Ku Cyumweru tariki ya 29 Werurwe 2026, muri Camp Kigali, habereye ibiroi byahuje amatorero 10 akomeye n’abasizi 11 baturutse mu Ntara zose z’u Rwanda n’Umujyi wa Kigali. Bahatanye mu marushanwa y’imbyino gakondo n’ubusizi ku rwego rw’Igihugu, akaba yarateguwe na Minisiteri y’Urubyiruko n’Iterambere ry’Ubuhanzi.
Itorero Indangamuco rya Kaminuza y’u Rwanda, Ishami rya Huye, ryegukanye umwanya wa mbere rihembwa Miliyoni 7 Frw. Itorero Impumuza rya EAUR Kigali ryabaye irya kabiri rihembwa Miliyoni 5 Frw, mu gihe Inyamibwa rya UR Nyarugenge ryabaye irya gatatu rihembwa Miliyoni 3 Frw.
Andi matorero yageze ku cyiciro cya nyuma arimo Inganji y’Umuco (ICK Kabgayi), Indatwa (UR Nyagatare), Indakomwa (RP Gishari), Ingeri y’Abeza (RP Karongi), Inganzo (RP Kitabi), Igisubizo (INES Ruhengeri), Uruyange (UR Busogo) ndetse na Impumuza (EAUR Kigali).
Jabastar Intore usanzwe ari umuhanzi mu njyana gakondo akaba n’umutoza mukuru w’itorero Impumuza ryabaye irya kabiri muri aya marushanwa, yatangiye gutoza Impumuza mu kwezi kwa mbere uyu mwaka wa 2026. Yahise aba uwa mbere ku rwego rw'intara mu mujyi wa Kigali, naho ku rwego rw'igihugu aba uwa Gatanu.
Iri torero Impumuza Cultural Troupe rya EAUR rigizwe n'ababyinnyi 45 biga muri kaminuza ibyiciro bine: Intore z'abakobwa; Intorw z'abahungu; Abaririmbyi ndetse n'Abakaraza.
Jabastar Intore yavuze ko intwaro ya mbere bitwaje yabafashije kuba aba kabiri mu gihugu, ku isonga hari umuyobozi wa mukuru wa kaminuza "dushimira cyane wemeye ko Intore ihabwa agaciro akenera gufasha umubyinnyi wese kumuha inkunga yo kwiga ahabwa 30% ku biga imyaka 3 kubera ko ari Intore".
Si ibyo gusa ahubwo yanatanze 'scholarship' ku biga ibindi byose kugira ngo amashuri yabo bashoje ntabe impfabusa. Ati: "Ni umubyeyi ukomeye mu kubaka umuco ndetse n'iterambere ry'ubuhanzi abenshi bari bararangije babura ubushobozi bwo kwiga kaminuza ariko Prof Kabera yafashije ababyinnyi cyane".
Jabastar Intore yavuze ko kwitwara neza muri aya marushanwa byabakoze ku mutima. Ati: "Iyi ntsinzi twayakiriye neza dore ko twakiriye asaga Million 5. Turashimira umuyobozi mukuru wa kaminuza ya EAUR ishami rya Kigali.
Turashimira umuyobozi bukuru bw'igihugu cyacu burangajwe imbere n'Intore izirangaje imbere Nyakubahwa Perezida Paul Kagame. Uru rugendo ntirwari rworoshye ariko kubera umuyobozi mukuru wa kaminuza wabashije kutwumva ni byo byatugejeje kuri iyi ntsinzi".
Yakomeje ashimira cyane Perezida Paul Kagame. Aragira ati: "Turashimira kandi ku isonga ubugira kabiri Intore izirusha intambwe umugobokarugamba waduhaye Ministeri y'Urubyiruko n'Iteramberw ry'ubuhanzi, ubahwa ramba tuguhorane."
Jabastar Intore yavuze ko imihigo bafite ubu "ni ugukora cyane kugira ngo iri torero Impumuza za EAUR rigere kure hashoboka kandi rigirire ikigo akamaro n'abaribamo muri rusange".
Mu gusoza amarushanwa y’imbyino gakondo n’ubusizi ku rwego rw’Igihugu, Umunyamabanga wa Leta muri Minisiteri y’Urubyiruko n’Iterambere ry’Ubuhanzi, Sandrine Umutoni, wari witabiriye isoza ry’aya marushanwa, yavuze ko uru rugendo rwagaragaje ko urubyiruko rufite impano zikomeye.
Yagize ati “Twabonye impano zidasanzwe. Ibi bitwereka ko urubyiruko rw’u Rwanda rufite ubushobozi bwo guteza imbere ubuhanzi no kububyaza umusaruro.”
Yakomeje ashimangira ko insanganyamatsiko y’uyu mwaka igira iti: “Ubuhanzi, inkingi y’ubukungu burambye”, isaba kureba ubuhanzi nk’urwego rurenze imyidagaduro, ahubwo rukaba umuyoboro w’iterambere n’udushya. Yanahamagariye abashoramari kurushaho kureba uru rwego nk’isoko y’amahirwe n’iterambere ry’igihugu.
Prof. Kabera Callixte wa Kaminuza ya East Africa wavuze mu izina rya bagenzi be bitabiriye amarushanwa y'imbyino gakondo n'Ubusizi mu Mashuri Makuru na Kaminuza, yashimye Minisiteri y'Urubyiruko n'Iterambere ry'Ubuhanzi yateguye amarushanwa y'imbyino gakondo n'Ubusizi.
Ati: "Ni iby'agaciro kuko bihesha ishema abahanzi ndetse n'abasizi, kandi bigatanga icyizere ku rubyiruko rwo mu mashuri na Makuru na Kaminuza, kuko n'igicumbi cy'ubuhanzi n'ubukungu burambye."
Yashimye amatorero ndetse n'abisizi bitabiriye iri rushanwa, ashima impano zabo ndetse n'ubumenyi "bwimbitse igihugu cyacu cyashingiraho mu guteza imbere ubukungu bushingiye ku muco".
Ati: "Mwabonye ko koko ubuhanzi ari inkingi y'ubukungu burambye [...] Ibi ni ukurema icyizere cy'urubyiruko ko ubuhanzi ari inkingi y'ubukungu burambye."
Yasabye Minisitiri y'urubyiruko n'iterambere ry'ubuhanzi 'gukomeza gutegura iki gikorwa gihuza abahanzi n'abasizi' kuko 'kirateza imbere urubyiruko, kirateza imbere abakora imyuga itandukanye, kandi ibihangano byabo bishobora gukurura ba mukerarugendo, ndetse n'igihugu cyacu muri rusange."
Ati: "Kaminuza ziriteguye gukomeza gukorana namwe mu guteza imbere ubuhanzi, ndetse n'u Rwanda muri rusange."
Itorero Impumuza rya East African University ryacanye umucyo mu marushanwa y’imbyino gakondo n’ubusizi ku rwego rw’Igihugu
Umunyamabanga wa Leta muri Minisiteri y’Urubyiruko n’Iterambere ry’Ubuhanzi, Sandrine Umutoni, ni umwe mu bitabiriye isoza ry’aya marushanwa
Prof. Kabera Callixte wa Kaminuza ya East Africa yashimye Minisiteri y'Urubyiruko n'Iterambere ry'Ubuhanzi yateguye amarushanwa y'imbyino gakondo n'Ubusizi
Itorero ndangamuco Impumuza rya East African University Rwanda, ryegukanye umwanya wa kabiri mu marushanwa y’imbyino gakondo n’ubusizi ku rwego rw’Igihugu, rigahembwa Miliyoni 5 Frw
Umutoza w’Itorero ndangamuco Impumuza rya East African University Rwanda, Semanza Jean Baptiste uzwi ku izina ry'ubuhanzi rya Jabastar Intore