Mu mwaka ushize, aba bayobozi bombi bagaragaye baganira bisanzuye mu ruzinduko Putin yagiriye i Beijing, aho banavuze ku buryo ikoranabuhanga rishobora gutuma abantu babaho imyaka myinshi cyangwa se bakagera hafi yo kudapfa.
Ibyo byabaye ikimenyetso cy’umubano udasanzwe hagati y’aba bayobozi bamaze imyaka myinshi ku butegetsi kandi bakunze kwita buri umwe “inshuti magara” y’undi.
Putin agiye kongera gusubira i Beijing muri iki cyumweru mu kwizihiza imyaka 25 y’amasezerano y’ubufatanye n’ubucuti hagati y’u Burusiya n’u Bushinwa.
Nubwo bamwe muri Amerika bari bizeye ko Perezida Donald Trump ashobora gutuma Beijing itandukana na Moscow, abasesenguzi bavuga ko ibyo bisa n’inzozi zidashoboka.
U Bushinwa ni bwo bufite ijambo rikomeye
Abasesenguzi bavuga ko umubano hagati y’ibi bihugu byombi utangana, kuko u Bushinwa ari bwo bufite imbaraga nyinshi cyane mu bukungu.
U Bushinwa ni umufatanyabikorwa mukuru w’u Burusiya mu bucuruzi, mu gihe u Burusiya bugize hafi 4% gusa by’ubucuruzi mpuzamahanga bw’u Bushinwa.
Nyuma y’ibihano byinshi byafatiwe u Burusiya n’ibihugu byo mu Burengerazuba bw’Isi kubera intambara yo muri Ukraine, Moscow yarushijeho kwegera Beijing.
Kwamamaza ibicuruzwa by’ikoranabuhanga by’Abashinwa nka Huawei byafashe umwanya munini mu Burusiya nyuma y’uko ibigo byinshi byo mu Burengerazuba bivuyeyo.
Raporo ya Bloomberg yagaragaje ko u Burusiya ubu bubona ibikoresho byinshi by’ikoranabuhanga bukoresha mu ntambara biva mu Bushinwa, aho birenga 90% by’ikoranabuhanga bwafatiwe ibihano rikomokayo.
U Burusiya ntibushaka kuba “umugaragu” w’u Bushinwa
Nubwo u Burusiya bukomeje kwishingikiriza cyane ku Bushinwa, abayobozi babwo bakomeje gushimangira ko badashaka kuba igihugu gikurikira amabwiriza ya Beijing.
Dmitry Trenin uyobora ikigo cy’ubushakashatsi ku mubano mpuzamahanga mu Burusiya yavuze ko igihugu cye kigomba gukomeza gufatwa nk’igihangange gifite ijambo ryacyo.
Abasesenguzi bavuga ko nubwo u Bushinwa bushobora kugira ijambo rikomeye, butitwara nk’ubushaka gutegeka Moscow kuko nabyo bishobora guteza ikibazo hagati y’ibihugu byombi.
Intambara ya Ukraine n’inyungu z’u Bushinwa
Nubwo intambara ya Ukraine yateje ibibazo byinshi ku Burusiya, u Bushinwa bubona ko hari inyungu bubikuramo.
Abasesenguzi bavuga ko Beijing iri kwigira byinshi ku buryo u Burusiya bukoresha intwaro ndetse no ku mikoranire y’igisirikare, ibintu bishobora kuyifasha mu bibazo ifitanye na Taiwan.
Ikindi kandi, u Burusiya bufite umutungo kamere munini cyane cyane peteroli na gaz, ibintu u Bushinwa bukeneye cyane mu rwego rwo kwihaza mu ngufu.
Hari umushinga munini wa gaz witwa “Power of Siberia 2” uteganyijwe gutwara gaz y’u Burusiya iyijyana mu Bushinwa binyuze muri Mongolia.
Uyu muyoboro ushobora gutanga metero kibe miliyari 50 za gaz buri mwaka, ibintu bifatwa nk’intambwe ikomeye mu mubano w’ibihugu byombi.
Abasesenguzi bavuga ko nubwo ibi bihugu bikorana cyane, atari alliance ya gisirikare nk’iya NATO. Ahubwo bavuga ko ari “strategic partnership” ibaha ubwigenge bwo gukorana ariko buri gihugu kigakomeza kwifatira ibyemezo byacyo.
Bombi bahuriye ku kurwanya uburyo Amerika n’ibihugu byo mu Burengerazuba bw’Isi bishaka kugenzura Isi, ndetse ntibakunze kunenga ibibazo by’uburenganzira bwa muntu bibera muri buri gihugu.
Urugero ni uko u Bushinwa budakunze kuvuga ku rupfu rwa Alexei Navalny mu Burusiya, ndetse Moscow nayo ntikunze kuvuga ku birego by’ihohoterwa ry’uburenganzira bwa muntu muri Xinjiang mu Bushinwa.
Umubano uri kurushaho kwegera abaturage
Nubwo hari abavuga ko abaturage b’ibi bihugu batarushaho kwegerana cyane nk’uko abayobozi babo babigaragaza, hari ibimenyetso byinshi by’uko ibintu biri guhinduka.
Abarusiya benshi ubu bakoresha imodoka n’amatelefone byo mu Bushinwa, kandi kugenda hagati y’ibihugu byombi byorohejwe cyane kubera gahunda yo kutaka visa.
Hari kandi gahunda nyinshi z’uburezi, ubushakashatsi n’umuco zihuza abaturage b’ibihugu byombi nk'uko bitangazwa na BBC.
Abasesenguzi bavuga ko nubwo hari ibitandukanye hagati y’u Bushinwa n’u Burusiya, umubano wabyo ukomeje gukomera kuko buri gihugu kibona ko gifite byinshi cyahomba kiramutse gitandukanye n’ikindi.