Ibikorwa nka Titanic, Deadpool, The Incredible Hulk, X-Men, The Twilight Saga, It, The Revenant n'ibice byinshi bya Suits na The X-Files byafatiwe muri Canada. Ese ni iki gituma Hollywood ikunda iki gihugu kurusha gufatira amashusho muri Amerika ubwayo?
Canada ni kimwe mu bihugu bikurura cyane abakora filime ku Isi. Buri mwaka, studios zo muri Hollywood zishorayo miliyari z'amadolari mu gufata amashusho.
Intara nyinshi zo muri Canada zirimo British Columbia, Ontario na Quebec zitanga amafaranga y'inkunga (tax credits) ku masosiyete afata filime.
Ibi bituma studios zisubizwa igice kinini cy'amafaranga zakoresheje mu gukoresha abakozi, ibikoresho n'ahafatirwa amashusho. Akenshi, gukora filime muri Canada bishobora kugabanya cyane amafaranga ugereranyije no kuyikorera muri Amerika.
Ikindi ni uko imijyi ya Canada ishobora kwigana indi mijyi myinshi ku Isi. Umujyi wa Vancouver ushobora kugaragara nka Seattle, Chicago cyangwa New York bitewe n'uko uteguwe muri filime.
Ni yo mpamvu bamwe bawita "Hollywood North", kubera umubare munini wa filime n'uruhererekane rwa televiziyo bifatirwayo.
Canada kandi ifite ibikorwaremezo bikomeye bya cinema. Ifite studios zigezweho, inzobere mu gufata amashusho, abakora CGI n'abandi bakozi bafite ubunararibonye buhagije bwo gukora filime zo ku rwego mpuzamahanga.
Hari n'indi mpamvu y'ingenzi: umutekano. Abakora filime bavuga ko Canada ifite umutekano, amategeko yorohereza ibikorwa bya cinema ndetse n'ubufatanye bwiza hagati ya studios n'inzego za Leta.
Ibi ni byo byatumye filime nyinshi zizwi ku Isi zifatirwa muri Canada. Titanic ya James Cameron yafatiwe igice kinini muri Nova Scotia. Deadpool, X-Men, The Flash, The Twilight Saga, It, The Revenant na filime nyinshi za Marvel na DC zafatiwe cyane cyane muri Vancouver no mu nkengero zayo.
Uruhererekane rwa televiziyo nka Suits, The X-Files, Supernatural na Riverdale na rwo rwafatiwe muri Canada nubwo inkuru zarwo zerekanaga ko zibera muri Amerika. Abasesenguzi bavuga ko uyu munsi Canada iri mu bihugu bitatu bya mbere byakira ibikorwa byinshi bya Hollywood hanze ya Leta Zunze Ubumwe za Amerika.
Umujyi wa Vancouver wakiriye ibikorwa bya filime n'uruhererekane rwa televiziyo birenga 400 mu mwaka umwe gusa, ari na byo byatumye uba umwe mu mijyi ikorerwamo filime nyinshi ku Isi.
Nubwo Hollywood ari muri Amerika, filime nyinshi zayo zivukira muri Canada. Amafaranga make yo kuzikora, inkunga zitangwa na Leta, ibikorwaremezo bigezweho n'imijyi ishobora kwigana ahantu henshi ku Isi ni byo bituma abakora filime bakomeza guhitamo Canada.
Ni yo mpamvu ushobora kureba filime ubona isa n'iyafatiwe muri New York, nyamara amashusho menshi yarafatiwe muri Vancouver cyangwa Toronto.