Uyu mukino wo ku munsi wa mbere wo mu itsinda I wakinwe kuri uyu wa Kabiri saa Tatu z’ijoro kuri MetLife Stadium i New Jersey muri Leta Zunze Ubumwe za Amerika. Amakipe yombi yatangiye umukino akina yigana imwe itakaza umupira ugahita ufatwa n’indi.
Uko iminota yagendaga, ikipe y’igihugu y’u Bufaransa yihariye ibijyanye no guhererekanya umupira ndetse ari ko ishaka kugera imbere binyuze ku barimo rutahizamu wayo Kylian Mbappé ariko ba myugariro ba Senegal bakaba ibamba.
Ku munota wa 24, u Bufaransa bwarokotse ku ishoti riremereye ryarekuwe na Nicolas Jackson rikubita igiti cy’izamu umunyezamu agiye kwitsinda birangira umupira unyuze impande y’izamu gato.
Mbere y’uko igice cya mbere kirangira, Senegal yongeye kurata igitego cyabazwe ku mupira mwiza Ismaila Sarr yari ahawe imbere y’izamu ariko arekuye ishoti rinyura hejuru. Igice cya mbere cyarangiye amakipe yombi anganya 0-0.
Mu gice cya kabiri, u Bufaransa bwaje busatira cyane ndetse binashoboka ko bwabona igitego nk'aho Michael Olise yahaye umupira mwiza Mbappe ubundi arekura ishoti ariko umunyezamu wa Senegal, Edouard Mendy aratabara.
Ku munota wa 66, Mbappe yaje gufungura amazamu ku mupira yahawe na Michael Olise. Ku munota wa 82, Bradley Barcola wari winjiye mu kibuga asimbuye yatsinze igitego cya kabiri cy’u Bufaransa ahawe umupira na Adrien Rabiot.
Ku wa 90+5 Ibrahim Mbaye wa Senegal yayitsindiye igitego ariko bidatinze ku munota wa 90+6 Mbappe ahita atsinda icya gatatu cy’u Bufaransa. Umukino warangiye ikipe y’igihugu y’u Bufaransa itsinze iya Senegal ibitego 3-1.
Mbappe yahise yandika amateka yo kuba umukinnyi watsindiye u Bufaransa ibitego byinshi aho kuri ubu afite ibitego 58.
Uko Mbappe yatsinze igitego cya mbere cy'u Bufaransa 
Mbappe yanditse amateka mashya yo kuba umukinnyi watsindiye u Bufaransa ibitego byinshi
U Bufaransa bwatsinze Senegal ibitego 3-1