Nk'uko byatangajwe n'ikinyamakuru Business Insider Africa, mu cyemezo cyafashwe n’Inama y’Ubutegetsi ya IMF kuri uyu wa Mbere, u Rwanda rwahise ruhabwa icyiciro cya mbere cy’iyi nkunga kingana na Miliyoni 35.7 z’Amadolari, mu gihe andi mafaranga azagenda atangwa buhoro buhoro nyuma y’isuzuma rizajya rikorwa ku ishyirwa mu bikorwa ry’iyi gahunda.
Ubukungu bw’u Rwanda bwakomeje kwihagararaho
N'ubwo isi ikomeje guhura n’ibibazo birimo izamuka ry’ibiciro by’ibikomoka kuri peteroli, ifumbire n’ibindi bikenerwa by’ingenzi, IMF yagaragaje ko ubukungu bw’u Rwanda bwakomeje kwitwara neza.
Mu mwaka wa 2025, ubukungu bw’u Rwanda bwazamutse ku kigero cya 9.4%, kirenze cyane ibyari byitezwe. Ibi byashingiye ku ishoramari rikomeje gukorwa mu bikorwa remezo, ubukerarugendo, serivisi, inganda ndetse n’ikoranabuhanga.
Nanone kandi, ibikorwa byo koroshya ishoramari no gukomeza kunoza imiyoborere y’ubukungu byafashije igihugu gukurura abashoramari benshi baturutse mu mahanga. Nubwo hari ibibazo bituruka hanze, ubukungu bw’u Rwanda bwazamutseho 9.4% mu mwaka wa 2025, bigaragaza ishoramari rikomeye n’ivugurura ry’ubukungu
Inkunga izafasha guhangana n’izamuka ry’ibiciro
IMF yavuze ko amakimbirane yo mu Burasirazuba bwo Hagati akomeje kugira ingaruka ku bihugu byinshi, harimo n’u Rwanda. Izamuka ry’ibiciro bya peteroli ku isoko mpuzamahanga rituma ibiciro by’ubwikorezi n’ingufu byiyongera, mu gihe n’ibiciro by’ifumbire bikomeje kuzamuka, bikaba bishobora kugira ingaruka ku musaruro w’ubuhinzi no ku biciro by’ibiribwa.
Iyi nkunga izafasha u Rwanda kongera ububiko bw’amadevize, kugabanya ingaruka z’ihungabana ry’ubukungu no gukomeza gutera inkunga gahunda z’imibereho myiza y’abaturage n’iterambere. Byitezwe kandi ko amafaranga azafasha Guverinoma gukomeza gushora imari mu mishinga y’iterambere itabangamiwe n’ikiguzi kinini cy’inguzanyo ku masoko mpuzamahanga.
IMF yagaragaje icyizere ifitiye u Rwanda
Iyi gahunda yatangiye kuganirwaho mu ntangiriro z’uyu mwaka, ubwo impande zombi zari zageze ku bwumvikane bwa mbere ku rwego rw’impuguke. Icyemezo cya nyuma cyafashwe n’Inama y’Ubutegetsi ya IMF gisobanuye ko gahunda yatangiye gushyirwa mu bikorwa ku mugaragaro.
Nubwo IMF iteganya ko umuvuduko w’izamuka ry’ubukungu bw’u Rwanda ushobora kugabanuka ukagera munsi ya 6.8% mu mwaka wa 2026 kubera ibibazo bikomeje ku isoko mpuzamahanga, iki kigo cyashimye uburyo igihugu gikomeje gucunga neza ubukungu bwacyo.
Umuyobozi Wungirije wa IMF, Bo Li, yashishikarije u Rwanda gukomeza kunoza imicungire y’imari ya Leta, kongera ubushobozi bwo gukusanya imisoro no gukomeza gukoresha neza umutungo wa rubanda.
Ku Rwanda, iyi nkunga ya miliyoni 250 z’Amadolari ntabwo ari amafaranga gusa yo guhangana n’ibibazo by’igihe gito, ahubwo ni ikimenyetso cy’icyizere IMF ifitiye uburyo igihugu kiyobora ubukungu bwacyo n’ubushobozi bwo gukomeza inzira y’iterambere rirambye n'ubwo isi ihanganye n’ibihe bitoroshye.