Uyu mukino wabereye kuri Estadio Azteca, aho Mexico yabonye intsinzi ibifashijwemo na Julián Quiñones na Raúl Jiménez, biyihesha itike yo gukomeza muri 1/8.
Mu minota y'inyongera, Hincapie yagaragaye yegereye rutahizamu wa Mexico, Santiago Giménez, amuvugisha apfutse umunwa. Giménez yahise abimenyesha umusifuzi Slavko Vinčić, wahise yitabaza VAR mbere yo gufata umwanzuro wo guha Hincapié ikarita itukura.
Uyu mukinnyi wafashije Arsenal FC kwitwara neza mu mikino ya nyuma haba muri Premier League ndetse na UEFA Champions League, yabaye umukinnyi wa kabiri uhawe ikarita itukura muri iri rushanwa azira gupfuka umunwa ari kuvugana n'uwo bahanganye.
Ni nyuma ya Miguel Almirón wabihaniwe mu mukino wa Paraguay na Turukiya.
Nyuma y'ibyabaye, abakoresha imbuga nkoranyambaga bagaragaje ibitekerezo bitandukanye. Bamwe banenze Hincapié bavuga ko yagombaga kuba azi amabwiriza, mu gihe abandi bagaragaje urujijo ku mpamvu y'icyemezo cyafashwe n'umusifuzi.
Nk’uko tubikesha The Mirror, uwahoze akina muri Shampiyona y'u Bwongereza, Jobi McAnuff, yavuze ko ashyigikiye iri tegeko, asobanura ko gupfuka umunwa igihe uvugana n'undi mukinnyi bishobora gutuma hatamenyekana amagambo yavuzwe, cyane cyane mu bihe hashobora kuba harimo imvugo zibiba urwango cyangwa ivangura.
Mbere yo gusezererwa, Hincapie yari yagize uruhare rukomeye mu rugendo rwa Ecuador, by'umwihariko mu ntsinzi y'ibitego 2-1 yakuye ku Budage mu mukino wa nyuma wo mu matsinda.
Nyuma yo gusezererwa, biteganyijwe ko Hincapie azahabwa ikiruhuko mbere yo gusubira mu myitozo y'ikipe ye ya Arsenal yitegura umwaka mushya w'imikino.