Igitaramo Gen-z Comedy cyahujwe no kwitegura Shampiyona y’Isi y’Amagare

Fally Merci yabwiye InyaRwanda ko ari yo mpamvu abanyarwenya bazitabira iki gitaramo bagaragaye bambaye imyambaro n’ingofero bisa n’iby’abakinnyi bazitabira iri siganwa rizabera mu Rwanda kuva ku wa 21 kugeza ku wa 28 Nzeri 2025.

Yagize ati: “Twatekereje gukoresha iriya myambaro n’ingofero mu rwego rwo kwitegura Shampiyona y’Isi y’Amagare igiye kubera mu Rwanda, no gukangurira urubyiruko kumenya amakuru y’ibanze kuri iri siganwa. Nk’abanyarwenya twumvise tugomba gutanga umusanzu mu gushishikariza abantu kuzakurikirana iyi mikino, no kugaragaza ishema dufite nk’Abanyarwanda kuzakira iri rushanwa rikomeye.”

Iki gitaramo kirabera muri Kigali Conference and Exhibition Village (Camp Kigali) kuri uyu wa Kane, tariki ya 11 Nzeri 2025.

Umwanditsi akaba n’umukinnyi wa filime uzwi cyane mu Rwanda, Mazimpaka Jones Kennedy, ni we watumiwe mu gace ka ‘Meet me Tonight’. Abanyarwenya batumiwe barimo Killaman na Dogiteri Nsabii, Kadudu, Pirate, n’abandi.

Shampiyona y’Isi y’Amagare ni irushanwa ngarukamwaka ryitabirwa n’amakipe y’ibihugu, ritegurwa n’Ishyirahamwe Mpuzamahanga ry’Umukino wo Gusiganwa ku Magare (Union Cycliste Internationale – UCI). Mu Rwanda izakinwa ku ntera y’ibilometero 267,5 ifite akazamuko ka metero 5.475.

Ingengabihe y’iri siganwa ritegerejwe i Kigali:

Ku Cyumweru, 21 Nzeri 2025:

Gusiganwa n’ibihe ku bagore (Individual Time Trial): 31,2 km – Akazamuko 460 m

Gusiganwa n’ibihe ku bagabo (Individual Time Trial): 40,6 km – Akazamuko 680 m

Ku wa Mbere, 22 Nzeri 2025:

Gusiganwa n’ibihe ku bagore U23: 22,6 km – Akazamuko 350 m

Gusiganwa n’ibihe ku bagabo U23: 31,2 km – Akazamuko 460 m

Ku wa Kabiri, 23 Nzeri 2025:

Abagore Junior: 18,3 km – Akazamuko 225 m

Abagabo Junior: 22,6 km – Akazamuko 350 m

Ku wa Gatatu, 24 Nzeri 2025:

Gusiganwa n’ibihe ku makipe avanze (Mixed Relay): 42,4 km – Akazamuko 740 m

Ku wa Kane, 25 Nzeri 2025:

Gusiganwa mu muhanda abagore U23: 119,3 km (Kuzenguruka Kimihurura inshuro 8) – Akazamuko 2.435 m

Ku wa Gatanu, 26 Nzeri 2025:

Abagabo Junior: 119,3 km (Kuzenguruka Kimihurura inshuro 8) – Akazamuko 2.435 m

Abagabo U23: 164,6 km (Kuzenguruka Kimihurura inshuro 11) – Akazamuko 3.350 m

Ku wa Gatandatu, 27 Nzeri 2025:

Abagore Junior: 74 km (Kuzenguruka Kimihurura inshuro 5) – Akazamuko 1.520 m

Abagore Elite: 164,6 km (Kuzenguruka Kimihurura inshuro 11) – Akazamuko 3.350 m

Ku Cyumweru, 28 Nzeri 2025:

Abagabo Elite: 267,5 km (Kuzenguruka Kimihurura inshuro 9, Kigali inshuro 1, Kimihurura inshuro 6) – Akazamuko 5.475 m

Iri siganwa ritegerejwe mu Rwanda ryitezweho kuzasiga isura nshya y’iterambere ry’umukino wo gusiganwa ku magare n’imyidagaduro. 

Fally Merci yavuze ko iki gitaramo cya Gen-z Comedy cyahujwe no gukangurira urubyiruko kumenya amakuru y'ibanze kuri Shampiyona y'Isi y'Amagare igiye kubera mu Rwanda ku nshuro ya mbere

Umwanditsi akaba n'Umukinnyi wa Filime, Mazimpaka Jones Kennedy yatumiwe mu gitaramo cy'urwenya, Gen-Z Comedy Show

Iki gitaramo cyo kuri uyu wa Kane tariki 11 Nzeri 2025, cyatumiwemo Dr Nsabi na Killaman, Manzere na Kampire, Lucky Baby, Dudu, Rumi, Pirate na Kadudu