Dr Antoine Rutayisire, yaganirije
urubyiruko ruba muri Leta Zunze Ubumwe za Amerika ku bibazo bitandukanye
bibaza, banahakura impanuro zizabafasha mu buzima bwabo bwa buri munsi.
Umwe mu bari bateraniye aho yabajije icyo umuntu yakora aramutse ashaka kwiga ariko ababyeyi be bakamuhatira kureka ishuri ngo abanze ashake akazi. Rutayisire yamusubije ko hari aho biba ngombwa ko abana batumvira ababyeyi bitewe n’icyo bari kubasaba.
Avuga ko umubyeyi adakwiye kubuza umwana amahirwe yo kwiga mu gihe ayabonye
kuko icyiza aruko umuntu abanza kwiga nyuma akazabona akazi gafatika kurusha
kureka kwiga ugakora akazi gaciriritse.
Aho yagize ati: "Ntuzakore
ubushobozi bwo kwiga amashuri make ufite ubushobozi bwo kwiga cyane cyane abakobwa.
Abakobwa bitewe n’aho mukomoka, iyo ugize imyaka 20 ababyeyi bumva wabaye
umukecuru bagatangira kukugererenya n’abandi mungana, ariko mbere ya byose
muzirikane ko muri muri Amerika. Nimutitwararika ngo mukore cyane n’abazabakomokaho
bazabaho nabi kuko ntibazashobora kurenga aho mutarenze.’’
Ku bijyanye no kuba
hari ababyeyi bamwe babuza abana babo kwiga ibyo bashaka bakabahitiramo ibindi,
Dr Rutayisire yavuze ko bisaba umwana kegera ababyeyi be akabaganiriza atuje ku
mpamvu ashaka kwiga ibyo mu kinyabupfura, ndetse akanahitamo ibyo akwiye kwiga
mu bwenge atekereza no kuri ejo hazaza, atanga urugero rwe ku mukobwa we w’imfura
wigeze kwitabira Miss Rwanda.
Ati: ‘‘Umukobwa wange yagiye muri Miss mwibutsa ko ndi pastor. Mbishidikanyaho ariko akanyumvisha ko nta cyaha kirimo, bigeze aho mbona ko abikunda ndamureka abijyamo ariko nkomeza kumukirikiranira hafi ndetse ngira na bimwe mubuza birimo kujya Nairobi.
Hari
ibintu bimwe tuzababuza kujyamo kuko tubona atari byiza kuri mwebwe. Niba ubikunze
banza ubisengere umenye niba aribyo Imana yakuremeye kuko ushobora kubikora
bikaba iby’igihe gito watwita bigahagararira aho kuko abagore bose bakunda
abana.’’
Dr Rutayisire abajijwe
ibijyanye no kwishyiraho tattoo, yasobanuye ko kuba ufite tattoo ku mubiri wawe
ntacyo byongera ku cyubahiro cy’Imana, avuga ko mbere yo kugira icyo ukora
ukwiye kubanza kwibaza icyo bizakumarira ntukururwe n’ibyo isi ikora byose. Yabagiriye
inama kandi yo kwakira ubuzima uko buri aho kubwifuza uko butari.
Yababwiye kandi ko
badakwiye gufata icyemezo cyo gushaka abagabo kubera ko barambiwe ubuzima bwa
gikumi bari babayemo cyangwa se igitutu cy’abandi. Aho yababwiye kubanza
gushishoza bagasanga abo bakunda kandi nabo (abasore) babakunda bya nyabyo, bakagisha
inama Imana mbere yo gufata umwanzuro, kandi bakita no ku makuru bahabwa n’abandi
ariko bagashyiramo ubushishozi kuko hari igihe umuntu akwereka ko ari mwiza
kandi imbere ari inzoka ijyenda.
Reba hano ikiganiro kirambuye Dr Antoine Rutayisire yagiranye n'urubyiruko ruba muri Amerika