Uyu Mubiligi w’imyaka 40
yari amaze icyumweru arwaye indwara iterwa na virusi, ibintu byatumye anasiba
ikiganiro n’abanyamakuru cyari cyateguwe ku wa Kabiri, mbere y’umukino Bayern
Munich yakinnye na Arsenal muri UEFA Champions League.
Nubwo atari ameze neza,
Kompany yaje kugaragara ku ruhande rw’ikibuga ubwo Bayern Munich yanganyaga na
Arsenal ku wa Gatatu.
Amakuru yatangajwe
n’ibitangazamakuru byo mu Budage avuga ko uyu mutoza ari mu bitaro kandi ko
ubuzima bwe buhagaze neza.
Mu itangazo Bayern Munich
yashyize ahagaragara, yavuze ko Kompany yagize ikibazo cy’ubuzima akagwa ubwo
yari yagiye kureba imyitozo y’ikipe ya kabiri, bityo agahabwa ubutabazi
bwihuse.
Iyi kipe yongeyeho ko uyu
mutoza ari gukorerwa ibizamini byimbitse mu bitaro kandi ko azakomeza
kwitabwaho n’abaganga.
Bayern Munich yatangaje
ko kugeza igihe kizatangarizwa, abatoza bafasha Kompany ari bo bazakomeza
kuyobora imyitozo n’ibindi bikorwa bijyanye n’imikino y’ikipe.
Umuyobozi wa siporo muri
Bayern Munich, Max Eberl, yavuze ko ubuzima bwa Kompany ari bwo buri ku mwanya
wa mbere, anizeza ko iyi kipe izakora ibishoboka byose kugira ngo akire vuba.
Yagize ati: “Vincent
Kompany afite ubuvuzi n’ubufasha bwose akeneye, kandi azahabwa igihe cyose
azaba akeneye kugira ngo agarure ubuzima bwe.”
Eberl yakomeje avuga ko
ikipe y’abatoza bafasha Kompany izakomeza inshingano ze, kuko bayizeye byuzuye,
anifuriza uyu mutoza gukira vuba.
Umunyamakuru w’inzobere
mu mupira w’amaguru mu Budage, Taufig Khalil, yabwiye BBC Radio 5 Live ko
Kompany yari amaze hafi icyumweru arwaye virusi.
Yasobanuye ko ibimenyetso
by’uburwayi bwe byatangiye kugaragara mu mpera z’icyumweru gishize, ubwo Bayern
Munich yakinaga na RB Leipzig. Kuva icyo gihe, Kompany ntiyagaragaye mu
kiganiro n’abanyamakuru, aho Max Eberl yari yatangaje ko arwaye virusi.
Khalil yavuze ko abantu
benshi batunguwe no kubona Kompany ahagaze ku ruhande rw’ikibuga mu mvura
nyinshi ubwo Bayern Munich yakinaga na Arsenal ku wa Gatatu, kuko bari biteze
ko umutoza umwungirije, Aaron Danks, ari we uza kuba ayoboye ikipe.
Yongeyeho ko uwo mukino
wari ufite agaciro gakomeye ku buryo Kompany ashobora kuba yarifuje kuba hafi
y’abakinnyi be, nubwo yari atameze neza.
Amakuru yatangajwe na Bayern Munich yemeje ko Kompany ameze neza ugereranyije n’uko byari byifashe nyuma yo kugwa. Icyakora, haracyakenewe ibindi bizamini kugira ngo hamenyekane neza uko ubuzima bwe buhagaze.
Manchester City na
Burnley bifurije Kompany gukira vuba
Vincent Kompany yerekeje
muri Bayern Munich muri Gicurasi 2024, avuye muri Burnley yo mu Bwongereza,
asimbura Thomas Tuchel, kuri ubu utoza ikipe y’igihugu y’u Bwongereza.
Muri shampiyona ya 2022/23,
Kompany yafashije Burnley kwegukana igikombe cya Championship, icyiciro cya
kabiri mu Bwongereza. Nubwo iyi kipe yaje gusubira muri Championship nyuma yo
kumanuka mu cyiciro cya mbere muri shampiyona yakurikiyeho, Bayern Munich
yamugiriye icyizere imuha akazi ko kuyitoza.
Kuva yagera muri iyi kipe
yo mu Budage, Kompany yayifashije kwegukana igikombe cya Bundesliga mu bihe
bibiri biheruka, ndetse ayigeza muri 1/2 cya UEFA Champions League cya 2025/26,
aho yatsinzwe na Paris Saint-Germain yaje kwegukana iryo rushanwa.
Mbere yo kuba umutoza,
Kompany yari umukinnyi ukomeye wa Manchester City, yamaze imyaka 11 ayikinira.
Yatwaranye na yo ibikombe bine bya Premier League, ibikombe bibiri bya FA Cup
n’ibikombe bine bya League Cup.
Nyuma y’amakuru y’uko
yajyanywe mu bitaro, Manchester City yashyize ubutumwa ku mbuga nkoranyambaga,
yifuriza uwahoze ari kapiteni wayo gukira vuba.
Iti: “Abagize Manchester
City bose bifuriza Vincent Kompany, wahoze ari kapiteni wacu akaba n’umunyabigwi
w’ikipe, gukira vuba. Komera vuba, Vinny!”
Na Burnley yagaragaje ko
imushyigikiye, ivuga ko abari muri iyi kipe bose bamwifuriza gukira vuba.
Bayern Munich ifite
umukino na Freiburg uteganyijwe ku Cyumweru muri shampiyona y’u Budage, ariko
kugeza ubu, abatoza bafasha Kompany ni bo biteganyijwe ko bazakomeza kuyobora
imyitozo n’ibikorwa by’ikipe mu gihe agikurikiranwa n’abaganga.