.
Pinto w’imyaka 37 ukomoka
muri Portugal, ni we washinze urubuga Football Leaks rwashyize hanze inyandiko
nyinshi z’ibanga zirebana n’imikorere y’amakipe n’abayobozi mu mupira
w’amaguru. Muri 2018, inyandiko zasohowe na Football Leaks binyuze mu kinyamakuru
cyo mu Budage, Der Spiegel, zagize uruhare mu gutuma Premier League itangira
iperereza kuri Manchester City.
Mu butumwa yashyize kuri
X ku wa Gatatu, Pinto yongeye kugaruka ku birego yari yaratangaje mu 2018,
avuga ko Infantino, wari Umunyamabanga Mukuru wa UEFA icyo gihe, yagize uruhare
mu gufasha Manchester City na Paris Saint-Germain (PSG) kwirinda ibihano bikomeye
bijyanye n’amategeko agenga imari y’amakipe, Financial Fair Play (FFP).
Raporo ya Der Spiegel yo
muri icyo gihe yavugaga ko ayo makipe yagiye agaragaza agaciro karenze k’ayo
yabonaga mu masezerano y’ubufatanye, mu rwego rwo kubahiriza ibisabwa na FFP.
Igihe ibyo bibazo byavugwaga, inyandiko zasohowe na Football Leaks zavugaga ko
Infantino yafashije mu gutegura ibihano byoroheje kuri ayo makipe muri 2014.
Pinto yagize ati: “Muri
2014, hari umuntu wari usanzwe azi ibitagenda neza byari bifitanye isano na
Manchester City.”
Yakomeje avuga ko
Infantino, wari Umunyamabanga Mukuru wa UEFA, yakoresheje ububasha bwe,
agasangira inyandiko z’ibanga ndetse akagira uruhare mu gutuma Manchester City
na PSG bihabwa ibihano by’amande gusa, aho guhabwa ibihano bikomeye
byashoboraga gutuma babuzwa gukina UEFA Champions League.
Pinto yavuze ko ibyo
byose byari byaragaragajwe n’inyandiko za Football Leaks.
Ati: “Nshingiye ku
bikorwa bye nk’Umunyamabanga Mukuru wa UEFA ndetse n’ibyo amaze gukora nka
Perezida wa FIFA, ku giti cyanjye mbona Gianni Infantino yabaye nk’indwara
ikomeye mu mupira w’amaguru kandi adakwiye kugira umwanya mu hazaza h’uyu
mukino.”
Icyakora, ibi ni ibirego
bya Pinto, kandi Infantino cyangwa FIFA ntibarabyemeye nk’ukuri. Igihe ibyo
birego byatangwaga bwa mbere, UEFA yavuze ko Umunyamabanga Mukuru wayo afite
ububasha bwo kugira uruhare mu biganiro n’izindi nzego mu gihe cy’iperereza,
harimo kugirana inama, kungurana ibitekerezo no gufasha inzego z’iperereza
kubona ibisubizo.
Infantino na we icyo gihe
yavuze ko inshingano ze zamusabaga kugirana ibiganiro, guhana inyandiko
n’ibitekerezo ku bibazo bitandukanye, ashimangira ko yabikoraga mu buryo
bw’umwuga kandi mu rwego rwo kurengera inyungu z’umupira w’amaguru.
BBC Sport yatangaje ko
yasabye FIFA kugira icyo ivuga ku magambo mashya ya Pinto.
Infantino ari gukomeza
guhura n’igitutu
Infantino kandi ari
gukomeza kunengwa nyuma y’uko gahunda yo kugurisha imigabane imwe muri FIFA
World Cup ishyigikiwe n’abashoramari yasubitswe.
UEFA yigeze gushinja
Infantino “imicungire mibi ikabije” ijyanye na gahunda ya FIFA Forward
Enterprise (FFE).
Ishyirahamwe ry’umupira
w’amaguru mu Busuwisi (SFV) na ryo riheruka gukuraho inkunga ryari risanzwe
riha Infantino, rivuga ko ryasubiye gusuzuma uko ibintu byagiye bihinduka mu
mezi ashize.
SFV yagize iti: “Icyemezo
cyafashwe nyuma yo kongera gusuzuma mu buryo bwimbitse ibyabaye mu mezi ashize.
Ku ruhande rwa SFV, hari ibintu bitandukanye bitera ibibazo by’ingenzi ku
bijyanye n’ubuyobozi, imiyoborere, gukorera mu mucyo ndetse n’uburyo ibyemezo
bifatwa muri FIFA.”
FIFA na UEFA zombi zifite
icyicaro mu Busuwisi.
Infantino ateganya
kongera kwiyamamariza kuyobora FIFA ku nshuro ya kane, mu matora ateganyijwe
muri Werurwe 2027. Abashaka guhatana na we bafite kugeza ku wa 18 Ugushyingo
2026 kugira ngo bashake umukandida uzahangana na we.