Igihe cyari iki - Kevin Kade ugiye kuririmba bwa mbere muri MTN Iwacu Muzika Festival

Kevin Kade ugezweho muri iki gihe binyuze mu ndirimbo nka ‘Nyiragongo’, yabaye umuhanzi wa mbere utangajwe muri ibi bitaramo by’iserukiramuco rizatangira ku wa 20 Kamena rigasozwa ku wa 1 Kanama 2026,

Mu kiganiro na InyaRwanda, Kevin Kade yavuze ko umwaka ushize ntiyabashije kuririmba muri ibi bitaramo “kubera ko nahise ngira urugendo rujya muri Leta Zunze Ubumwe za Amerika” ashimangira ko “igihe cyari iki kugira ngo nshimangire imyaka itanu ishize ndi mu muziki n’ibindi bikorwa biri imbere.”

Yagize ati: “Igihe cyari iki kandi turabikwiye. Nasezeranyije abafana ko ngomba kubageraho hirya no hino mu ntara rero banyitegure. Navuga ko ari iby'agaciro kuri njye."

Nk’uko byatangajwe na East African Promoters (EAP), MTN Iwacu Muzika Festival 2026 izagera mu turere turindwi (7) tw’ingenzi, ari two: Huye, Ngoma, Nyagatare, Karongi, Muhanga, Musanze na Rubavu.

Ibi byerekana ko iri serukiramuco rizanyura mu Ntara zose z’u Rwanda, hagamijwe ko ibyishimo n’umuziki bigera ku baturage benshi bashoboka, batagombye kujya i Kigali gusa ngo babone ibitaramo bikomeye.

MTN Iwacu Muzika Festival si igitaramo gisanzwe. Ni urubuga ruhuza ibisekuru bitandukanye, aho urubyiruko, abakuze n’abana bahurira ku rubyiniro rumwe, bagasangira ibyishimo by’umuziki nyarwanda.

Mu myaka ishize, iri serukiramuco ryabaye umwanya wo: Kugaragaza impano nshya, guhuza abahanzi bakomeye n’abafana babo, guteza imbere ubukerarugendo bwo mu gihugu imbere, no gususurutsa abaturage mu bihe by’impeshyi.

Buri karere rizageramo, riba umunsi wihariye w’ibyishimo: imihanda yuzura urujya n’uruza, abacuruzi bakabona abakiliya benshi, urubyiruko rukambara imyambaro yerekana abahanzi bakunda, maze urubyiniro rugasusuruka koko!

East African Party (EAP) imaze imyaka myinshi itegura ibitaramo bikomeye mu Rwanda no mu karere. Ubufatanye bwayo na MTN bwatumye MTN Iwacu Muzika Festival iba kimwe mu bitaramo bitegerejwe cyane buri mwaka.

MTN nk’umuterankunga mukuru, igaragaza ko ishyigikiye iterambere ry’imyidagaduro n’impano z’Abanyarwanda, ihuza ikoranabuhanga n’umuziki mu kwegera abakiriya no kubaha serivisi zirimo n’ibikorwa byo kwidagadura.

Kuva ku wa 20 Kamena kugeza ku wa 1 Kanama, u Rwanda ruzaba ruri mu murya w’ibitaramo. Mu turere nka Rubavu na Karongi twegereye ibiyaga, cyangwa Musanze iri mu misozi y’ibirunga, hazaba humvikana amajwi y’abahanzi n’indirimbo zinyuranye, kuva kuri Afrobeat, R&B, Hip Hop, kugeza ku ndirimbo z’umuco.

Ni ibitaramo biteganyijwe kuzana umwuka mushya, bigasubiza icyizere abakunzi b’umuziki bari bamaze igihe bategereje kongera guhura n’abahanzi babo ku rubyiniro rumwe.

Mu magambo make, MTN Iwacu Muzika Festival 2026 ni urugendo rwo kongera guhuza Abanyarwanda biciye mu muziki. Ni urugendo ruzazenguruka igihugu, rususurutsa imitima, rukazamura impano, kandi rugasigira benshi amateka mashya.

Aho iri serukiramuco rizagera hose, hazaba ari ibirori by’ikirenga. Impeshyi ya 2026 iraba iy’umuziki. Iwacu ni muzika.

Kevin Kade yatangaje ko yiteguye gususurutsa abari mu Ntara z’u Rwanda mu bitaramo bya MTN Iwacu Muzika Festival

Ni ku nshuro ya mbere Kevin Kade azaba aririmbye mu bitaramo bya MTN Iwacu Muzika Festival

KANDA HANO UBASHE KUREBA AMASHUSHO Y’INDIRIMBO ‘NYIRAGONGO’ YA KEVIN KADE