Izi
telefoni zatangajwe ku wa 9 Nzeri 2026 mu muhango wa Apple wabereye muri Leta
Zunze Ubumwe za Amerika, aho Apple yagaragaje impinduka nshya mu bijyanye
n’imikorere, amashusho, ubwenge buhangano ndetse n’imiterere ya telefoni zayo.
iPhone
18 Pro na iPhone 18 Pro Max ni zo telefone zisanzwe ziri ku isonga muri uru
ruhererekane rushya rwa Apple.
Zikoresha
chip nshya ya A20 Pro, yongereye ubushobozi mu mikorere ndetse inafasha mu
gukoresha serivisi zishingiye ku bwenge buhangano. Apple kandi yazamuye
ubushobozi bwa kamera, harimo uburyo bushya bwo kugenzura uko urumuri rwinjira
muri kamera, bigamije gutanga amashusho meza cyane cyane mu bihe by’urumuri
ruke.
iPhone
18 Pro itangirira ku $1,199, mu gihe iPhone 18 Pro Max itangirira ku $1,299.
Biteganyijwe ko izi telefoni zizatangira kugurishwa ku wa 18 Nzeri 2026, nyuma
y’uko mbere yaho hatangiye kwakirwa abazitumiza.
iPhone Duo: telefoni
ya mbere ya Apple uhindura uko ushaka
Ikintu
cyakuruye cyane abantu mu itangizwa ry'izi telefoni ni iPhone Duo, kuko ari bwo
bwa mbere Apple yinjiye ku isoko rya telefoni zishobora kwikuba cyangwa kwihina.
Iyi
telefoni ifite ecran yo hanze ya santimetero 5.4, ariko iyo ifunguwe igahinduka
ecran nini ya santimetero 7.6, ikaba ituma uyikoresha abasha kuyifashisha
nk’aho afite telefoni n’igikoresho kinini cyo kureberaho ibintu icyarimwe.
Apple
yayubatse ikoresheje titanium, ikagira uburyo bwihariye bwo kwikuba ndetse
ikaba inashyigikira Apple Pencil.
Iyi
telefoni kandi ikoresha chip ya A20 Pro, ifite kamera ebyiri z’inyuma za
megapixels 48, ndetse Apple yashyizemo uburyo bwo gukoresha porogaramu nyinshi
icyarimwe kuri ecran nini.
Ku
bijyanye n’igiciro, iPhone Duo itangirira ku $1,999, bituma iba imwe muri
telefoni zihenze cyane Apple imaze gukora.
Iyi
telefoni izatangira kuboneka ku isoko ku wa 23 Ukwakira 2026, mu gihe
abazashaka kuyitumiza bazatangira kubikora kuva ku wa 16 Ukwakira.
Apple yibanze ku
bwenge buhangano
Uretse
impinduka z’imiterere n’ubushobozi bwa telefoni, Apple yongereye cyane uruhare
rw’ubwenge buhangano muri uru ruhererekane rushya.
Siri
nayo yazamuwe ubushobozi, aho Apple yashyizemo uburyo bushya bwo gufasha
abakoresha gukora imirimo myinshi ndetse no gukorana neza na porogaramu
zitandukanye.
Izi
mpinduka ziri mu mugambi wa Apple wo guhuza ubwenge buhangano n’ibikoresho
byayo, mu gihe inibanda ku kurinda amakuru bwite y’abakoresha.
Muri
rusange, iPhone 18 Pro na 18 Pro Max byazanye cyane cyane imbaraga nshya mu
mikorere, kamera na AI, mu gihe iPhone Duo yo ari yo yahinduye cyane isura
y’umuryango wa iPhone, kuko ari bwo bwa mbere Apple yakoze telefoni ikuba.
Kugeza
ubu, Apple ntabwo yatangaje iPhone 18 isanzwe muri uyu muhango wo ku wa 9 Nzeri
2026; icyatangajwe ni iPhone 18 Pro, iPhone 18 Pro Max na iPhone Duo.
Apple
yashyize ahagaragara iPhone 18 Pro, iPhone 18 Pro Max na iPhone Duo, telefoni
nshya yikuba ikaba ari yo yakuruye amatsiko menshi
Kuva kuri iPhone 18 Pro Max igura $1,299 kugeza kuri iPhone Duo igura $1,999, Apple yongeye kuzana telefoni zifite ubushobozi n’imiterere bishya
