Uyu mukino wari witabiriwe na Perezida wa Repubulika y’u Rwanda, Paul Kagame, ndetse n’abandi banyacyubahiro batandukanye bari baje kwihera ijisho iri rushanwa rikomeje kubera i Kigali.
Al Ahly Benghazi yatangiye umukino iri hejuru ariko mu minota ya nyuma y’agace ka mbere, Lukeny Gonçalves aza gufasha Petro de Luanda kugabanya ikinyuranyo. Aka gace karangiye Al Ahly iyoboye n’amanota 24 kuri 23.
Mu gace ka kabiri, umukino warushijeho gukomera amakipe yombi agenda atsindana umusubirizo. Childe Dundao na Lual Acuil bagaragaje urwego rwo hejuru ku mpande zombi, bituma igice cya mbere kirangira Al Ahly Benghazi ikiri imbere n’amanota 48 kuri 43 ya Petro de Luanda.
Mu gace ka gatatu amakipe yombi yakomeje kwegerana mu manota, karangira anganya amanota 22-22, Al Ahly ikomeza kuyobora umukino n’amanota 70 kuri 65.
Agace ka nyuma ni ko kahinduye ibintu byose kuko Petro de Luanda yagaragaje urwego ruri hejuru. Gonçalves na Dundao batsinze amanota akomeye yafashije iyi kipe gusoza iyoboye umukino itsinze amanota 94 kuri 88.
Iyi ntsinzi yahise ihesha Petro de Luanda itike yo gukina umukino wa nyuma wa BAL 2026, aho izacakirana na RSSB Tigers yo mu Rwanda ku Cyumweru tariki ya 31 Gicurasi 2026.
Mu mukino wo guhatanira umwanya wa gatatu, Al Ahly Benghazi izahura na Al Ahly yo mu Misiri.
Perezida Kagame ari mu bakurikiye uyu mukino