Igikombe gitangwa mu marushanwa y'igikombe cy'isi, gikorwa na sosiyete yitwa GDE Bertoni, ikaba ikorera ahitwa i Milan mu Butaliyani. Uru ruganda ntabwo rukora igikombe gitangwa mu mikino y'igikombe cy'isi gusa, ahubwo rukora n'ibindi bikombe bitangwa mu yandi marushanwa akomeye ku mugabane w'u Burayi harimo n'iby'imikino yose itegurwa na UEFA nka Champions League.
Ibikoresho byifashishwa hakorwa iki gikombe, bibarirwa agaciro karenga ibihumbi 50 by'amadorari, naho iyo cyarangije gukorwa neza kibarirwa agaciro ka Miliyoni 20 z'amadorari [Miliyari 20 Frw].
Iki gikombe gikorwa muri zahabu ya karat 18, gifite uburebure bwa santimetero 37 ndetse n'uburemere bw'ibiro 6. Usibye kandi kuba iyo iki gikombe kiri gukorwa hifashishwa ibikoresho bihenze birimo na zahabu, binasaba umuntu w'umuhanga mu bugeni no gushushanya.
Silvio Gazzaniga, umunyabugeni wo mu Butaliyani ni we wemerewe gukora iki gikombe bwa mbere mu 1971 nyuma y’uko Brazil yemerewe kukigumana burundu, kuko yari imaze kwegukana iri rushanwa inshuro 3.
Umwe mu basaza b’abahanga bifashishwa mu gukora igikombe cy'isi
Buri myaka 4 hakorwa igikombe kizahabwa ishyirahamwe ry'umupira w'amaguru, cy'igihugu kizitwara neza kurusha ibindi mu mikino y'igikombe cy'isi. Igikombe kizatangwa mu mikino y'igikombe cy'isi cy'uyu mwaka cyamaze kugera muri Qatar.
Igikombe cy'isi kimaze imyaka 92 gikinwa, kikaba kigiye kuba ku nshuro ya 22.
Uburyo igikombe cy'isi gikorwamo
