Imikino y'amashuri abanza ku rwego rw’igihugu yasojwe, Rusizi yegukanye igikombe mu mupira w'amaguru

Mu mpera z'iki cyumweru dusoje mu Karere ka Muhanga hasorezwaga imikino y'amashuri abanza yari imaze hafi amezi atandatu ikinwa. Iyi mikino iba ngarukamwaka yari yahuje amakipe yahagarariye intara mu byiciro bitandukanye birimo umupira w'amaguru, Basketball, Volleyball, Handball mu bahungu n'abakobwa.

Mu cyiciro ya Volleyball mu bahungu, CS Amizero yo mu Ruhango yatsinze GS Umubano y'i Rubavu amaseti 3-1. Mu bakobwa GS Gisanze ya Nyamagabe yatsinze APES yo muri Ngoma amaseti 3-0. Muri Handball abahungu EP Ntendezi ya Nyamasheke yatsinze ibitego 17-0 bya GS Mwendo yo muri Bugesera. Mu bakobwa Hope F Institute yo muri Muhanga yatsinze ibitego 15-0 bya GS Karama yo muri Musanze.

Mu mupira w'amaguru mu bahungu GS Bugumira yo muri Rusizi yatsinze GS Kiziguro yo muri Gatsibo ibitego 3-0, naho mu bakobwa GS Rwantonde y'ikirehe itsinda St Joseph Muhato kuri penariti 3-1 nyuma yaho amakipe yose yari yanganyije igitego kimwe kuri kimwe. Basketball mu bahungu APACOPE yo muri Nyarugenge yatsinze GS Karwasa y'Imusanze amanota 30-24, naho mu bakobwa GS Gikonko Catholique yo muri Gisagara itsinda GS Muzizi yo muri Kayonza amanota 22 kuri 16.

Gs Kiziguro yo muri Gatsibo yatsindiwe ku mukino wa nyuma

Iyi mikino itangira ku rwego rw'Umurenge ibigo bigahura bikishakamo ikigo gihagararira umurenge, nabyo bigahura hakavamo ikigo gihagararira akarere, hanyuma ku rwego rw'intara ibigo bihagarariye uturere birahura hakavamo ikigo kizaserukira intara ku rwego rw'igihugu.

GS Rwantonde y'ikirehe ni yo yegukanye igikombe mu bakobwa mu mupira w'amaguru

Iyi mikino yitabirwa n'abana batarengeje imyaka 14