Mu gihe ubwikorezi bwo mu kirere muri Afurika bukomeje gutera imbere, ibibuga by'indege byinshi biri gushora imari mu kubaka ibikorwa remezo bigezweho, kongera isuku, kunoza umutekano no koroshya serivisi zihabwa abagenzi.
N’ubwo ibibuga bikomeye nka Johannesburg, Cairo, Addis Ababa na Casablanca bikomeje kuba amarembo y'ingendo mpuzamahanga z'igihe kirekire, ibibuga byo mu rwego rw'uturere biragenda bigira uruhare runini mu guteza imbere ubukerarugendo, ingendo zo mu gihugu no hagati y'ibihugu bihana imbibi.
Ku mwanya wa gatatu haza Ikibuga Mpuzamahanga cy'Indege cya Kigali, cyakomeje gushimwa n'abagenzi kubera isuku, umutekano ndetse n'uburyo bwihuse kandi butaruhije bwo kwakira no kohereza abagenzi.
Skytrax igaragaza ko Kigali iri mu bibuga by'indege biteguye neza muri Afurika, aho serivisi zo kwiyandikisha ku rugendo, kugenzura ibyangombwa no kunyura mu bugenzuzi bw'umutekano bikorwa mu buryo bwihuse.
Ubwiyongere bw'ubukerarugendo mu Rwanda hamwe n'ishoramari rikomeje gukorwa mu bikorwa remezo byafashije iki kibuga gukomeza kwiyubakira izina ku rwego mpuzamahanga, n'ubwo gifite ubunini butagereranywa n'ibibuga bikomeye byo ku mugabane.
Ikibuga cy'Indege cya Marrakech Menara cyo muri Maroc ni cyo cyegukanye umwanya wa mbere muri Afurika mu mwaka wa 2026.
Iki kibuga cyashimwe kubera inyubako zacyo zigezweho zivangavanze n'umuco wa Maroc, isuku, uburyo bworohereza abagenzi ndetse n'ivugururwa ryakozwe muri gahunda ya "Airports 2030", ryazamuye ireme rya serivisi.
Ku mwanya wa kabiri haje King Shaka International Airport yo mu mujyi wa Durban muri Afurika y'Epfo, yashimwe kubera isuku, ituze n'imiterere yorohereza abagenzi.
Mu bibuga 10 bya mbere byatoranyijwe na Skytrax, Afurika y'Epfo ni yo ifitemo byinshi kuko yinjijemo Durban, Port Elizabeth (Chief Dawid Stuurman International Airport), Bram Fischer International Airport yo muri Bloemfontein na East London Airport.
Maroc nayo ifitemo bibiri ari byo Marrakech Menara Airport na Rabat–Sale Airport.
Ibindi biri kuri uru rutonde ni Entebbe International Airport (Uganda), Ivato International Airport yo muri Antananarivo (Madagascar), ndetse na Quatro de Fevereiro Airport yo muri Luanda (Angola).
Urutonde rw'ibibuga 10 by'indege byahize ibindi muri Afurika mu 2026
- Marrakech Menara Airport – Maroc
- King Shaka International Airport (Durban) – Afurika y'Epfo
- Kigali International Airport – u Rwanda
- Port Elizabeth (Chief Dawid Stuurman International Airport) – Afurika y'Epfo
- Bram Fischer International Airport (Bloemfontein) – Afurika y'Epfo
- East London Airport – Afurika y'Epfo
- Entebbe International Airport – Uganda
- Ivato International Airport (Antananarivo) – Madagascar
- Rabat–Sale Airport – Maroc
- Quatro de Fevereiro Airport (Luanda) – Angola
Skytrax ivuga ko ibibuga by'indege byo mu rwego rw'uturere bikomeje kugira uruhare rukomeye mu guteza imbere ubwikorezi bwo mu kirere muri Afurika. Bifasha koroshya ingendo zo mu gihugu no hagati y'ibihugu, kugabanya umubyigano uba ku bibuga bikomeye no guteza imbere ubukerarugendo.
Raporo y'uyu mwaka igaragaza kandi ko ibihugu byinshi byo ku mugabane wa Afurika bikomeje gushora imari mu kuvugurura ibibuga by'indege, hagamijwe kongera ireme rya serivisi no guha abagenzi uburambe bwiza kurushaho.
Ikibuga cy'Indege cya Marrakech Menara cyo muri Maroc ni cyo cyegukanye umwanya wa mbere muri Afurika mu mwaka wa 2026