Iki gikorwa cyo kwamagana ayo masezerano cyabereye i Los Angeles ku wa Gatandatu, aho umunyarwenya uzwi cyane Adam Conover yavuze ko gukomeza guhuza ibigo bikomeye by'itangazamakuru n'imyidagaduro ari ikibazo gishobora gusenya uru ruganda. Yagize ati: "Uruganda rw'imyidagaduro ruri gupfa, ni yo mpamvu numva ngomba kuvuga iki kibazo."
Conover ni umwe mu batanze ibiganiro mu gikorwa cyiswe "Main Street vs. The Merger", kikaba ari igice cya mbere cy'urugendo ruzazenguruka imijyi itatu rugamije guhuza abakora mu myidagaduro, ba rwiyemezamirimo bato ndetse n'abanyapolitiki mu rwego rwo kurwanya igurwa ry'iki kigo.
Abantu bagera ku 100 ni bo bari bateraniye muri Lumiere Music Hall i Los Angeles, aho bagaragaje impungenge zabo ku ngaruka bashobora guhura na zo mu gihe iyi Sosiyete yaba imaze kwegukanwa na Paramount.
Ni nyuma y'uko abashinzwe kurengera ihiganwa ry'ubucuruzi muri Amerika hategerejwe ko baza kwemeza ayo masezerano, Paramount igatanga ihumure ko ayo masezerano atazagira ibyo yangiza ku bandi bandi bari muri uru ruganda rwa sinema cyangwa ku bahanga mu guhanga ibishya.
Icyakora, amakuru yatangajwe na Reuters avuga ko leta zitandukanye zirimo California na New York ziri gutegura ikirego kigamije guhagarika ayo masezerano, zivuga ko ashobora kugabanya guteza ibibazo mu rwego rw'imyidagaduro.
Adam yavuze ko azi neza ububabare buterwa n'amasosiyete ahuzwa kuko byigeze kuba nyuma y'uko AT&T iguze Time Warner mu 2018. Nyuma y'ayo masezerano, gahunda ye ya televiziyo yitwaga "Adam Ruins Everything" ikurwaho, bituma we n'abakozi benshi ndetse n'abandi bakoranaga na yo babura akazi.
Yavuze ko abantu barenga 100 bahise batakaza akazi kubera icyo cyemezo, ibintu avuga ko byakomeje kugaragara mu myaka yakurikiyeho.
Raporo yakozwe n'Ikigo cya Milken Institute igaragaza ko hagati ya 2019 na 2023, leta ya California yatakaje imyanya y'akazi 17,234 mu rwego rw'imyidagaduro.
Imibare ya FilmLA, ikigo gishinzwe guhuza ibikorwa byo gufatira amashusho muri Los Angeles n'inkengero zayo, igaragaza ko ikoreshwa rya bimwe mu byumba bikoreshwa mu gufata amashusho ryageze kuri 62% gusa mu gice cya mbere cya 2025, mu gihe mu 2016 ryari hafi kugera ku 100%.
David Ellison, Umuyobozi wa Paramount Skydance