Kuri iki Cyumweru, tariki ya 18 Ukwakira 2026, ni bwo
Ntambara Mutoni Jacky yagaragaje ibyishimo afite byo kwizihiza isabukuru
y’imyaka umunani amaze arushinze na Clapton Kibonge, umukinnyi wa filime
n’umunyarwenya wamamaye mu Rwanda.
Uyu muryango ufite impamvu zirenze imwe zo kwishimira uyu
munsi. Uretse kuba umaze imyaka umunani wubatswe ku isezerano ryo kubana
nk’umugabo n’umugore, Jacky na Clapton bamaze imyaka 11 baziranye, urugendo
rwatangiye mbere y’uko bahitamo guhuza ubuzima bwabo burundu.
Mu butumwa yanyujije ku mbuga nkoranyambaga, Jacky
yagaragaje ko imyaka bamaze bari kumwe ayibona nk’igitambo cy’ineza y’Imana,
yababaye hafi mu bihe bitandukanye, ikabarinda ndetse ikabaha imbaraga zo
gukomeza urugendo rwabo.
Yagaragaje ko atareba imyaka umunani bamaze bashakanye
nk’igihe cy’urukundo gusa, ahubwo ko ari n’amateka y’uburyo Imana yabanye na
bo, ikabafasha guhangana n’ibyiza n’ibikomeye bahuye na byo.
Mu magambo ye, yagize ati “Imyaka 11 tumaze tuziranye
n’imyaka umunani y’urushako. Mana, watubereye uwo kwizerwa. Ukuboko kwawe
ntikwatuvuyeho, ineza yawe yaradutwikiriye, amababa yawe yaraduhishe. Muri
byose watubereye uwo kwizerwa. Mu bihe byiza no mu bikomeye, ubuntu bwawe ni
bwo bwadufashije gukomeza.”
Yakomeje agaragaza ko kimwe mu bintu by’ingenzi bishimira
muri uru rugendo ari abana batatu Imana yabahaye, avuga ko hari byinshi batari
bazi ku hazaza habo igihe batangiraga kubana, ariko ko uyu munsi bishimira aho
bageze n’imbaraga bakomeje kubakiraho ejo hazaza habo.
Yagize ati “Waduhaye abana batatu beza cyane. Nta cyo twari
tuzi ku byo tuzaba byo, Mana, ariko dore turi hano, turacyahagaze neza kandi
dukomeza gutera imbere tubikesha ubuntu bwawe.”
Jacky yagaragaje ko kwizihiza iyi sabukuru bitagarukira ku
kwishimira imyaka bamaze mu rushako, ahubwo ko ari n’umwanya wo guha icyubahiro
Imana yabanye na bo muri uru rugendo rwose.
Yongeyeho ati “Uyu munsi ntitwizihiza gusa imyaka tumaze mu
rushako, ahubwo tunakwizihiza wowe watubanye muri uru rugendo rwose. Papa, koko
twabonye ineza yawe itangaje. Urakoze.”
Yasoje ubutumwa bwe yifuriza we n’umugabo we isabukuru nziza
y’urushako, agaragaza urukundo amufitiye.
Iyi sabukuru ije yongera kwibutsa ko kubaka urugo atari
uguhura kw’abantu babiri gusa, ahubwo ari urugendo rusaba kwihangana, kwizerana
no gukomeza gufatanya mu bihe bitandukanye.
Ku bwa Jacky, imyaka umunani amaze na Clapton Kibonge, irimo
ibyishimo byo kubona umuryango wabo waguka ukagera ku bana batatu, ni ubuhamya
bw’ineza y’Imana avuga ko yabanye na bo kuva batangira urugendo rwabo.
Mu gihe bizihiza imyaka 11 bamaze baziranye n’umunani bamaze
bashakanye, ubutumwa bwa Jacky bugaragaza ko kuri we, isabukuru y’urushako
idasobanuwe n’imyaka imaze gusa, ahubwo inasobanurwa n’ibyo abashakanye
banyuranyemo, ibyo bubatse hamwe n’ishimwe bafite ku rugendo bagezeho.
Ntambara Mutoni Jacky na Clapton Kibonge bizihije imyaka umunani bamaze bashakanye, bashimira Imana yabanye na bo mu bihe byiza n’ibikomeye, ikabaha n’abana batatu
Nyuma y’imyaka 11 baziranye n’umunani bamaze mu rushako, Ntambara Mutoni Jacky yavuze ko ineza y’Imana yababaye hafi, agaragaza ko bishimira urugendo bamazemo imyaka bubaka umuryango wabo
Abana batatu n’imyaka umunani y’urushako! Ntambara Mutoni
Jacky yagaragaje ko we na Clapton Kibonge bishimira umuryango bubatse, ashimira
Imana yabahaye umugisha kandi ikabafasha gukomeza gutera imbere hamwe