Raporo ya IMF ku cyerekezo cy’ubukungu bw’isi igaragaza ko ubukungu bw’u Rwanda buteganyijwe kuzamuka ku gipimo cya 7.4% muri 2026.
Iki gipimo kiri hejuru y’icy’Ubushinwa, buteganyijwe kuzamuka ku kigero cya 4.5%, ndetse na Leta Zunze Ubumwe za Amerika, ziteganyirijwe izamuka rya 2.3%.
Ibi bishyira u Rwanda mu bihugu bifite umuvuduko ukomeye w’izamuka ry’ubukungu muri uyu mwaka, nubwo ubukungu bwarwo bukiri hasi ugereranyije n’ubw’ibihugu byombi.
U Rwanda ruri mu bihugu bya Afurika bifite ubukungu buri kuzamuka cyane
U Rwanda ruri mu bihugu bitatu bya Afurika byagaragajwe muri raporo ya IMF nk’ibifite ubukungu buteganyijwe kuzamuka cyane muri 2026, hamwe na Sudani y’Epfo na Ethiopia.
Sudani y’Epfo iza imbere muri ibyo bihugu, aho ubukungu bwayo buteganyijwe kuzamuka ku gipimo cya 10.5%, igakurikirwa na Ethiopia ifite 9.2%, mu gihe u Rwanda ruteganyirijwe kuzamukaho 7.4%.
Nk’uko tubikesha ikinyamakuru Business Insider Africa, iri zamuka ry’ubukungu bw’ibi bihugu rifite impamvu zitandukanye. Muri Sudani y’Epfo, rishingiye ahanini ku kongera umusaruro n’ibicuruzwa byoherezwa mu mahanga bishingiye kuri peteroli.
Muri Ethiopia, rifitanye isano n’ivugurura ry’ubukungu, izamuka ry’ibyoherezwa mu mahanga, ibikorwa remezo n’uruhare rw’abikorera.
Ku Rwanda, IMF igaragaza ko ibikorwa by’ubwubatsi, serivisi, ubukerarugendo n’ishoramari mu bikorwa remezo biri mu bikomeza gufasha ubukungu bw’igihugu kwaguka ku muvuduko udasanzwe.
Uko byifashe muri Afurika yo munsi y’Ubutayu bwa Sahara
IMF iteganya ko ubukungu bw’ibihugu byo munsi y’Ubutayu bwa Sahara buzazamuka ku gipimo mpuzandengo cya 4.5% muri 2026, mu gihe izamuka ry’ubukungu bw’isi muri rusange riteganyijwe kuba 3.1%.
Ibi bigaragaza ko aka karere ka Afurika kari mu duce tw’isi duteganyijweho kugira umuvuduko w’izamuka ry’ubukungu uri hejuru y’impuzandengo y’isi. Icyakora, ibihugu biratandukanye mu miterere y’ubukungu, amahirwe y’ishoramari n’imbogamizi bihura na zo.
Mu bindi bihugu bya Afurika biri mu byitezweho kuzamuka cyane harimo Guinea, iteganyirijweho 7.2%, Benin, Niger na Sudani, buri kimwe giteganyirijweho 7%, ndetse na Uganda iteganyirijweho 6.2%.
Izamuka ry’ubukungu risobanuye iki ku baturage?
Nubwo umuvuduko w’izamuka ry’ubukungu ari ikimenyetso cy’ingenzi mu kureba uko ubukungu bw’igihugu buhagaze, ntibivuze ko abaturage bose bahita barushaho kugira imibereho myiza ku rugero rumwe.
Inyungu z’izamuka ry’ubukungu zishobora guterwa n’uko ishoramari ritanga akazi, uko umusaruro w’ibigo by’imbere mu gihugu wiyongera, uko ibicuruzwa na serivisi bigera ku baturage, ndetse n’uko amafaranga yinjira mu bukungu agira uruhare mu kuzamura imibereho yabo.
Ku Rwanda, gukomeza kugira izamuka rirambye bizasaba gukomeza gukurura ishoramari, guteza imbere inzego zitandukanye z’ubukungu, kongera amahirwe y’akazi no gufasha abaturage kungukira mu bikorwa by’iterambere.
U Rwanda ruri mu bihugu bya mbere ku Isi biri kwihuta cyane mu iterambere
U Rwanda rurusha Amerika n’u Bushinwa umuvuduko mu iterambere muri 2026