Igitutu kibaye ari ikibazo ku mutoza wa Rayon Sports yahindura akazi

Ku munsi w'ejo ni bwo Rayon Sports yatsinzwe na Police FC 1-0 mu mukino wa ½ cy’igikombe cy’Intwari cya 2026. Nyuma y’uyu mukino, Bruno Ferry utoza Murera yavuze ko nubwo batabonye intsinzi ariko hari byinshi byiza yabonye mu mikinire byatuma bagira icyizere mu mikino iri imbere.

Yavuze ko yanyuzwe cyane n’uko ikipe ye yitwaye mu mukino muri rusange, by’umwihariko uburyo bakomeje kwitwara neza mu bice byombi by’umukino, bitandukanye n’uko byari bisanzwe.

Ati: ”Nabonye ibintu byiza cyane. Twari dusanzwe dukina igice cya mbere neza kurusha icya kabiri, ariko ubu twabashije guhangana no mu gihe kirekire, tunahangana n’ikipe nziza cyane ya Police”.

Umutoza wa Rayon Sports yashimangiye ko nubwo hakiri ibyo gukosora, hari impamvu nyinshi zo kunyurwa, cyane cyane ishyaka abakinnyi bagaragaje kuva ku munota wa mbere kugeza ku wa nyuma.

Abajijwe ku kuba afite abakinnyi benshi, cyane cyane abanyamahanga, n’ingaruka zabyo mu guhinduranya ababanza mu kibuga, yavuze ko ari akazi ke gushaka umunzani mwiza.

Ati: ”Buri mukino ugira umwihariko. Dushingira ku mukeba, uko ahagaze, ndetse n’imiterere y’abakinnyi bacu icyo gihe. Kuba dufite amahitamo menshi ni amahirwe, nubwo bidusaba gutekereza cyane.”

Bruno Ferry abajijwe ku kuba bamaze imikino itanu yikurikiranya badatsinda yasubije agira ati:”Niba igitutu cyaba ikibazo kuri njye, nahindura akazi. Umutoza aho ari hose aba ari mu gitutu. Ikibazo si igitutu, ni uko ugicunga.”

Yongeyeho ko nubwo batabonye intsinzi, bahuye n’amakipe akomeye mu mikino iheruka, ariko agaragaza ko hari itandukaniro rikomeye hagati y’uko ikipe yari imeze atangira n’uko imeze ubu. Yashimiye abafana avuga ko bitwaye neza kuri uyu mukino.

Igitutu kibaye ari ikibazo ku mutoza wa Rayon Sports yahindura akazi