Ikundabayo Roben na Nzayisenga Valentine begukanye Isiganwa ryo #Kwibuka31 ‎

Iri rushanwa ryakinwe ku Cyumweru tariki ya 27 Mata 2025. Iri siganwa ryo kwibuka ku nshuro ya 31 “Race to Remember” ryitabiriwe n’amakipe asanzwe ari abanyamuryango ba FERWACY mu bagabo n’abagore ndetse n'atarabigize umwuga.

‎Mbere yuko ritangira gukinwa saa sita Abayobozi b'ishyirahamwe ry'umukino w'amagare mu Rwanda(FERWACY), Minisiteri ya Siporo,Komite Olympique, Abayobozi b'amakipe n'abakinnyi basobanuriwe amateka y'urwibutso rwa Nyanza ndetse banashyira indabo ku mva zishyinguyemo Abatutsi barenga ibihumbi 100.

‎Muri iri siganwa abagabo bakuru n'abatarengeje imyaka 23 bahagurukiye kuri Canal Olympia  berekeza Nemba basoreza kuri Canal Olympia ku ntera y’ibilometero 113.

‎‎Ni mu gihe mu bagore, abangavu,ingimbi ndetse n’abatarabigize umwuga bahagurukiye kuri  Canal Olympia  berekeza i Nyamata ku Gahembe basoreza kuri Canal Olympia ku ntera y’ibilometero 71.8.

‎‎Mu bagabo bakuru n'abatarengeje imyaka 23,Ikundabayo Roben ukinira Muhazi Cycling Generation Team niwe wahigitse abandi aho yakoresheje amasaha 2 iminota 44 n'amasegonda 46. 

‎‎Yakurikiwe na Nsengiyumva  Shemu wa Java Inovetek Pro Team na Masengesho  Vainquer  wa Benediction  Cycling Club‎ aho yabasize amasegonda 3.

‎Mu bagore bakuru n'abatarengeje imyaka 23 Nzayisenga Valentine wa ‎Benediction  Cycling Club niwe wabaye uwa mbere akoresheje amasaha 2, iminota 2 n'amasegonda 27 aho yakurikiwe na Ntakirutimana Martha ukinira Ndabaga women cycling Team akaba yamurushije amasegonda 12. 

‎Mu batarabigize umwuga Niyireba niwe watsinze akoresheje isaha imwe, iminota 52 n'amasegonda 17.  

‎‎Mu bangavu Masengesho Yvonne ukinira Ndabaga women cycling Team niwe wabaye uwa mbere akoresheje isaha imwe n'iminota 53 akaba yakurikiwe na Uwiringiyimana Liliane ukinira Friend of nature cycling team‎we wakoresheje isaha imwe , iminota 53 n'amasegonda 25.

‎Mu Ngimbi Tuyipfukamire Jean Faustin ukinira Muhazi Cycling Generation ‎niwe wabaye uwa mbere akoresheje amasaha 2 n'amasegonda 12. Yakurikiwe na Ishimwe Brian ukinira Ndabaga Women Cycling Team amurushije amasegonda 6.

‎‎Kugeza ubu, abanyamuryango barindwi b’Ishyirahamwe ry’Umukino w’Amagare mu Rwanda (FERWACY) barimo Sakumi Anselme wari Visi Perezida waryo, ni bo bamaze kumenyekana ko bishwe muri Jenoside yakorewe Abatutsi mu 1994.

‎‎"Race to Remember" yatangiye gukinwa mu 2016, gusa ntiyabaye mu 2020 na 2021 kubera icyorezo cya COVID-19.

‎

Ikundabayo Roben yegukanye irushanwa ryo Kwibuka ku Nshuro ya 31 Jenoside yakorewe Abatutsi mu 1994