Imyambarire, guhuriza ku batowe no kubura kwa KNC: Ibyaranze ibi

Kuri iki Cyumweru tariki ya 12 Nyakanga 2026, ni bwo kuri Kigali Marriot Hotel habereye ibirori byo guhemba abakinnyi n’abatoza bitwaye neza mu mwaka w’imikino wa 2025/26 (BK Pro League Awards 2026).

Ni ibirori byitabiriwe n’abayobozi mu nzego z’umupira w’amaguru, amakipe, abakanyujijeho n’abandi banyuranye.

Igihembo cy’umukinnyi mwiza ukiri muto utarengeje imyaka 21 cyatwawe na Emmanuel Flomo wa Al Hilal ahigitse Bahati Clement wa Gicumbi FC na Adama Coulibaly bakinana muri Al Hilal.

James Desire wa Kiyovu Sports ni we wabaye umunyezamu mwiza ahigitse Niyongira Patient wa Police FC na Ibrahima Dauda Bareli wa Bugesera FC.

Igitego cyiza cyabaye icyatsinzwe na Rutonesha Hersbone wa Gorilla FC atsinda El Merreikh SC kikaba cyahigitse icya Joseph Sackey wa Mukura VS&L yatsinze Musanze FC ndetse n'icyo Ngono Guy Herve wa Gasogi United yatsinze Etincelles FC.

Laurențiu Reghecampf wa Al Hilal niwe wahawe igihembo cy’umutoza mwiza ahigitse abo bari bahatanye barimo Haringingo Francis Christian wa Rayon Sports, Abderrahim Talib wa APR FC.

Uwegukanye igikombe cy’umukinnyi watsinze ibitego byinshi ni Djibril Ouattara aho yatsinze 18.

Abakinnyi 11 beza ba shampiyona y’u Rwanda ya 2025/2026, mu izamu harimo James Desire wa Kiyovu Sports.

Ba myugariro; Byiringiro Jean Gilbert(APR FC), Erneste Ruzolo(Al Hilal SC) Mustapha Mohamed (Al Hilal SC) na Daba Sogoba (El Merreikh).

Abakina mu kibuga hagati: Em Hadji Madick Kane ( Al Hilal) Joseph Sackey (Mukura VS) na Jules Razafimaro (El Merreikh)

Abakina basatira: Girumugisha Jean Claude (Al Hilal), Djibril Ouattara (APR FC) na Mbonyumwami Taiba (Marine FC).

Igihembo gikuru cy’imodoka ya miliyoni 15 Frw, ku mukinnyi w’umwaka cyatwawe na Girumugisha Jean Claude wa Al Hilal yo muri Sudani yasabye gukina shampiyona y’u Rwanda ya 2025/2026 ndetse iranabyemererwa bitewe n’uko iwabo hari ikibazo cy’umutekano. Yafashije iyi kipe ye gusoreza ku mwanya wa mbere muri shampiyona atsinda ibitego 9.

Girumugisha yahigitse Mbonyumwami Taiba wa Marine FC, Madické Kane wa Al-Hilal,Djibril Ouattara wa APR FC na Byiringiro Jean Gilbert wa APR FC bari bahanganye.

KNC ntiyari ahari

Ubwo Chairman wa Rwanda Premier League, Mudaheranwa Yossouf yarimo arageza ijambo ku bitabiriye ibi birori yasabye ko abari muri Board y’uru rwego bahaguruka bagashimirwa. KNC usanzwe ayirimo ndetse akaba ari na Perezida w’ikipe ya Gasogi United ntabwo yigeze agaragara mu bahagurutse dore ko atari yitabiriye ibi birori.

Bamwe batekereje ko ashobora kuba afite izindi mpamvu ariko hari n’abatekereje ko ashobora kuba adafitanye umubano mwiza na Rwanda Premier League bitewe na mpaga yatewe muri shampiyona iheruka ubwo Gasogi United yaburaga ku kibuga ku mukino yari ifitaanye na Rayon Sports

Hahurijwe ku batowe

Ubusanzwe mu bihembo bitandukanye iyo bimaze gutangwa, usanga hari impaka nyinshi cyane. Gusa ku bihembo bya Rwanda Premier League ho nta mpaka nyinshi zabayeho. Aho zabaye ni ku mwanya umwe muri 11 no ku mukinnyi mwiza wa shampiyona.

Mu bakinnyi 11 beza harimo abakinnyi babiri b’Abanyarwanda aribo: Byiringiro Jean Gilbert na Mbonyumwami Taiba. Mu biganjemo abafana ba APR FC hari abavuga ko kuri aba Banyarwanda hagombaga kuba hiyongeyeho Niyomugabo Claude ukina inyuma ku ruhande rw’ibumoso. Uyu myugariro wakiniraga APR FC mu mwaka ushize w’imikino ni umwe mu bitwaye neza dore ko yanafashije ikipe ye kwegukana igikombe cya shampiyona.

Ku bijyanye n’umukinnyi witwaye neza kurusha abandi hari abavuga ko yagakwiye kuba Djibril Ouattara wa APR FC aho ari we watsinze ibitego byinshi muri shampiyona ndetse akanafasha ikipe ye gutwara igikombe.

Ku ruhande rw’abafana ba Rayon Spors nabo ntibumva impamvu nta mukinnyi n’umwe wabo wahawe igihembo.

Imyambarire

Nk'uko bisanzwe bigenda mu bindi birori no mu birori bya Rwanda Premier League ababyitabiriye bari bikozeho mu myambarire idasanzwe. Ku butumire bwo kujya muri ibi birori hari hariho n’ibyo abantu bazagenda bambaye akaba ariyo mpamvu bitatunguranye cyane kubona abantu bambaye bidasanzwe.

Girumugisha yahawe igihembo cy'umukinnyi mwiza wa shampiyona y'u Rwanda ya 2025/2026

Girumugisha Jean Claude yahembwe imodoka

Bamwe mu bakinnyi 11 beza ba shampiyona y'u Rwanda ya 2025/2026

Djibril Ouattara yahembwe nka rutahizamu watsinze ibitego byinshi

Rutonesha Hersbone wa Gorilla FC yahembwe nk'umukinnyi watsinze igitego kiza

Byiringiro Jean Gilbert wa APR FC ni umwe mu baserutse yambaye mu buryo budasanzwe

Muri ibi birori hafashwe umunota wo kwibuka no guha icyubahiro Fidèle Kajugiro Sebarinda wabaye umunyamakuru wa siporo, witabye Imana mu kwezi gushize