Nyuma y'uko iyi mikino y'igikombe cy'Isi cy'ama-Club itangiye gukinwa mu rukerera rwo ku Cyumweru, na nyuma yaho yarakomeje hakinwa iyo mu matsinda atandukanye. Saa Kumi n'ebyiri mu itsinda C FC Bayern Munich yo mu Budage yanyagiye Auckland City FC yo muri New Zealand ibitego 10-0. Ni ibitego bya Kingsley Coman, Sasha Boey, Michael Olise, Thomas Muller na Jamal Musiala.
Mu itsinda saa Tatu z'ijoro, kuri Rose Bowl ikipe ya Paris Saint-Germain yakinnye na Atletico Madrid. Aya makipe yombi asanzwe yamamariza Visit Rwanda ku myambaro yayo yo mu myitozo ariko ku munsi w'ejo Paris Saint-Germain yari iyambaye ku maboko aho biri mu masezerano mashya ko ari ko bizajya bigenda muri iki gikombe cy'Isi cy'ama-Club.
Paris Saint-Germain ihabwa amahirwe yo kwegukana igikombe yatangiye yitwara neza inyagira Atletico Madrid ibitego 4-0. Ni ibitego bya Fabian Ruiz ku munota wa 19 ahawe umupira na Khvicha Kvratskhelia, Vitinha ku wa 45+1 ahawe umupira na Khvicha Kvratskhelia, Senny Mayulu ku wa 87 ndetse na Lee Kang-In ku wa 7 w'inyongera kuri penariti.
Atletico Madrid yasoje uyu mukino idafite abakinnyi buzuye nyuma y'uko myugariro Clement Lenglet yeretswe ikarita ya kabiri y'umuhondo ku munota wa 77. Abafana bakurikiye uyu mukino ni 80,619.
Mu rukerera rwo kuri uyu wa Mbere kandi mu itsinda A FC Porto yo muri Portugal yanganyije na Palmeiras 0-0 naho mu itsinda B Botafogo itsinda Seattle Sounders FC ibitego 2-1.
Imikino y'igikombe cy'Isi cy'ama-Club kiri kubera muri Leta Zunze Ubumwe za Amerika kirakomeza kuri uyu wa Mbere aho saa Tatu z'ijoro mu itsinda D aho Chelsea iri bukine na Los Angeles FC.
Paris Saint-Germain yari yambaye Visit Rwanda ku maboko
