Uyu mukino watangiriye ku munota wa 27 nkuko byari biteganyijwe ikipe ya Mukura VS ubona ariyo iri hejuru ndetse ku munota wa 32 gusa yashoboraga kubona igitego ku mupira mwiza Boateng Mensah yari abonye ariko umusifuzi akerekana ko habayemo kurarira.
Mukura VS yakomeje kubona uburyo binyuze ku mipira y'imiterekano yabonaga ariko kuyibyaza umusaruro bikaba ikibazo.Igice cya mbere cyarangiye Rayon Sports nta buryo bufatika yari yabona imbere y'izamu. Mu gice cya kabiri Rwaka Claude yaje akora impinduka mu kibuga kibuga havamo Rukundo Abdul Rahman na Iraguha Hadji hajyamo Niyonzima Olivier 'Seif' na Aziz Bassane.
Mukura VS yaje n'ubundi ikomeza gusatira nkaho ku munota wa 54 Boateng Mensah yarekuye ishoti ryashoboraga guteza ibibazo ariko Ndikuriyo Patient akaba maso. Ku munota wa 57 Murera yakosoye Mukura VS iyitsinda igitego cya Biramahire Abbedy ku mupira yarahawe na Aziz Bassane.
Nyuma y'iminota 2 gusa Mukura VS nayo yahise yishyura ku ibifashijwemo na Boateng Mensah akoresheje umutwe kuri koroneri yaritewe na Uwumukiza Obed.Rayon Sports yaje kongera gukora impinduka mu kibuga havamo Prince Elanga-Kanga hajyamo Adama Bagayogo.
Mukura VS yakomeje kwiharira ibijyanye no guhererekanya umupira ndetse abakinnyi ba Rayon Sports bakayikoreraho amakosa gusa ntiyabyaze umusaruro. Ku munota wa nyuma w'umukino Rayon Sports yarase uburyo bw'abazwe ku mupira Aziz Bassane yari ahaye Biramahire Abbedy arekuye ishoti rikubita igiti cy'izamu.
Umukino warangiye amakipe yombi anganya igitego 1-1. Umukino wo kwishyura uzabera kuri Kigali Pelé ku wa Gatatu, tariki ya 30 Mata 2025, saa Kumi n'Ebyiri n'Igice. Ni mu gihe APR FC na Police FC nazo zizakina ku wa Gatatu saa cyenda kuri Kigali Pelé Stadium.
Biramahire Abeddy yishimira igitego yatsinze
