Mu kiganiro yagiranye n'itangazamakuru, Kimmich
yavuze ko babwiwe ko iyo nzoka ishobora guteza ikibazo gikomeye iyo umuntu arumwe nayo.
Yagize ati: "Ejo twabonye inzoka kandi twabwiwe
ko ifite ubumara. Iyo ikurumye ugomba guhita ujya kwa muganga. Ntabwo byanze
bikunze yahitana umuntu, ariko ni ikintu giteye impungenge. Mu Budage ntabwo
dufite inyamaswa nyinshi ziteje akaga nk'izi."
Yakomeje avuga ko bafite ubwoba bwo kuyikandagira
batabizi kuko bishobora kugira ingaruka mbi, bityo bakaba bari kugenda bitonze
cyane mu gihe bari mu mwiherero.
The Athletic yatangaje ko iyo nzoka ari iyo mu bwoko
bwa Copperhead, bumaze kumenyekana cyane muri leta ya North Carolina. Raporo
z'inzego zishinzwe ibidukikije muri iyo leta zigaragaza ko hafi 90% by'abarumwa
n'inzoka zifite ubumara muri North Carolina baba barumwe n'ubu bwoko.
Nubwo uburozi bwayo butakunze guhitana abantu,
kurumwa nayo bishobora gutera ububabare
bukomeye, ari na yo mpamvu abaturage basabwa kuyireka aho iri aho kuyegera.
Iyi nkuru ije nyuma y'uko u Budage bwatangiye neza
irushanwa igikombe cy’Isi cya 2026 kirimo kirabera muri Leta Zunze Ubumwe za
Amerika, Canada na Mexico butsinda Curaçao ibitego 7-1 mu mukino wabereye i
Houston.
Kuri ubu, abakinnyi b'u Budage bakomeje imyiteguro y'umukino bazahuramo na Cote d’Ivoire ku wa Gatandatu i Toronto.
Inzoka y'ubumara yateye impungenge mu mwiherero w'u Budage iri mu gikombe cy'Isi cya 2026