Imana yampinduriye ubuzima! Gisa Cy’Inganzo yaririmbye mu gitaramo cya The Ben afite amashimwe – AMAFOTO

Ibi yabivuze mu ijoro ryo kuri uyu wa Kane tariki ya 1 Mutarama 2026, ubwo yaririmbaga mu gitaramo “The Nu-Year Groove” cya Mugisha Benjamin uzwi nka The Ben, cyabereye muri BK Arena. Ni ku nshuro ya kabiri Gisa Cy’Inganzo yari ataramiriye muri iyi nyubako nini y’imyidagaduro mu Rwanda.

Uyu muhanzi yaririmbye zimwe mu ndirimbo ze zakunzwe cyane, zirimo “Uruyenzi”, ari na zo zatunguranye cyane abari bitabiriye iki gitaramo, bagaragaza ko bagikomeje kumukunda no kumushyigikira. Yavuze ko yakozwe ku mutima n’uburyo yakiriwe n’abafana, bikamwongerera imbaraga zo gukomeza urugendo rwe rushya.

Gisa Cy’Inganzo yashimangiye ko ibyo agezeho abikesha Imana yamukuye mu buzima bubi yarimo, ikamuha amahirwe mashya. Yagize ati: “Imana yampinduriye ubuzima. Uko nakiriwe uyu munsi byanyeretse aho Imana yankuye n’aho ingejeje.”

Uyu muhanzi yakomeje agaragaza ko aya mahirwe abona ayafata nk’ubutumwa bwo gukomeza guhinduka, gukora umuziki ufite intego, no kubera urugero rwiza abandi bashobora kuba bakiri mu bibazo nk’ibyo yanyuzemo.

Kugaragara kwa Gisa Cy’Inganzo mu gitaramo cya The Ben byakiriwe neza n’abitabiriye iki gitaramo, benshi babifata nk’ikimenyetso cy’ihinduka ryiza n’icyizere gishya mu buzima bwe no mu muziki nyarwanda muri rusange.

Imana yamukuye mu buzima bubi yamuboshye igihe kinini, none imugarura ku rubyiniro rwa BK Arena afite amashimwe n’icyizere gishya 

Kuririmba ‘Uruyenzi’ imbere y’imbaga, nyuma y’urugendo rukomeye rw’ubuzima, Gisa Cy’Inganzo agaragaza ko impinduka zishoboka

Si umuziki gusa, ni ubuhamya bw’umuhanzi wavuye mu mwijima akagaruka mu rumuri, ashima Imana yamuhaye amahirwe ya kabiri 

Amashyi y’abafana, amarangamutima menshi n’amashimwe aturuka ku mutima w’umuhanzi wahuye n’ihinduka rikomeye mu buzima bwe

Amateka mashya yanditswe i BK Arena, aho Gisa Cy’Inganzo yaririmbye atanga ishimwe ku Mana yamukuye kure ikamugarura mu muziki

REBA HANO UKO LUCKMAN NZEYIMANA YAFUNGUYE URUBYINIRO RW'IGITARAMO "THE NU- YEAR GROOVE"

KANDA HANO UREBE UKO YEWEEH YITWAYE KU RUBYINIRO MU GITARAMO CYA THE BEN

Kanda hano urebe Amafoto menshi yaranze igitaramo "The Nu- Year Groove"

AMAFOTO: Karenzi Rene/ InyaRwanda.com

VIDEO: Dox Visual & Murenzi Dieudonne/ InyaRwanda.com