Imitungo ya Juma Jux y’arenga Miliyoni 700 yatwitswe, Diamond ubwoba buramutaha

Kwanga kujya gutora, gutwika impapuro z’amatora kuri site zitandukanye, kugenda mu muhanda baririmba ko badashaka Samia Suluhu Hassan, gutwika sitasiyo ya Polisi, kurwana n’inzego, ni byo bikorwa by’imyigaragambyo biri kubera mu gihugu cya Tanzania.

Ibyo bikorwa by’imyigaragambyo ni ibigamije kwamagana amatora y’umukuru w’Igihugu yabaye ku wa Gatatu ahubwo bagasaba Samia Suluhu Hassan guhita yegura mu maguru mashya akava ku butegetsi.

Abigaragambya biganjemo urubyiruko, bakomeje gukora ibikorwa byo gusenya ibikorwaremezo by'umwihariko ibikorwa by’ubucuruzi by’abantu bafite amazina akomeye muri Tanzania ndetse banakurikirwa cyane ku mbuga nkoranyambaga.

Abigaragambya badashaka ko Perezida Samia Suluhu Hassan akomeza kuyobora iki gihugu batwitse iduka ry’umuhanzi Juma Jux ryari rifite agaciro ka miliyoni zigera kuri miliyoni 700.

Juma Jux si we muhanzi wenyine abigaragambya bakoreye ibi kuko n’umuraperi Billinas ufite inzu y’ibijyanye na ‘Electronics’ babimukoze hakiyongeraho na ‘Restaurant’ ya Shilole nayo bamaze gutwika.

Aba bahanzi bakaba bari kuzira kuba bashyigikiye ubuyobozi bwa Samia Suluhu Hassan. Juma Jux aka kanya ari kubarizwa muri Nigeria aho umugore we Priscilla Ojo avuka.

Ibi bikorwa bikomeje gutera inkeke cyane cyane ku mitungo y’ibyamamare mu gihugu cya Tanzania cyane ko na Diamond Platnumz yakunze kwandika ubutumwa ku mbuga nkoranyambaga ze agaragaza ko ashyigikiye Samia Suluhu Hassan mu matora y’umukuru w’Igihugu.

Diamond afite imitungo myinshi mu gihugu cya Tanzania harimo Radio na Televisio bya Wasafi, Studio ya Wasafi ndetse n’ibindi bikorwa byinshi by’ubucuruzi.

Si ubwoba budafite aho bushingiye ahubwo ku mbuga nkoranyambaga hakomeje gukwirakwira imvugo z'urwango zishobora guteza ibibi cyane aho bagira bati "Boycott Diamond Platnumz" cyangwa se "Twigumure, Twange Diamond Platnumz."

Juma Jux n'umugore we bari mu gihugu cya Nigeria mu gihe imitungo yabo yatwikwaga

Imitungo ya bamwe mu byamamare byashyigikiye Samia Suluhu Hassan iri mu kangaratete

Bamwe mu bakoresha imbuga nkoranyambaga bari gusaba kwigumura kuri Diamond bakamukorera nk'ibyo bakoreye Juma Jux