Iyi ndwara iterwa n'ihinduka ry'uturemangingo (genes) rituma umubiri utitabira neza umusemburo utuma umuntu akura (growth hormone), bigatuma abayifite badakura ngo barenge metero 1.2 z'uburebure. Ku isi hose habarurwa abantu bagera kuri 840 bayifite, benshi muri bo bakaba batuye mu Majyepfo ya Ecuador.
María Luisa Romero na mushiki we w'impanga María del Cisne, batuye mu mujyi wa Piñas, bavuga ko nubwo kubaho bafite iyi ndwara bitaborohera, bishimira ko ubuzima bwabo bushobora kugira uruhare mu guteza imbere ubushakashatsi buzafasha abantu benshi ku isi.
Ubushakashatsi bwamaze imyaka 22 bwakozwe n'impuguke mu bijyanye n'imisemburo, Dr. Jaime Guevara, bwerekanye ko mu bantu bafite Laron Syndrome bakurikiranywe, nta muntu wanduye diyabete wabonetse, naho kanseri yagaragaye ku muntu umwe gusa. Mu gihe kimwe, mu bantu bafite uburebure busanzwe bo muri ako gace, 17% barwaye kanseri naho 5% bagaragaza diyabete.
Abashakashatsi bemeza ko kuba aba barwayi bagira urugero ruto rw'umusemburo wa IGF-1 bishobora kuba bifasha kugabanya amahirwe yo kurwara kanseri, nubwo hakiri gukorwa ubushakashatsi bwinshi kugira ngo hamenyekane neza impamvu nyakuri.
Nubwo abantu benshi batekerezaga ko abafite Laron Syndrome badashobora kurwara kanseri, María del Cisne yaje gusanganwa kanseri yo mu mara mu myaka ibiri ishize, ibintu byibukije ko bagomba gukomeza kwita ku buzima no kwisuzumisha nk'abandi bose.