New Melody Choir ibarizwa mu kigo cyitwa New Melody Industries, ikaba igizwe n'abaririmbyi baturuka mu matorero atandukanye ya Gikristo barimo ab'ibyamamare nka Neema Marie Jeanne, Josue Shimwa, Jado Sinza & Esther, Bosco Nshuti, Emelyne Penzi, n’abandi.
Igizwe n'abaririmbyi b'intyoza mu miririmbire izira amakaraza. Abanyamuryango bayo bakorera Imana binyuze mu kuyiririmbira no mu bikorwa by'ubugiraneza nko gusura abarwayi mu bitaro, ikabagezaho ihumure, ibyiringiro n’urukundo rwa Kristo.
New Melody ikunzwe cyane mu ndirimbo zitandukanye zirimo: "Yarambabariye", "Ndakwiringiye”, “Imana Ntisinzira”, “Ndashimira Umwami”,"Haleluya", “Soko y’Ibyishimo”, “Nuzuye Ibyishimo”, “Yego”, “Uhembuwe” na “Imbabazi”.
“Selah Concert” igiye kugaruka nyuma y’imyaka umunani
Josue Shimwa, washinze New Melody Choir akaba ari na we ufite iyerekwa ryatumye ivuka (Founder & Visionary), yabwiye inyaRwanda ko iyi Korali igiye gukora ku nshuro ya gatatu igitaramo cya “Selah”.
Iki gitaramo kizaba ari igice gikomeye cy’urugendo rwa New Melody Choir mu gukomeza kugeza ubutumwa bw’Ijambo ry’Imana ku bantu binyuze mu muziki wo kuramya no guhimbaza.
Kuri uyu wa Kane tariki ya 10 Nzeri 2026, New Melody yateguje abakunzi bayo igitaramo cyiza, inasaba buri umwe gutumira abantu nibura barindwi. Yanditse kuri Facebook iti: "Nawe wari ukumbuye ibihe byiza nk’ibi? Ngiyi gahunda. Iyi tariki (8/11/2026) yitubikire, maze ubimenyeshe abawe byibura 7. Turagukunda!".
Imyaka 8 irashize kuva New Melody itaramiye abakunzi bayo mu gitaramo “Selah Concert II” cyabaye tariki ya 25 Ugushyingo 2018, muri Camp Kigali. Cyitabiriwe n’abahanzi b'ibyamamare barimo Aline Gahongayire, Knowless Butera, Mani Martin na Christopher.
Umushyitsi mukuru yari Bamporiki Edouard, wari Perezida w’Itorero ry’Igihugu icyo gihe, akaba yari ahagarariye n’abaterankunga ba New Melody. Ni igitaramo cyabonetsemo umusaruro ushyitse kuko hari n’abakiriye agakiza.
Nubwo ibitaramo bya Selah byaherukaga kuba mu myaka 8 ishize, New Melody yakoze ibindi bitaramo by'ivugabutumwa. Mu 2024, yakoze igitaramo cyiswe “Evening of Salvation Songs”, cyabereye muri Bethesda Holy Church ku Gisozitariki ya 8 Ukuboza 2024.
Mu mishinga yindi bafite harimo gukora imigoroba yo kuramya no guhimbaza Imana, amahugurwa y’abaririmbyi, abayobozi b’indirimbo n’abatekinisiye, no gufata amajwi n’amashusho y’indirimbo nshya mu ndimi zitandukanye.
New Melody Choir igizwe n'abaririmbyi biganjemo urubyiruko bazwiho ubuhanga mu miririmbire
News Melodie igizwe n'abaririmbyi b'abahanga baturuka mu matorero ya Gikristo atandukanye
New Melody irangamiye kugeza ku bantu benshi ubutumwa bwiza bwa Yesu Kristo
Korali New Melody igiye gukora igitaramo gikomeye yise “Selah Concert III”
REBA INDIRIMBO "YARAMBABARIYE" YA NEW MELODY