Imyaka 8 ku ntebe y’ishuri n’umuziki: Vestine na Dorcas, izina riri mu mitwe y’abantu ryafashe indi paji muri Canada

Uyu munsi, nyuma y’imyaka umunani ishize batangiye urugendo rwabo ku giti cyabo, bari ku rwego rushya rw’ubuzima n’umuziki. Bamaze gutandukana n’ababafashaga mu muziki bari bamaze imyaka itanu bakorana, ndetse amakuru agaragaza ko urugendo rwabo rushya rugiye gukomereza muri Canada.

Ni inkuru y’abakobwa babiri bamenyekanye bakiri abana, bakundirwa impano yabo idasanzwe, banyura mu bibazo by’umwuga n’ubuzima bwite, ariko bagakomeza kugumana izina rikomeye mu muziki wa Gospel nyarwanda.

Album yabaye amateka y’ubuzima bwabo

Mu Ukuboza 2022, Vestine na Dorcas bamuritse album yabo ya mbere bise “Nahawe Ijambo”, igikorwa cyari gikubiyemo imyaka myinshi y’imbaraga, amasengesho, amasomo n’urugendo rw’umuziki.

Icyo gihe, Kamikazi Dorcas yabwiye itangazamakuru ko iyo album itari urutonde rw’indirimbo gusa, ahubwo yari amateka y’ubuzima bwabo.

Yasobanuye ko bayikoze bakiri abanyeshuri, bahora bahanganye n’amasomo, ibizamini, imyitozo y’indirimbo n’ingendo zitandukanye zijyanye n’umuziki.

Yagize ati: "Ni amateka kuri twe. Twari tukiri ku ntebe y’ishuri ariko tugakomeza gukora umuziki kugeza album irangiye. Byasabaga kwiga no gukora umuziki icyarimwe."

Iyo album yari iriho indirimbo zakunzwe zirimo Si Bayali, Ibuye, Arakize, Simpagarara, Adonai, Papa na Nzakomora, zafashije gukomeza kububakira izina rikomeye mu muziki wo kuramya no guhimbaza Imana.

Inkuru yatangiriye muri Sunday School

Mbere y’uko izina rya Vestine na Dorcas rimenyekana mu Rwanda hose, bari abana basanzwe bakomoka mu Karere ka Musanze.

Bavukiye mu muryango wubaha Imana wa Nizeyimana Mazimpaka na Uzamukunda Elizabeth. Bakuranye n’abandi bavandimwe bane, baba abana batandatu mu rugo.

Nk’abana benshi bo mu miryango y’abakristo, urugendo rwabo rwatangiriye muri Sunday School no muri Goshen Choir yo mu Itorero rya ADEPR.

Ababakurikiranye kuva kera bavuga ko impano yabo yatangiye kugaragara bakiri bato cyane. Amajwi yabo n’uburyo bahuzaga kuririmba byatumye bakundwa mu rusengero mbere y’uko bagera ku rubyiniro runini.

Mu 2018 bahisemo gutangira gukora umuziki ku giti cyabo, batangira basubiramo indirimbo z’abandi bahanzi. Izo ‘cover’ zakwirakwijwe ku mbuga nkoranyambaga, zituma abantu benshi batangira kubamenya.

MIE yinjira mu rugendo rwabo

Mu gihe impano yabo yari ikomeje kugaragara, Murindahabi Irène yabonye amahirwe yo kuyifasha kugera kure. Mu 2020 basohoye indirimbo “Nahawe Ijambo” yabahinduye izina rikomeye mu gihugu hose.

Iyo ndirimbo yafunguye imiryango mishya. Batangira gutumirwa mu bitaramo bikomeye, itangazamakuru ritangira kubitaho, ndetse izina ryabo ritangira kuvugwa no hanze y’u Rwanda.

Ku rwego rw’umwuga, benshi bemera ko uruhare rwa M. Irène rwabaye ingenzi cyane mu kububakira inzira yo kugera ku rwego bagezeho.

Mbere y’icyo gihe, umuryango wabo ntiwari uzwi cyane mu ruhando rw’imyidagaduro, ndetse na bo ubwabo bari abana b’abanyeshuri bafite impano ariko batarabona uburyo bwo kuyigeza kure.

Kumenyekana bakiri bato: umugisha n’ikigeragezo

Igihe batangiraga gukorana na MIE, Vestine yari afite imyaka 16 mu gihe Dorcas yari afite imyaka 15.

Kubera ko bari bakiri bato, amasezerano ya mbere yakorwaga mu izina ryabo yasinywe n’umubyeyi wabo.

Kumenyekana ukiri umwana bishobora kuba amahirwe adasanzwe, ariko nanone bikagira ingaruka nyinshi.

Abenshi mu bahanzi batangiye bakiri bato bagira igihe kigoye cyo guhuza gukura kwabo nk’abantu, amashuri, ubuzima bwite n’umwuga ubashyira imbere y’imbaga.

Ni kimwe mu byo Vestine na Dorcas na bo banyuzemo.

Mu myaka itanu ishize, bagiye bagarukwaho mu nkuru zitandukanye zirimo impaka ku miyoborere yabo, ibihuha byakwirakwiriye ku mbuga nkoranyambaga ndetse n’ibibazo byihariye byagarutsweho cyane cyane kuri Vestine.

Ariko nubwo ibyo byose byabayeho, umuziki wabo ntiwahagaze. Igihe izina ryabo ryabaga rinini kurushaho.

Mu gihe bamwe bibandaga ku nkuru zavugwaga hanze y’umuziki, bo bakomeje gukora.

Indirimbo zabo zakomeje kugera no ku bantu badakoresha imbuga nkoranyambaga, ibintu bitorohera abahanzi benshi bo mu gihe cya none.

Byatumye bahinduka bamwe mu bahanzikazi bafite abakunzi benshi mu muziki wa ‘Gospel’ mu Rwanda.

Mu 2025 bongeye kugaragara cyane mu itangazamakuru ubwo Vestine yakoraga ubukwe bwavuzwe cyane mu gihugu.

Ubwo bukwe bwakurikiwe n’ibiganiro n’indirimbo zagaragaje ko ubuzima bwabo butari bugizwe gusa n’ibyishimo n’intsinzi, ahubwo ko na bo banyura mu bigeragezo nk’abandi bose.

Muri uwo mwaka kandi batsindiye igihembo cy’Abaramyi b’Umwaka muri Diva Awards, ikimenyetso cy’uko nubwo habayeho urunturuntu rutandukanye, abakunzi babo bari bagikomeje kubashyigikira.

Imperuka y’urugendo rw’imyaka itanu

Ku wa 13 Kamena 2026 ni bwo Vestine na Dorcas batangaje ko bahagaritse imikoranire na MIE Music.

Ni icyemezo cyahise gitangira kuvugisha benshi, cyane cyane kubera imyaka myinshi bari bamaze bakorana n’umusaruro wari waragaragaye.

Mu gihe hari ababonaga ko ari iherezo ry’inkuru yabo, amakuru yageze kuri InyaRwanda agaragaza ko bishobora kuba ari intangiriro y’ikindi cyiciro gishya.

Kamikazi Dorcas yamaze kugera muri Canada aho asanze mukuru we Ishimwe Vestine.

Amakuru ava mu babakurikiranira hafi avuga ko muri icyo gihugu ari ho bashobora gukomeza ibikorwa byabo bya muzika, bafashijwe n’abafatanyabikorwa bashya biteguye kubatera inkunga.

Hari kandi amakuru avuga ko muri Kanama 2026 bashobora gutaramira mu Mujyi wa Quebec mu gitaramo gishobora guhuriramo n’abahanzi barimo Prosper Nkomezi, Ben na Chance.

Ese bazakomeza nk’uko wabamenye?

Vestine na Dorcas batangiye urugendo rwabo ari abakobwa babiri bato, bafite intego imwe, bakorera mu gihugu kimwe kandi bari mu buzima busa.

Vestine yamaze kubaka urugo. Ni umugore wa Ouédraogo ukomoka muri Burkina Faso. Dorcas we aracyari umukobwa.

Ubuzima bw’umuntu washinze urugo akenshi bugenda buhinduka, cyane cyane iyo akora umwuga usaba ingendo nyinshi, amasaha menshi muri ‘studio’ n’ibikorwa byo kwamamaza umuziki.

Ni yo mpamvu amateka y’umuziki agaragaza ko amatsinda menshi cyangwa abahanzi bakoranaga nk’umuryango rimwe na rimwe bagera aho bagahitamo inzira zitandukanye.

Mu Rwanda, abantu benshi baracyibuka ihagarikwa ry’amatsinda nka Dream Boys na Urban Boys. No hanze y’u Rwanda hari amatsinda nka P-Square, Fifth Harmony na One Direction yigeze gukundwa cyane ariko nyuma abanyamuryango bayo bagahitamo gukomeza ukwabo.

Icyakora ku ruhande rwa Vestine na Dorcas, nta kimenyetso kiragaragaza ko bagiye gutandukana nk’itsinda.

Ahubwo ibimenyetso bihari byerekana ko bashaka gukomeza urugendo rwabo bari kumwe, ariko mu rwego rushya, ahantu hashya no mu mikoranire mishya.

Inkuru itararangira

Mu myaka umunani ishize, Vestine na Dorcas bakoze urugendo rurerure kuva muri Goshen Choir y’i Musanze kugeza ku rubyiniro mpuzamahanga.

Bakoze umuziki bakiri abanyeshuri. Barangije amashuri. Bamenyekanye igihugu cyose. Bakoreye ibitaramo mu Rwanda no hanze yarwo. Banyuze mu byishimo, ibigeragezo, impaka n’intsinzi.

Uyu munsi bafunze igice cy’ingenzi cyanditswe hamwe na MIE Music.

Ariko nk’uko album yabo ya mbere yari amateka y’urugendo rwabo rw’ishuri n’umuziki, indi paji nshya yatangiye kwandikirwa muri Canada.

Ntawe uzi neza uko izarangira. Icyakora ikintu kimwe ntigishidikanywaho: izina rya Vestine na Dorcas rimaze kuba kimwe mu bimenyetso byaranze umuziki wa Gospel mu Rwanda, kandi inkuru yabo iracyafite indi mirongo myinshi itarandikwa.

Mu myaka itanu ishize, Vestine na Dorcas bakoreye ibitaramo bikomeye muri Canada mu rwego rwo kugeza kure ibikorwa byabo

Aha baganiraga n'itangazamakuru bitegura kumurika Album yabo ya mbere mu gitaramo bakoreye muri Camp Kigali

Vestine na Dorcas, amazina yakuriye i Musanze, ariko yaje kuba ikimenyabose binyuze mu kuramya no guhimbaza Imana

Vestine na Dorcas batangiye umuziki muri 2018, basubiramo indirimbo z'abandi bahanzi, ibyatumye impano yabo imenyekana cyane

Vestine na Dorcas batangiye umuziki bari ku ntebe y'ishuri, ibikorwa byabo bikomeza kurandaranda ku rwego rw'Isi

Ku wa 23 Ukuboza 2025, Kamikazi Dorcas yakiriye igikombe itsinda 'Vestine na Dorcas' ryegukanye muri Isango na Muzika Awards