Amasaha ntabwo agenda kimwe hirya no hino ku Isi bitewe n’aho ibihugu biherereye, bigatuma bimwe byinjira ku itariki runaka mbere y’ibindi.
Ibyo bigenda bibarwa hagendewe ku Isaha Ngengamasaha (GMT). U Rwanda ruri imbere amasaha abiri ugereranyije n’Isaha Ngengamasaha. Bivuze ko iyo i Kigali ari Saa Sita (12:00), kuri GMT biba ari Saa Yine (10:00).
Igihugu cyabaye icya mbere mu kwinjira mu 2026 ni Kiribati kiri mu Mugabane wa Oceania, kuko cyawinjiyemo saa 10:00 kuri GMT, mu gihe ahandi bari bakiri ku itariki ya 31 Ukuboza 2025.
Igihugu cyabaye icya kabiri mu kwinjira mu mwaka mushya wa 2026 ni Nouvelle-Zélande, nayo yo muri Oceania, yinjiye mu mwaka mushya wa 2026 saa 11:00 kuri GMT.
Ubushinwa bwo bwinjiye muri 2026 saa 16:00 kuri GMT. Ibi rero ni byo byatumye indege yo muri kompanyi itwara abagenzi ya Cathay Pacific Flight iva Hong Kong mu Bushinwa ari tariki ya Mbere z’ukwezi kwa mbere muri 2026, igera ku kibuga cy’indege cya Los Angeles muri Leta Zunze Ubumwe za Amerika, tariki ya 31 z’ukwezi kwa 12 muri 2025.
Ni ukuvuga ngo yavuye mu Bushinwa bari mu birori byo kwizihiza umwaka mushya igera muri Leta Zunze Ubumwe za Amerika bakiwutegereje. Leta Zunze Ubumwe za Amerika niho hantu binjiye bwa nyuma mu mwaka mushya wa 2026.