Imyaka 19 irashize umwami wa Reggae, Lucky Dube yishwe

Lucky Philip Dube yavukiye i Ermelo, mu cyahoze ari Transvaal muri Afurika y’Epfo, ku wa 3 Kanama 1964. Nyina yamwise “Lucky”, izina risobanura umunyamahirwe, nyuma y’ibibazo by’ubuzima yahuye na byo akiri uruhinja, ariko akaza kubaho.

Yakuriye mu muryango utari ufite amikoro ahagije, arerwa cyane na nyirakuru mu gihe nyina yashakishaga imibereho. Mu kiganiro yatanze mu 1999, Dube yavuze ko nyirakuru yagize uruhare rukomeye mu buzima bwe no mu kumufasha kuba umuntu yaje kuba we.

Yatangiye aririmba umuziki gakondo, nyuma ajya muri Reggae

Lucky Dube yatangiye urugendo rw’umuziki akiri muto. Yifashishije itsinda rya mubyara we ryitwaga The Love Brothers, ryibandaga ku muziki gakondo w’Abazulu. Mu 1982, yasohoye album Lucky Dube and the Supersoul, yari mu ntangiriro z’urugendo rwe rw’umuziki.

Nyuma yaje kujya muri Reggae, injyana yakundaga kumva no kwigiraho ku bahanzi barimo Jimmy Cliff na Peter Tosh. Yaje kumenyekana cyane kubera uburyo yahuzaga umudiho wa Reggae n’ubutumwa buvuga ku mibereho y’abantu n’ibibazo bya politiki.

Mu gihe Afurika y’Epfo yari ikiri mu bihe by’ivanguraruhu rizwi nka Apartheid, indirimbo ze zagiraga uruhare mu kugaragaza akarengane abirabura bahuraga na ko. Yagiye anenga ivangura, ubusumbane n’ibindi bibazo byugarije sosiyete, asaba abantu kubana mu mahoro no kutavangura abandi.

Mu myaka igera kuri 25 yamaze akora umuziki, Lucky Dube yasohoye album nyinshi, zirimo Rasta Never Die yo mu 1984, Prisoner yo mu 1989 n’izindi zamufashije kumenyekana ku ruhando mpuzamahanga.

Indirimbo ze zakunzwe cyane zirimo Prisoner, Remember Me, Together as One, Different Colours, One People, Slave na Reggae Strong. Binyuze muri zo, yagejeje ubutumwa bwe ku bantu bo mu bihugu bitandukanye, anafasha Reggae kurushaho kumenyekana muri Afurika.

Yishwe agerageza kurwanya abashakaga kumwiba imodoka

Ku mugoroba wo ku wa 18 Ukwakira 2007, Lucky Dube yari i Rosettenville, mu mujyi wa Johannesburg, ubwo abantu bamugabyeho igitero bashaka kumwambura imodoka ye yo mu bwoko bwa Chrysler 300C.

Yarasiwe muri icyo gikorwa, ahita apfa. Amakuru y’iperereza yatangajwe icyo gihe yavugaga ko abamwishe bashakaga kwiba imodoka ye, kandi ko bishoboka ko batari bazi ko ari Lucky Dube.

Abagabo batanu batawe muri yombi bakekwaho kugira uruhare muri ubwo bwicanyi. Mu 2009, batatu muri bo bahamijwe ibyaha bifitanye isano n’urupfu rwe, bakatirwa igifungo cya burundu.

Urupfu rwe rwababaje abakunzi ba Reggae hirya no hino ku isi, kuko yari umwe mu bahanzi bari baragize uruhare mu kugeza iyi njyana ku ruhando mpuzamahanga, mu gihe benshi bayifataga nk’umuziki wihariye wa Jamaica.

Umurage we uracyariho

Lucky Dube yibukwa nk’umuhanzi wakoresheje umuziki mu kugaragaza ibibazo by’abaturage no guharanira uburenganzira bwa muntu. Indirimbo ze zakomeje kumvwa n’abakunzi ba Reggae, n’abo mu bisekuru byakurikiyeho, kubera ubutumwa buzirimo.

Yari azwi kandi nk’umuntu wahaga agaciro umuryango we n’imyemerere ye. Mu biganiro bitandukanye, yagiye agaragaza ko atemeraga ko umuntu yakwitwaza idini cyangwa imyemerere ye ngo ashyigikire ihohoterwa n’akarengane.

Kuri uyu wa 18 Ukwakira 2026, imyaka 19 irashize Lucky Dube yitabye Imana. Nubwo atakiriho, indirimbo ze nka Remember Me, Prisoner na Together as One zikomeje gutuma yibukwa nk’umwe mu bahanzi bagize uruhare rukomeye mu mateka ya Reggae muri Afurika no ku isi.